بۇگىنگى جاستار – ەل بولاشاعىنىڭ كەپىلى. ەتىكپەن سۋ كەشەر كۇن تۋسا, ەل قورعاۋعا اۋەلى جاستار كىرىسەتىنى انىق. ارينە, ونداي كۇننىڭ بولماعانى جاقسى. دەگەنمەن, ءار ەر-ازامات ەل قورعاۋعا ءاردايىم دايىن بولعانى ءجون. جۇرەگى «وتان» دەپ سوعاتىن سونداي جاستاردىڭ ءبىرى – لەيتەنانت قاسىمجومارت راحىمجان.
ول – قر ۇلتتىق ۇلانى باس قولباسشىلىعىنىڭ ارنايى جانە اسكەري تاسىمالدار ورتالىعىنىڭ وفيتسەرى. ونىڭ ءومىر جولى – وتانعا قىزمەت ەتۋدى ماماندىقتان جوعارى قويعان جاس وفيتسەردىڭ تاعدىر جولى.
اسكەري قىزمەتشىلەر وتباسىندا دۇنيەگە كەلىپ, بالالىق شاعىن سارىوزەك گارنيزونىنداعى اسكەري قالاشىقتا وتكىزدى. قاتار-قاتار تىزىلگەن كازارمالار مەن ساپ الاڭدارى ونىڭ ازاماتتىق بەينەسىن قالىپتاستىردى. گارنيزون تۇرعىندارىنىڭ تاتۋلىعى, ءبىر-بىرىنە دەگەن قولداۋى, ورتاق قۋانىش پەن قيىندىقتى بىرگە ەڭسەرۋى ونىڭ جادىندا تەرەڭ ءىز قالدىردى. دوستارىنىڭ دەنى – وفيتسەر بالالارى ەدى. بالا كۇنىنەن تارتىپكە باعىنىپ, جاۋاپكەرشىلىك پەن ەڭبەكقورلىقتى بويىنا ءسىڭىردى.
كۇن تارتىبىمەن ءومىر ءسۇرىپ, سپورتپەن اينالىسۋ, ءۇي ىشىندەگى رەتتىلىك پەن قارىنداسىنا قامقورلىق تانىتۋ – ونىڭ كۇندەلىكتى ادەتىنە اينالدى. «بولام دەگەن بالانىڭ ون بەسىندە باسى پىسەر» دەگەندەي, اتا-اناسىنىڭ قىزمەتتەگى ۋاقىتى كوپ بولعاندىقتان, ول ەرتە ەسەيىپ, ومىرلىك داعدىلاردى ەرتە مەڭگەردى.
15 جاسىندا ول بولاشاعى تۋرالى بايىپپەن ويلانا باستاعان. سول كەزدە اسكەري باعىتتاعى ارنايى وقۋ ورنى – «ارىستان» ليتسەيى تۋرالى ەستىپ, ارمانىنا اينالدى. اشىق ەسىك كۇنى ليتسەيگە بارعان قاسىمجومارت ءتارتىپ پەن ءبىلىم ۇيلەسكەن ەرەكشە ورتادان ايرىقشا اسەر الدى. ارحيتەكتۋراسى, ورنالاسۋى, اسكەري ءتارتىپ پەن وقىتۋ ساپاسى ونى جىگەرلەندىردى.
«ارىستانعا ءتۇسۋ وڭاي بولعان جوق. مۇندا بىلىممەن قاتار, ىشكى ءتارتىپ, توزىمدىلىك پەن مورالدىق دايىندىق باعالاندى. گەنەرال-مايور س.س.تاۋلانوۆتىڭ جەتەكشىلىگىمەن ءبىز ءبىلىم عانا الماي, تۇلعا رەتىندە دە قالىپتاستىق. وسى جەردە جاقسىلىق پەن جاماندىقتى ايىرۋدى, ار-نامىس پەن دوستىقتى باعالاۋدى, ۇلكەنگە قۇرمەت پەن ۇستانىمعا ادال بولۋدى ۇيرەندىم», دەيدى ول.
«ارىستاندى» بىتىرگەن سوڭ, قاسىمجومارت رەسەيدىڭ سانكت-پەتەربۋرگ قالاسىنداعى ا.ۆ.حرۋليوۆ اتىنداعى ماتەريالدىق-تەحنيكالىق قامتاماسىز ەتۋ اسكەري اكادەمياسىنىڭ اسكەري قاتىناس جانە تەمىرجول اسكەرى ينستيتۋتىنا وقۋعا ءتۇسىپ, ونى ۇزدىك ديپلوممەن ءتامامدادى. بۇل جەتىستىك ونىڭ بىلىمگە, تارتىپكە, كاسىبي دايىندىققا دەگەن جوعارى تالاپتارىنىڭ كورىنىسى بولدى.
تۋعان ەلىنە ورالعاننان كەيىن ول استانا قالاسىنا جولدامامەن كەلىپ, ۇلتتىق ۇلان ساپىندا قىزمەت اتقارا باستادى. بۇگىندە ول – قىزمەتىنە شىنايى ادال جاس وفيتسەر. اسكەري فورماسىن ماقتانىشپەن كيىپ, ءار كۇنىن ەل تىنىشتىعى جولىنداعى مىندەتىنە ارنايدى.
«ۇلتتىق ۇلان – جاۋىنگەرلىك جانۇيا. مۇندا جاس وفيتسەرلەردى قىزمەتتىڭ قىر-سىرىنا باۋليدى. اسىرەسە, جاۋىنگەرلىك قىزمەت باس باسقارماسىندا ىشكى قولداۋدى انىق سەزىنەسىڭ. ارىپتەستەرىمە جانە باسشىلىققا العىسىم شەكسىز», دەيدى لەيتەنانت قاسىمجومارت.
بۇگىندە ونىڭ ەڭ جاقىن دوستارى – «ارىستان» ليتسەيىندەگى سىنىپتاستارى. جىلدار مەن سىناقتاردان وتكەن سول دوستىق – ناعىز باۋىرلاستىققا اينالعان.
قاسىمجومارت راحىمجان ءوز ورنىن تاپقانىنا سەنىمدى. قاتارداعى ءاربىر كۇنى – تاڭداعان جولىنا دەگەن ادالدىعىنىڭ ايعاعى. ول وتباسىنا, ۇستازدارىنا, تاربيەلەگەن كومانديرلەرىنە شىن جۇرەكتەن العىس بىلدىرەدى.
ونىڭ ءىسى – قىزمەت ەتۋ, ماقساتى – قورعاۋشى بولۋ, بولاشاعى – پارىزعا دەگەن ادالدىقتا تۇر. قاسىمجومارت سەكىلدى جاس ءارى ءبىلىمدى وفيتسەرلەر كوپ بولسا, ەلىمىزدىڭ ىرگەسى بەرىك, كوك تۋىمىز ماڭگى جەلبىرەرى انىق.
7 مامىر – وتان قورعاۋشىلار كۇنى قۇتتى بولسىن!
دارىن سەيىتوۆ,
پودپولكوۆنيك