استانادا «وتباسى بانك» ۇيىمداستىرعان جىلجىمايتىن م ۇلىك جارمەڭكەسىنە جۇزدەگەن ادام اعىلدى. بۇل جارمەڭكە حالىققا ىڭعايلى ۋاقىتتا سەنبى كۇنى ۇيىمداستىرىلدى. جۇمىس كۇندەرى ءبىر مەزەت بانككە سۇرانىپ شىعا المايتىن استانالىقتار بۇل كۇنى «قازمەديانى» بەتكە الدى.
«وتباسى بانكتىڭ» شاقىرۋىمەن كەلدىم»
26 ساۋىردە «بايتەرەك» حولدينگىنىڭ ەنشىلەس ۇيىمى «وتباسى بانك» «ناۋرىز» باعدارلاماسىنىڭ قاتىسۋشىلارىنا ارنالعان جىلجىمايتىن م ۇلىك جارمەڭكەسىن وتكىزدى. ءىس-شارا بارىسىندا ءبىر الاڭدا ەلدىڭ جەتەكشى قۇرىلىس كومپانيالارى باس قوستى. جارمەڭكەدە بانك مەنەدجەرلەرىمەن قاتار استاناداعى بەلگىلى قۇرىلىس كومپانيالارىنان «Alash Way», «Aizia Invest», «El Invest», «Grand Building Group», «Lake House 1», «TC Company», «SAT-NS», «The Akan Building», «Bazis-A», «BI-Group», «Jetisu», «Favorite Group», «Grey Plaza Holding (Inju Promenade)», «Aqyn Abai (Vvbuilding)», «رامادان2020», «Sensata», «شار-قۇرىلىس» مەنەدجەرلەرى قاز-قاتار وتىرىپ, حالىققا قىزمەت كورسەتتى.
«قازمەدياعا» بۇل كۇنى استانانىڭ جۇزدەگەن تۇرعىنى كەلدى. ولاردىڭ ءبارى دە باسپانادان ءۇمىتتى. كوبى «ناۋرىز» باعدارلاماسىندا شەكتى سوما ماقۇلداۋىنان وتكەن. كوڭىلدەرى كوتەرىڭكى, ەڭسەلەرى تىك.
جارمەڭكە قوناقتارىنا ۇسىنىستاردىڭ ىشىنەن ءتيىمدى نۇسقانى تاڭداپ, نىساندى كورۋگە الدىن الا كەلىسۋ, تۇرعىن ءۇي ساتىپ الۋ ءتارتىبى بويىنشا تولىققاندى كەڭەس الۋ ءارى «باسپانا ماركەت» پورتالى ارقىلى پاتەردى برونداۋ مۇمكىندىگى قاراستىرىلدى. «قازمەدياعا» كەلگەن استانالىق نۇرسۇلتان نۇرعوجين اتتى تۇرعىن «وتباسى بانكتىڭ» شاقىرۋىمەن كەلگەنىن ايتادى.
«26 ملن تەڭگەگە دەيىن سوماعا ماقۇلداۋ الدىم. بۇل جارمەڭكە ىڭعايلى ەكەن. «وتباسى بانكتىڭ» مەنەدجەرلەرى مەن قۇرىلىس كومپانيالارىنىڭ وكىلدەرى قاز-قاتار وتىر. بۇگىن وزىمىزگە ءبىر ءۇي قارايمىز. «ناۋرىز» باعدارلاماسىمەن ءۇي الامىز. قاراجاتتى ءۇش جىل جينادىم. ءبىز سياقتى قاراپايىم جۇمىسشىلارعا «وتباسى بانكتىڭ» باعدارلامالارى ءتيىمدى ەكەنىنە كوزىم جەتتى», دەيدى ول.
«وتباسى بانكتىڭ» كەڭەسشىلەرى جارمەڭكە بارىسىندا نەسيە مولشەرلەمەسىن ەسەپتەپ بەرىپ, تولەم قابىلەتتىلىگىن باعالاۋ ءراسىمىن دە سول جەردە وتكىزدى. بۇل – الدىن الا ماقۇلداۋ الۋ ءۇشىن قاجەت. استانالىق گۇلدەن قابىكەەۆا دا بانك تالابىنىڭ ءبىرىنشى كەزەڭىنەن ءوتىپ, ەندى تولەم قابىلەتتىلىگىن راستاۋ ءۇشىن جارمەڭكەگە كەلگەن.
«4 جىلدان بەرى 3,6 ملن تەڭگە جينادىم. ماعان ء«بىرىنشى كەزەڭنەن ءوتتىڭىز» دەگەن جاۋاپ كەلدى. ەندى قانداي ساتىلاردان ءوتۋىم كەرەكتىگىن بىلەيىن دەپ كەلدىم. جۇمىس كۇنى جۇمىستان شىعا المايمىن. بۇگىنگى كۇن ىڭعايلى بولدى. ىزدەگەنگە سۇراعان دەگەندەي, SمS-حابارلاما ارقىلى بۇگىن جارمەڭكە وتەتىنى تۋرالى حابارلاما كەلدى. ءبىرىنشى كەزەڭنەن كەيىن قايدان ءوتۋىم كەرەكتىگىن شىنىمدى ايتسام بىلمەيمىن. سول ءۇشىن كەلىپ وتىرمىن. ونىڭ ۇستىنە بۇل جەردە بانكتىڭ مەنەدجەرلەرىمەن قاتار قۇرىلىس كومپانيالارىنىڭ دا ادامدارى وتىر ەكەن. جاقسى بولدى. بۇگىن ءبىر ءۇي تاڭدايمىن», دەيدى گۇلدەن.
