الماتى وبلىسى – ءتۋريزمدى وركەندەتۋ تۇرعىسىنان الەۋەتى دە مۇمكىندىگى دە زور ءوڭىر. مەملەكەت باسشىسى جەرگىلىكتى حالىقپەن كەزدەسۋىندە ءتۋريزمدى دامىتۋ – ەكونوميكانى ءارتاراپتاندىرۋدىڭ ماڭىزدى باعىتى ەكەنىن اتاپ ءوتىپ, تابيعاتتىڭ تارتۋىن ەل بايلىعى رەتىندە باعالاعانىن ايتا كەتكەن ءجون. جۇيەلى جۇمىستاردىڭ ارقاسىندا ايماق ەكونوميكاسىنىڭ وسىمىنە سەرپىن بەرەتىن بۇل باعىت جىلدان-جىلعا قارقىن الىپ كەلەدى. وبلىس اكىمى مارات سۇلتانعازيەۆپەن سۇحباتىمىزدا ءوڭىردىڭ وركەندەۋىنە سەرپىن بەرۋگە ءتيىستى وسى سالانىڭ بۇگىنى مەن كەلەشەگى كەڭىنەن ءسوز بولدى.
– مارات ەلەۋسىز ۇلى, اڭگىمەمىزدى وبلىستىڭ تۋريستىك الەۋەتىنەن باستاساق. تۋريزم – تابىس كوزى. ونى دامىتۋ – ەكونوميكالىق تۇرعىدا ورلەۋدىڭ ءتيىمدى جولى. ءسىز باسشىلىق ەتەتىن ايماقتا بۇل سالا قالاي ءورىس الىپ كەلەدى؟
– الماتى وبلىسى – كوز تارتار كوركەم تابيعاتى, تاريحي جادىگەرلەرى مەن مادەني مۇرالارى توعىسقان ايرىقشا ءوڭىر. تابيعاتتىڭ تاڭعاجايىپ سۇلۋلىعى مەن حالقىمىزدىڭ تەرەڭ تاريحىنان سىر شەرتەتىن قاسيەتتى مەكەن. وبلىس اۋماعىندا يۋنەسكو-نىڭ بۇكىلالەمدىك مۇرالار تىزىمىنە ەنگەن تاڭبالى تاس پەتروگليفتەرى, سونداي-اق, «التىن ادام» تابىلعان ەسىك قورعانى سىندى تاريحي ورىندار شوعىرلانعان. شارىن شاتقالىنىڭ اسەم كورىنىسى, كولساي مەن قايىڭدى كولدەرىنىڭ تۇمسا تابيعاتى, ىلە-الاتاۋ ۇلتتىق پاركى مەن جوڭعار الاتاۋىنىڭ بيىك شىڭدارى تۋريستەردىڭ ەرەكشە قىزىعۋشىلىعىن تۋدىرادى.
بىلتىر وبلىسقا 1,7 ميلليون تۋريست كەلىپتى. ونىڭ ىشىندە شەتەلدىك تۋريستەر سانى 60%-عا ءوسىپ, 135 مىڭ ادامعا جەتتى. وسىناۋ جوعارى كورسەتكىشپەن وبلىسىمىز رەسپۋبليكادا ءۇشىنشى ورىندا تۇر. قازىر وڭىردە 384 مىڭ تۋريسكە قىزمەت كورسەتەتىن 274 نىسان تۇراقتى جۇمىس ىستەيدى. تۋريزم سالاسىندا جالپى قۇنى 600 ملرد تەڭگەدەن اساتىن 24 ينۆەستيتسيالىق جوبا جۇزەگە اسىرىلىپ جاتىر. ماسەلەن, وتكەن جىلى ASP-Arena وتباسىلىق-ساۋىقتىرۋ كەشەنى اشىلىپ, 480 جۇمىس ورنى قۇرىلدى. وبلىسىمىزداعى ماڭىزدى جوبالاردىڭ ءبىرى – «Oi-Qaragai» كۋرورتىنىڭ اۋماعىن 105 گەكتاردان 1000 گەكتارعا دەيىن ۇلعايتۋ. بۇل جوبا اياسىندا تۋريستەر سانى 850 مىڭعا دەيىن ارتىپ, 104 ملرد تەڭگە ينۆەستيتسيا تارتىلادى. ءتۋريزمدى دامىتۋدان وبلىس ورتالىعى قوناەۆ قالاسى دا شەت قالمايدى. قالامىزدا 25 ملرد تەڭگەگە ەكى بەس جۇلدىزدى قوناقۇي مەن 48 ملرد تەڭگەگە حالىقارالىق كۋرورتتىق-جاعاجاي كەشەنى سالىنادى.
