دەپتۋتات ماقسات تولىقباي «اۋىل اماناتى» جوباسىنىڭ جۇزەگە اسىرىلۋ بارىسىنا الاڭداۋشىلىق ءبىلدىرىپ, ۇكىمەت پەن سالالىق مينيسترلىكتەرگە ناقتى ۇسىنىستار جولدادى, دەپ جازادى Egemen.kz.
حالىق قالاۋلىسىنىڭ ايتۋىنشا, مەملەكەت باسشىسى جاريالاعان «تىڭداۋشى مەملەكەت» تۇجىرىمداماسى اياسىندا اتقارۋشى بيلىك ازاماتتاردىڭ وتىنىشتەرىنە ۋاقتىلى ءارى مازمۇندى جاۋاپ بەرۋى ءتيىس. الايدا ءىس جۇزىندە بۇل تالاپ ورىندالماي وتىرعانى بايقالادى. دەپۋتات كوتەرگەن بىرنەشە ماڭىزدى ماسەلە فورمالدى, مازمۇنسىز جاۋاپتارمەن شەكتەلىپ جاتقانىن اتاپ ءوتتى.
اتاپ ايتقاندا, دەپۋتات 2023 جىلى باستالعان «اۋىل اماناتى» جوباسى بويىنشا اۋىل تۇرعىندارىنا 100 ملرد تەڭگە كولەمىندە شاعىن نەسيە بەرىلگەنىن, الايدا 2024 جىلى بيۋدجەت تاپشىلىعىنا بايلانىستى بۇل سوما 20 ملرد تەڭگەگە دەيىن قىسقارعانىن ەسكە سالدى. اۋىل حالقىنىڭ تابىسىن ارتتىرۋعا باعىتتالعان بۇل جوبا ەل ىشىندە ۇلكەن ءۇمىت پەن سەنىم تۋدىرعان. دەگەنمەن, اكىمدىكتەر ۇزاق ۋاقىت قۇجات جيناعانىمەن, قاراجاتتىڭ جەتىسپەۋى سالدارىنان جۇرتتىڭ شاعىمى كوبەيگەن.
سونىمەن قاتار دەپۋتات «اۋىل اماناتى» باعدارلاماسى اياسىندا بارلىق اۋىلدىق ەلدى مەكەندەردە «اگروساۋات» وقۋ ورتالىقتارىن قۇرۋ قاجەتتىگىن ايتتى. پيلوتتىق جوبا رەتىندە جامبىل وبلىسىنىڭ مەركى اۋدانىندا ىسكە اسىرىلعان باستاما وڭ ناتيجە كورسەتكەن. جوبا اياسىندا جەڭىلدەتىلگەن نەسيە العان اۋىل تۇرعىندارى اۋىل شارۋاشىلىعى سالاسى بويىنشا كاسىبي وقۋدان ءوتىپ, ۇزاق مەرزىمدى قولداۋعا يە بولعان.
مەملەكەت باسشىسى دا بۇل باستامانى قولداپ, ۇكىمەت پەن اكىمدىكتەرگە «اگروساۋات» ورتالىقتارىن باسقا وڭىرلەردە اشۋ تۋرالى تاپسىرما بەرگەن. الايدا دەپۋتاتتىڭ ايتۋىنشا, ۇلتتىق ەكونوميكا مينيسترلىگىنىڭ رەسمي جاۋابىندا بۇل ۇسىنىس ەسكەرۋسىز قالعان جانە بۇگىنگى كۇنگە دەيىن ناقتى شارالار قابىلدانباعان.
«بۇل — جاۋاپسىزدىق. ماسەلە تەك نەسيە بەرۋمەن شەكتەلمەيدى. اۋىل كاسىپكەرلەرىن وقىتۋ, كووپەراتيۆتەرگە بىرىكتىرۋ, ءونىم وتكىزۋ تىزبەگىن ۇيرەتۋ – كەشەندى قولداۋدىڭ ماڭىزدى بولىگى. "اگروساۋات" ورتالىقتارىنىڭ جوقتىعىنان قارجىلىق تۇراقسىزدىق پەن نەسيەنىڭ قايتارىلماۋى سياقتى ماسەلەلەر تۋىنداپ وتىر», دەدى دەپۋتات.
وسىعان بايلانىستى ماجىلىسمەن كەلەسى ەكى ناقتى ۇسىنىستى ەنگىزىپ وتىر:
وبلىستاردا «اگروساۋات» وقۋ ورتالىقتارىن قۇرۋ بويىنشا ناقتى ءىس-شارالار جوسپارىن تەز ارادا ازىرلەۋ;
اتالعان ورتالىقتاردىڭ قىزمەتىن قارجىلاندىرۋدى, اۋىل شارۋاشىلىعى ءونىمىن قايتا وڭدەۋ جانە وتكىزۋ ينفراقۇرىلىمىن دامىتۋدى كوزدەيتىن بيۋدجەتتىك باعدارلامانى ناقتىلاۋ.
ماقسات تولىقبايدىڭ پىكىرىنشە, «اۋىل اماناتى» جوباسىنىڭ الەۋەتى زور. الايدا فورمالدى كوزقاراس پەن ورىندالماعان تاپسىرمالار جوبانىڭ مازمۇنىنا نۇقسان كەلتىرىپ وتىر. سوندىقتان ۇكىمەت بۇل باعىتتا ناقتى ءارى جۇيەلى شەشىمدەر قابىلداۋى ءتيىس.