«ناۋرىز» مىڭداعان ادامدى قۋانتتى
2025 جىلى ەلىمىزدىڭ 34 745 ازاماتى «ناۋرىز» باعدارلاماسىنا قاتىسۋعا ءوتىنىش بەرگەن. سونىڭ ىشىندە جوعارى بالل جيناعان 12 000 ازامات قاتىسۋشى رەتىندە تاڭدالعان. ولاردىڭ ىشىندە 4 577 ادام نەمەسە 38,1%-ى — تۇرعىن ءۇي كەزەگىندە تۇرعاندار. شامامەن ءاربىر التىنشى قاتىسۋشى (16,8%) — الەۋمەتتىك وسال ساناتتاعى ازاماتتار. باعدارلاماعا قاتىسۋشىلاردىڭ باسىم بولىگى — 35 جاسقا دەيىنگى جاستار (7 112 ادام). ولاردىڭ كوپشىلىگى — وتباسىلى, بالالى ازاماتتار. سونداي-اق قاتىسۋشىلاردىڭ 25%-ى — تۇرعىن ءۇي تولەمدەرىن الۋشىلار, ياعني اسكەريلەر مەن ارنايى مەملەكەتتىك ورگاندار قىزمەتكەرلەرى.
قازىر «ناۋرىز» باعدارلاماسىنا قاتىسۋشىلاردىڭ باسپانا تاڭداۋىنا ۋاقىت بەرىلگەن. 2024 جىلى «وتاۋ» جانە «ناۋرىز» باعدارلامالارىنىڭ ارقاسىندا 10 249 وتباسى قونىستويىن اتاپ وتكەن.
«ەشكىم كوڭىل كۇيىن تۇسىرمەسىن»
«وتباسى بانكتىڭ» استاناداعى فيليالىنىڭ ديرەكتورى جانار ىزىمبەتوۆانى سوزگە تارتتىق. ونىڭ ايتۋىنشا, «ناۋرىز» باعدارلاماسى ىسكە اسىرىلىپ جاتقانىنا 2 جىل بولعان. بۇل باعدارلامانى مەملەكەت باسشىسىنىڭ تاپسىرماسىمەن «وتباسى بانك» ازىرلەگەن. ونىڭ شارتى: دايىن پاتەر الساڭىز باستاپقى جارنا 10 پايىز, جارتىلاي دايىن پاتەر ءۇشىن 20 پايىز. نەسيە بويىنشا از قامتىلعان وتباسىلارعا مولشەرلەمە جىلدىق 7 پايىز (جتسم 7,1%-دان 9,6% دەيىن) بولسا, قالعان ساناتتاعى ازاماتتاردىڭ بارىنە 9 پايىز (جتسم 9,4%-دان 13% دەيىن). استانا, الماتى مەن شىمكەنت قالاسىندا بەرىلەتىن ليميت 36 ملن تەڭگەگە دەيىن بولسا, باسقا وبلىس ورتالىقتارى ءۇشىن 30 ملن تەڭگە.
«استانا تۋرالى ايتار بولساق, باعدارلاما بويىنشا 2707 ادام وتسە, 477 ازاماتتىڭ تولەم قابىلەتتىلىگى راستالدى. ولار قازىر باسپانا ىزدەپ, وسىندا جۇرگەن قۇرىلىس كومپانيالارىمەن دە سويلەسىپ جاتىر. 477 ازاماتتىڭ ىشىندە 38-ءى «ناۋرىز» باعدارلاماسى بويىنشا باسپانا ساتىپ الدى. 17 ناۋرىزدان باستاپ «ناۋرىز جۇمىسكەر» اتتى جاڭا باعدارلاما باستالدى. بۇل باعدارلاما بويىنشا دا ءوتىنىم قابىلداۋ جۇمىسى اياقتالدى. استانادان 480 ازامات وسى باعدارلاما بويىنشا تىركەلدى. 238-دەن اسا ادام ءوز باسپاناسىن تاپتى. قالعان ازاماتتار ساتىپ الاتىن ءۇي ىزدەپ جاتىر», دەدى جانار ىزىمبەتوۆا.
بانكتىڭ وكىلى «وتباسى بانكتە» قازىر وسى ەكى باعدارلاما بارىنشا ءتيىمدى سانالاتىنىن ايتادى. «ناۋرىز» باعدارلاماسى ءالى دە بەس جىلعا سوزىلادى.
«ياعني بيىل كونكۋرستان وتپەي قالعاندار بولسا كوڭىل كۇيىن تۇسىرمەسىن. ولار العاشقى جارناعا قاجەتتى 10–20 پايىز اقشانى تاۋىپ, كەلەسى جولى ءوتىنىم بەرە الادى. ءبىز پورتالىمىزدا تۇرعان قۇرىلىس كومپانيالاردىڭ بارىمەن سەرىكتەسپىز. استانا جايىندا ايتاتىن بولساق, ونىڭ ىشىندە 83 نىسان بار. ياعني بۇل – 3300 پاتەر. ولاردىڭ كەيبىرەۋى پايدالانۋعا بەرىلگەن. سونىمەن بىرگە كەپىلدىكپەن سالىنىپ جاتقان ۇيلەر دە بار. بىزبەن سەرىكتەس كوپ كومپانيالار وسىندا كەلىپ وتىر», دەپ ءتۇيدى ءسوزىن جانار ىزىمبەتوۆا.
مۇنداي جارمەڭكەلەر الداعى ۋاقىتتا دا بولادى.