جالپى وڭىردە تۋريستىك ينفراقۇرىلىمدى جاقسارتۋ باعىتىندا ءىرى جوبالار جۇزەگە اسىرىلىپ جاتقانىن ايتتىق. بۇل باعىتتاعى ىرگەلى ىستەرگە ينۆەستيتسيا دا مولىنان تارتىلدى. سولاردىڭ ءبىرى – «فريدوم فينانس حولدينگ» كومپانياسىنىڭ باستاماسىمەن قوناەۆ قالاسىنداعى №5 جاعاجاي اۋماعىندا جۇرگىزىلگەن اباتتاندىرۋ جۇمىستارى. بۇل جوباعا كومپانيا تاراپىنان 4 ملرد تەڭگە ينۆەستيتسيا قۇيىلدى. ويعا العاندار ورىندالسا, وبلىس ورتالىعىنىڭ باستى دەمالىس ورىندارىنىڭ ءبىرى بولىپ سانالاتىن قاپشاعاي سۋ قويماسىنىڭ جاعالاۋى تۋريستەردىڭ ەلىمىزدەگى قالاۋلى ورىندارىنىڭ بىرىنە اينالارى انىق.
كەگەن اۋدانىنداعى تابيعاتتىڭ تاماشا تارتۋلارىنىڭ قاتارىندا ويىپ تۇرىپ ورىن الاتىن كولساي كولدەرىنىڭ تارتىمدىلىعىن ارتتىرۋ باعىتىنداعى دا شارالار جالعاسا بەرمەك. بىلتىر وسى ماقساتتا تاعى ءبىر ماڭىزدى جوبا – قايىڭدى كولىنە اپاراتىن 500 مەترلىك جاياۋ جۇرگىنشىلەرگە ارنالعان تۋريستىك مارشرۋت اباتتاندىرىلىپ, تابيعات اياسىندا دەمالعىسى كەلەتىن قوناقتارعا قولايلى جاعداي جاسالدى.
– تۋريزمگە قاتىستى بيىلعى جوسپار جونىندە نە ايتاسىز؟
– بيىل نەگىزگى نازار الماتى تاۋ كلاستەرى مەن ۇلتتىق پاركتەردىڭ ينفراقۇرىلىمىن دامىتۋعا اۋدارىلدى. بۇل ماقساتتا جەرگىلىكتى بيۋدجەتتەن 253 ميلليون تەڭگە ءبولىندى. ءتۋريزمدى جۇيەلى ءارى ساپالى دامىتۋ ماقساتىندا تاۋ كلاستەرى اۋماعىندا «Crystal Bay», «كيپروس» كومپانيالارىنىڭ سەرىكتەستىگىمەن «اقبۇلاق» تۋريستىك كەشەنىنىڭ جوباسى ازىرلەنىپ جاتىر. بۇل باستامالاردىڭ بارلىعى ءوڭىردىڭ تۋريستىك الەۋەتىن ارتتىرىپ, الماتى وبلىسىن ەلىمىزدىڭ تۋريزم ورتالىعىنا اينالدىرۋعا باعىتتالعان ماڭىزدى قادامدار قاتارىندا.
