بۇعان دەيىن مەتالل سىنىقتارىن جيناۋمەن اينالىساتىن جەكە تۇلعالاردىڭ كىرىسىنە 85% سالىق جەڭىلدىگى بەرىلگەن بولسا, ەندى اتالعان نورما كۇشىن جويعان. تاياۋدا ء«تۇستى مەتالل جانە مەتالل قالدىقتارىن جيناۋشىلار قاۋىمداستىعى» ۇلتتىق ەكونوميكا مينيسترلىگى مەن ماجىلىسكە حات جولداپ, ماسەلەنىڭ جاي-جاپسارىن ءتۇسىندىرۋدى سۇرادى.
«بۇل قادام مەملەكەتتىك ساياسات اياسىندا سالىقتىق جەڭىلدىكتى 20%-عا قىسقارتۋ ماقساتىندا قابىلدانعان. دەسە دە مۇنىڭ سالدارىنا ۇڭىلە ءبىلۋىمىز كەرەك. ەل ەكونوميكاسى مۇنايدان عانا تۇرمايدى. مەتاللۋرگيا سالاسى ەكونوميكادا ستراتەگيالىق ماڭىزعا يە, ال مەتالل سىنىقتارىن جيناۋ مەن قايتا وڭدەۋ – ونىڭ اجىراماس بولىگى. مەتاللۋرگيالىق كاسىپورىندار شيكىزات رەتىندە قايتالاما مەتالداردى پايدالانادى, بۇل وندىرىستىك شىعىندى ازايتىپ, تابيعي رەسۋرسقا تۇسەتىن جۇكتەمەنى جەڭىلدەتەدى. الەمدىك تاجىريبەگە سۇيەنسەك, 1 توننا بولاتتى قايتا وڭدەۋ 1,5 توننا تەمىر كەنىن جانە 0,5 توننا كومىردى ۇنەمدەۋگە مۇمكىندىك بەرەدى. سونداي-اق مەتالداردى قايتا وڭدەۋ ەكولوگيالىق جۇكتەمەنى ازايتادى, ويتكەنى ول باستاپقى كەندى ءوندىرۋ جانە وڭدەۋگە كەتەتىن شىعىندى قىسقارتادى», دەدى قاۋىمداستىق ءوز مالىمدەمەسىندە.
ولاردىڭ ايتۋىنشا, قازىر قارا جانە ءتۇستى مەتالداردىڭ قالدىعى مەن سىنىعىن قاراپايىم ازاماتتار جينايدى. ولاردىڭ ۇلەسى مەتالل سىنىقتارىن جيناۋدىڭ جالپى كولەمىنىڭ 80%-ىن قۇرايدى. بىراق جاڭا سالىقتىق تالاپتار بۇل ازاماتتاردىڭ تابىسىنان ايىرىلىپ, مەتالل سىنىقتارىن تاپسىرۋعا دەگەن ىنتاسىن كەمىتپەك.
بۇل رەتتە قاۋىمداستىق مەتالل سىنىقتارىن جيناۋمەن اينالىساتىن جەكە تۇلعالار ءۇشىن سالىق جەڭىلدىكتەرىن قايتارۋ; مەتالل سىنىقتاردى قايتا وڭدەيتىن كاسىپورىندارعا سالىقتىق دەمالىستار نەمەسە سۋبسيديا بەرۋ; ليتسەنزيالاۋ جانە باقىلاۋ جۇيەسىن جەتىلدىرۋ; مەتالل سىنىقتارىن جيناۋشىلارعا ارنالعان تىركەۋ راسىمدەرىن جەڭىلدەتۋ; جاڭا سالىقتىق تالاپتاردىڭ ەكونوميكا مەن مەتالل نارىعىنا اسەرىن جان-جاقتى زەرتتەۋ سياقتى ۇسىنىستار جولدايدى.
«ۇكىمەتتىڭ بيۋدجەت تاپشىلىعىن قىسقارتۋعا تىرىسىپ جاتقانى قۇپتارلىق شارا, دەگەنمەن قارا جانە ءتۇستى مەتالداردىڭ قالدىعىن جينايتىن ازاماتتار ءۇشىن جەڭىلدىكتىڭ جويىلۋى قيىندىق تۋعىزايىن دەپ تۇر. سوندىقتان سالىقتىق وزگەرىستەردى قايتا قاراپ, بالاما شارالاردى قاراستىرۋ ماڭىزدى», دەيدى قاۋىمداستىق وكىلدەرى.
ەكونوميست الپامىس سەگىزباي ۇلىنىڭ سوزىنشە, قاۋىمداستىقتىڭ كوتەرىپ وتىرعان ماسەلەسى وتە وزەكتى. ساراپشى ماسەلەنى «اتامەكەن» ۇكپ-مەن بىرلەسىپ شەشۋدى ۇسىنادى.
ء«تيىستى مەكەمەلەر مەن ماجىلىسكە حات جولداماس بۇرىن مەملەكەتتىك ينستيتۋتتارعا پروبلەمانى شەشۋ جولدارىن ۇسىنىپ, تالقىلاتىپ العانى دۇرىس بولار ەدى. ينستيتۋتتار ماسەلەنى تەرەڭىرەك زەردەلەپ, ءۋاجدىڭ ورىندى ەكەنىن كورسەتىپ بەرەدى. مەنىڭشە, جالعىز قاۋىمداستىق ەمەس, بىرنەشە قاۋىمداستىق بىرلەسە وتىرىپ حات جولداسا, مينيسترلىك پەن ءماجىلىس قۇلاق اسار ەدى», دەگەن ويىن جەتكىزدى ساراپشى.