پەتروپاۆلدىڭ تۇبىندەگى زارەچنىي كەنتىنە اپاراتىن تاسجولدىڭ ۇستىنە سۋ شىعىپ كەتكەنىن بۇرىن ايتقانبىز. قازىر كەنت ارالدا قالىپ, وعان قاتىناس تەك قايىقپەن عانا جاسالۋدا, دەپ حابارلايدى Egemen.kz.
كەشە كەشكە وبلىس اكىمى عاۋەز نۇرمۇحامبەتوۆ كەنتكە قايىقپەن بارىپ, جاعدايدى ءوز كوزىمەن كورىپ, تۇرعىندارمەن كەزدەستى. قازىر جاعداي ءبىرشاما تۇراقتى, ۇيلەرگە سۋ كىرگەن جوق, ۇيىلگەن بوگەتتەردىڭ بيىكتىگى ۇيمەن بىردەي. دامبانى قۇم سالىنعان قاپشىقتارمەن بەكىتۋدە ءالى دە 200-دەي ادام ءجۇر.
الايدا, جىل سايىن تاسقىنمەن الىسىپ, تۇرعىنداردى قاۋىپتە قالدىرا بەرۋگە بولمايتىنى كورىنىپ تۇر. وسىعان بايلانىستى اكىم ءوزىنىڭ الەۋمەتتىك جەلىدەگى پاراقشاسىنا: «بۇل پروبلەما جۇيەلى تۇردە بولايىن دەپ تۇر. ونى شەشۋ ءۇشىن تۇرعىنداردى قاۋىپسىز جەرگە كوشىرۋ كەرەك دەپ شەشىپ وتىرمىز. قازىردىڭ وزىندە ەكى قاباتتى جايلى پاتەرلى 2 ءۇي سالۋدى قولعا الدىق. سول ۇيلەرگە زارەچنىي كەنتىنىڭ تۇرعىندارىن جىلدىڭ اياعىنا دەيىن كوشىرەتىن بولامىز», دەپ جازدى.