سونىمەن بىرگە وبلىسقا تۋريستەر اعىنىن ارتتىرۋ ماقساتىندا جىل سايىن وڭىردە حالىقارالىق دەڭگەيدەگى ءىرى سپورتتىق-مادەني ءىس-شارالار ۇيىمداستىرىلىپ كەلەدى. ماسەلەن, بيىل «Oceanman» جارىسىنا 17 ەلدەن 2500 سپورتشى قاتىسسا, «Tengri Ultra» ۋلترامارافونىنا 2000 ادام, ءداستۇرلى قىمىزمۇرىندىق فەستيۆالىنە 4000-نان استام ادام جينالدى. قوناەۆ قالاسىندا بيىلعى ناۋرىز مەيرامى دا ەرەكشە سيپاتتا ءوتتى – قالادا 25 كيىز ءۇي تىگىلىپ, مەرەكە اۋقىمى ايتارلىقتاي كەڭەيدى. ءىس-شاراعا قىتاي, ءۇندىستان, اقش, تۇركيا, ماجارستان, ليتۆا, قىرعىزستان, وزبەكستان, موڭعوليا سەكىلدى ەلدەردىڭ باس كونسۋلدىق وكىلدەرى, سونداي-اق بۇۇ مەن وزگە دە حالىقارالىق ۇيىمدار قاتىسىپ, مەرەكەلىك كوڭىل كۇيگە ورتاقتاستى, قازاقتىڭ سالت-داستۇرىمەن, ادەت-عۇرپىمەن, ۇلتتىق قۇندىلىقتارىمەن تانىسىپ, مادەني مۇرالارىن تاماشالاپ, اق داستارقانىنان ءدام تاتتى.
الماتى وبلىسىن العا جەتەلەيتىن جەتەكشى سالانىڭ ءبىرى سانالاتىن ءتۋريزمدى دامىتۋعا قاتىستى الداعى ۋاقىتتا وڭىردە بىرقاتار اۋقىمدى مادەني ءىس-شارالار وتەدى. ولاردىڭ قاتارىندا ۇلى دالا جورىعى, «ابريكوس» فەستيۆالى, ماۋسىم-شىلدە ايلارىندا جوسپارلانعان « ۇلى دالا كوشى» ەتنوفەستيۆالى بار. قازاق حالقىنىڭ مادەني مۇراسىن, كوشپەلى وركەنيەت ەرەكشەلىگىن حالىقارالىق دەڭگەيدە دارىپتەۋدى كوزدەيتىن فەستيۆالعا 12 مەملەكەتتەن – قازاقستان, تۇركيا, ازەربايجان, وزبەكستان, قىرعىزستان, موڭعوليا, باشقۇرتستان, بۋرياتيا, تاتارستان, ماجارستان, ساحا, تىۆا رەسپۋبليكالارىنان وكىلدەر قاتىسادى. وسىنداي ەلارالىق دەڭگەيدى قامتيتىن بايىپتى باستامالار ءوڭىردىڭ عانا ەمەس ەلىمىزدىڭ حالىقارالىق ارەناداعى بەدەلىن ارتتىرىپ, تۋريستىك تارتىمدىلىعىن ودان ءارى كۇشەيتۋگە سەرپىن بەرەرى ءسوزسىز.
بيىلعى « ۇلى دالا جورىعى» حالىقارالىق بايگە-مارافونى – جەڭىستىڭ 80 جىلدىعىنا وراي ۇيىمداستىرىلاتىن ايتۋلى ءىس-شارا رەتىندە العاش رەت تولىق الماتى وبلىسىنىڭ اۋماعىندا وتەدى. بۇعان دەيىن بىرنەشە ءوڭىردى قامتىپ, مىڭداعان شاقىرىمعا سوزىلىپ كەلگەن بۇل ءداستۇرلى بايگە-مارافون بيىل قاتىسۋشىلاردىڭ قارىمىن ءبىر عانا وبلىس كولەمىندە سىناعالى وتىر. مەرەيلى حالىقارالىق شارا ءبىزدىڭ مارتەبەمىزدى ارتتىرىپ قانا قويماي, وبلىس جۇرتشىلىعىنا زور جاۋاپكەرشىلىك ارتارى دا انىق. سوندىقتان بارىمىزدى سالىپ, دايىندالىپ جاتىرمىز.
– بايگەگە دايىندىق بارىسىنا توقتالساڭىز. بۇل شارانىڭ تۋريزمگە قوسار ۇلەسى قانداي؟
– حالىقارالىق بايگە-مارافوندى «Joryq» ات سپورتى فەدەراتسياسىنىڭ باسشىسى ءارى جوبانىڭ اۆتورى باقىتجان تۇرلىبەكوۆ الماتى وبلىسى اكىمدىگىنە بىرلەسىپ ۇيىمداستىرۋ تۋرالى ۇسىنىس بىلدىرگەن. ەل رۋحانياتى ءۇشىن ماڭىزى زور جوبانى بىردەن قولداپ, قولعا الدىق. بولاشاعى جارقىن جوبانىڭ مازمۇنى تەرەڭ ءارى تۋريزم سالاسىن ىلگەرىلەتۋگە قوسار ۇلەسى زور. بۇل باستاما ءبىزدىڭ العا قويىپ وتىرعان ماقساتتارىمىزبەن دە ۇندەسىپ جاتىر. وڭىرىمىزگە كەلەتىن تۋريستەر مەن جارىسقا قاتىسۋشىلارعا كورسەتەتىن كورىكتى جەرلەرىمىز بارشىلىق. ءتىپتى جوسپارلانعان شارالاردى بەس كۇنگە سىيعىزۋ قيىنعا سوعىپ وتىر. سوندىقتان بارلىعىن ەگجەي-تەگجەيلى ويلاستىرىپ, بارلىق تاراپقا ءتيىمدى بولۋىن قاراستىرىپ جاتىرمىز. ءار شەتەلدىك قاتىسۋشىنىڭ قىزىعۋشىلىعى بولاشاقتا وبلىسىمىزعا شەتەلدىك تۋريستەردىڭ لەگىن ارتتىرۋعا ىقپال ەتەدى دەپ سەنەمىز.
مەملەكەت باسشىسى: « ۇلى دالا جورىعى – بۇل قازاق حالقىنىڭ اتقا ءمىنۋ مادەنيەتىن جاڭعىرتۋ, ۇلتتىق سپورتتى دامىتۋ ءارى جاستاردى پاتريوتيزمگە تاربيەلەۋ جولىنداعى ماڭىزدى قادام», دەپ جوبانىڭ ەلدىك ءمان-ماڭىزىن اتاپ وتكەنىن ەستە ۇستاي وتىرىپ, ۇلتىمىزدىڭ ۇمىت بولا باستاعان قۇندىلىقتارىن قايتا جاڭعىرتۋ, جاستارىمىزدى وتانسۇيگىشتىككە تاربيەلەۋدەگى وزىق تاجىريبەمىزدى وزگەلەرگە دە ناسيحاتتاي الساق, نۇر ۇستىنە نۇر بولارى انىق.
ات سپورتى – قازاقتىڭ قانىندا بار, ۇلتتىڭ ءتول بولمىسى. جاستاردى اتقا باۋلۋ, جىلقى جانۋارىن تانۋعا ۇيرەتۋ – ۇلت جادىندا ات ۇستىندەگى ءومىر ءسۇرۋ مادەنيەتىن قايتا جاڭعىرتۋ جولىنداعى ماڭىزدى قادام ەكەنى ءسوزسىز.
داستۇرگە اينالعان « ۇلى دالا جورىعى» حالىقارالىق مارافونى 9–14 مامىر ارالىعىندا وتەدى. قازىرگى تاڭدا بەس كۇندىك بايگەگە بىرنەشە شەتەلدىك كوماندا قاتىسۋعا نيەت ءبىلدىرىپ وتىر. بۇل – ازامات پەن قازاناتتىڭ قايرات-كۇشى مەن ەرىك-جىگەرى سىنالاتىن ۇلكەن دودا. شارانىڭ جوعارى دەڭگەيدە ۇيىمداستىرىلاتىنىنا سەنىم مول.
جارىسقا 10-نان استام ەلدەن, اتاپ ايتقاندا, تۇركيا, رەسەي, ماجارستان, وڭتۇستىك افريكا رەسپۋبليكاسى, قىرعىزستان, وزگە دە مەملەكەتتەردەن جۇزدەن استام سپورتشى كەلمەك. ءبىزدىڭ شاباندوزدار جارىسقا قاتىسىپ قانا قويماي, حالىقارالىق ارىپتەستىك ورناتىپ, ءوڭىرىمىزدىڭ كورىكتى جەرلەرىمەن قوناقتاردى تانىستىرادى. بيىلعى حالىقارالىق بايگە-مارافون تابيعاتى كوركەم, تاريحي ورىندارعا باي بالقاش, جامبىل, ىلە اۋداندارىنىڭ اۋماعىندا وتەدى. شاباندوزدار بەس كۇن ىشىندە 500 شاقىرىم جولدى ەڭسەرىپ, شىن مىقتىنى انىقتايدى.
مارافون اياسىندا وتەتىن اۋقىمدى شارالاردىڭ ءبىرى – اسىلتۇقىمدى جىلقىلار كورمەسى. بۇل كورمەدە كەلۋشىلەر ەلىمىزدە وسىرىلەتىن ەرەكشە جىلقى تۇقىمدارىمەن تانىسىپ, جىلقى شارۋاشىلىعىنىڭ دامۋىنا نازار اۋدارا الادى. سونىمەن قاتار شەتەلدىك مەيماندارعا قازاق حالقىنىڭ مادەني مۇراسىن تەرەڭىرەك تانىتۋ ماقساتىندا ەتنواۋىلدار, فوتوايماقتار مەن ينتەراكتيۆتى الاڭدار ۇيىمداستىرىلادى. ەل ىشىنەن كەلگەن قولونەر شەبەرلەرى ۇلتتىق بۇيىمدارىن جارمەڭكەگە شىعارىپ, حالقىمىزدىڭ عاسىرلار بويى قالىپتاسقان ءداستۇرىن كوپشىلىككە كەڭىنەن ناسيحاتتايدى. بۇل – ءداستۇرلى مادەنيەتتىڭ باي مۇراسىن كورسەتۋگە بەرىلگەن ۇلكەن مۇمكىندىك. ءبىز تەك سپورتشىلاردىڭ عانا ەمەس, حالقىمىزدىڭ تاريحي بولمىسى مەن مادەني قۇندىلىقتارىن دا بۇكىل الەمگە تانىتۋدى ماقسات ەتەمىز.
مارافون بارىسىندا قاتىسۋشىلار كۇن سايىن ارنايى ايالدامالاردا اتتارىن سۋىتىپ, تىنىعۋعا مۇمكىندىك الادى. سول ساتتەردە ۇلتتىق ويىندارىمىز كورسەتىلىپ, قازاقي كيىم ۇلگىلەرى تانىستىرىلادى. وسىلايشا, بايگە تەك سپورتتىق دودا عانا ەمەس, ەلدەر اراسىنداعى مادەني بايلانىستى نىعايتاتىن, دوستىقتى بەكەمدەيتىن بىرەگەي الاڭعا اينالماق.
– وبلىس قۇرىلعان ءۇش جىلدىڭ ىشىندە سپورت, ونىڭ ىشىندە ۇلتتىق ويىنداردى دامىتۋ باعىتىندا قانداي جۇمىستار اتقارىلدى؟
– بۇگىندە وبلىسىمىزدا دەنە شىنىقتىرۋدى ناسيحاتتاۋ, وليمپيادالىق رەزەرۆتى دايىنداۋ, بۇقارالىق سپورتتى ورىستەتۋ, بالالار سپورتىن دامىتۋ, ينفراقۇرىلىمدى جاقسارتۋ باعىتىندا جۇيەلى جۇمىستار اتقارىلىپ كەلەدى. مەملەكەتتىك قولداۋدىڭ ارقاسىندا بالالار سپورتىندا ايتارلىقتاي سەرپىلىس بايقالادى.
وبلىس سپورتشىلارى جىلدار بويى قالىپتاسقان داڭقتى جولدى جالعاستىرىپ كەلەدى. كەيىنگى كەزدەرى ەلەۋلى جەتىستىكتەرگە قول جەتكىزىپ ءجۇر. 2023 جىلى استانادا وتكەن V دۇنيەجۇزىلىك كوشپەلىلەر ويىندارىندا شاباندوزدارىمىز «بايگە» سايىسىنان ەكى بىردەي التىن مەدال يەلەندى. ال VIII حالىقارالىق «ازيا بالالارى» ويىندارىندا 2 كۇمىس, 2 قولا جۇلدەنى قانجىعالادى. XXXIII جازعى وليمپيا ويىندارىندا گرەك-ريم كۇرەسىنەن دەمەۋ جادىراەۆ 77 كيلو سالماقتا كۇمىس مەدال ەنشىلەدى. سونداي-اق بيىلعى اقپان ايىندا قىتايدىڭ حاربين قالاسىندا وتكەن IX قىسقى ازيا ويىندارىندا ءوڭىر سپورتشىلارى ەل نامىسىن ابىرويمەن قورعادى. بياتلون ەستافەتاسىندا اسەت دۇيسەنوۆ كۇمىس مەدال جەڭىپ الدى. جالپى, جىل باسىنان بەرى وبلىس سپورتشىلارى ءتۇرلى دەڭگەيدەگى جارىستاردا 519 مەدال يەلەندى: 208 التىن, 148 كۇمىس, 163 قولا.
بۇقارالىق سپورتتى دامىتۋ ماقساتىندا قۇرىلعان «الاتاۋ ليگاسى» اياسىندا ءوڭىردىڭ بارلىق اۋىلدىق وكرۋگتەرىندە 140-قا جۋىق سپورت كلۋبى اشىلدى. بۇگىندە بۇل كلۋبتاردا 13 500 ادام تۇراقتى تۇردە سپورتپەن اينالىسۋدا. جىل سوڭىنا دەيىن بۇل كورسەتكىشتى 15 000 ادامعا جەتكىزۋ جوسپارلانىپ وتىر.
وبلىس تۇرعىندارىن سالاماتتى ءومىر سالتىنا تارتۋ ماقساتىندا جىل سايىن 5000-نان استام بۇقارالىق سپورتتىق ءىس-شارا ۇيىمداستىرىلادى. وسىنداي جۇيەلى جۇمىستاردىڭ ناتيجەسىندە, 2022 جىلمەن سالىستىرعاندا سپورتپەن تۇراقتى اينالىساتىن حالىقتىڭ ۇلەسى 6%-عا ارتىپ, 41,4%-عا جەتتى (2022 جىلى – 35,4%, 530 364 ادام, 2024 جىلى – 642 276 ادام).
ۇلتتىق سپورت تۇرلەرىن دامىتۋ باعىتىندا وبلىستا ارنايى سپورتتى دامىتۋ ديرەكتسياسى جۇمىس ىستەيدى. قازىرگى تاڭدا بۇل مەكەمە 12 ۇلتتىق سپورت تۇرىمەن اينالىسىپ, 776 سەكتسيادا 42,8 مىڭ ادامدى تۇراقتى جاتتىعۋلارعا تارتىپ وتىر. بۇل – ءوڭىر حالقىنىڭ سپورتپەن شۇعىلداناتىن بولىگىنىڭ 7,1 پايىزىن قۇرايدى.
كوكپار, اۋدارىسپاق, جامبى اتۋ, تەڭگە ءىلۋ سەكىلدى ءداستۇرلى سپورت تۇرلەرىنەن جوعارى ناتيجە كورسەتكەن 43 سپورتشىعا 100 مىڭنان 180 مىڭ تەڭگەگە دەيىنگى كولەمدە ارنايى شاكىرتاقى تاعايىندالدى.
سپورت ينفراقۇرىلىمىن دامىتۋعا دا ەرەكشە نازار اۋدارىلىپ كەلەدى. 2022 جىلمەن سالىستىرعاندا حالىقتى سپورت نىساندارىمەن قامتۋ كورسەتكىشى 10,5%-عا ارتىپ, 50,14%-دى قۇرادى (2022 جىلى – 39,6%). وبلىستاعى سپورت نىساندارىنىڭ جالپى سانى – 1891. سونىڭ ىشىندە 1586 نىسان اۋىلدىق ەلدى مەكەندەردە ورنالاسقان. كەيىنگى جىلدارى 10 دەنە شىنىقتىرۋ-ساۋىقتىرۋ كەشەنى قولدانىسقا بەرىلدى. تەك 2023 جىلى جامبىل اۋدانىنىڭ قاراكەستەك اۋىلىندا, ەڭبەكشىقازاق اۋدانىنىڭ شەلەك, اششىساي اۋىلدارىندا جاڭا كەشەندەر پايدالانۋعا بەرىلدى.
مەملەكەت باسشىسىنىڭ تاپسىرماسىنا سايكەس, ارناۋلى مەملەكەتتىك قوردىڭ قاراجاتى وڭىرلەردەگى الەۋمەتتىك ماڭىزى بار نىسانداردىڭ قۇرىلىسىنا باعىتتالدى. 2025 جىلى «زاڭسىز يەمدەنىلگەن اكتيۆتەردى مەملەكەتكە قايتارۋ» جوباسى اياسىندا كەگەن اۋدانىنىڭ جالاعاش اۋىلىندا 50 ورىندى سپورت كەشەنىنىڭ قۇرىلىسىنا ارنايى قوردان 1,1 ملرد تەڭگە ءبولىندى. جامبىل اۋدانىنىڭ تارعاپ اۋىلىنداعى 70 ورىندى سپورت كەشەنىن سالۋعا جەرگىلىكتى بيۋدجەتتەن 100 ملن تەڭگە قاراستىرىلعان. بۇل باستامالار اۋىل جاستارىنا قولجەتىمدى سپورتتىق ينفراقۇرىلىم ۇسىنىپ, ولاردىڭ سالاماتتى ءومىر سالتىن ۇستانۋىنا جول اشادى.
– جەڭىستىڭ 80 جىلدىعىنا ارنالعان « ۇلى دالا جورىعى» جوباسىنا قاتىسۋشىلارعا ساتتىلىك تىلەي وتىرىپ, سۇحباتىمىزدى تۇيىندەسەك.
– ءسوز باسىندا اتاپ وتكەنىمدەي, بۇل جورىق – ات پەن ادامنىڭ فيزيكالىق قۋاتىن عانا سىنايتىن دودا ەمەس, ول – رۋحاني ساياحات. تاريحپەن, مادەنيەتپەن, تابيعاتپەن ۇندەسىپ, بابالار ىزىمەن ءجۇرىپ وتەتىن « ۇلى دالا جورىعى» – اتا-بابا مۇراسىن قۇرمەتتەۋ, ۇلتتىق رۋحتى كوتەرۋ جولىنداعى ۇلكەن قادام. بارلىق قاتىسۋشىلارعا ساتتىلىك پەن جەڭىس تىلەيمىن! ءوز تاراپىمىزدان بارلىق سپورتشىلارعا لايىقتى جاعداي جاساۋعا بار كۇشىمىزدى سالامىز.
اڭگىمەلەسكەن –
جولدىباي بازار,
«Egemen Qazaqstan»