وتكەن جىلعى قاراشادا امەريكا جەرىندە تۇڭعىش رەت قازاقتار اراسىندا ۇيىمداستىرىلعان فۋتبول ءتۋرنيرى – Qazaq Unity Cup ءساتتى ءوتتى. ءىس-شارا كاليفورنيا شتاتىنداعى يرۆاين قالاسىندا ۇيىمداستىرىلدى, دەپ حابارلايدى Egemen.kz.
تۋرنيرگە لوس-اندجەلەس, سان-ديەگو, ساكرامەنتو, سان-حوسە, حيۋستون, چيكاگو جانە لاس-ۆەگاستان كەلگەن قازاق كوماندالارى قاتىستى. جارىس ءبىر كۇنگە سوزىلىپ, قاتىسۋشىلار مەن جانكۇيەرلەر اراسىندا جاقسى اسەر قالدىردى.
ايتارلىعى, يگى شارا اقش-تاعى قازاق دياسپوراسى ءۇشىن تەك سپورتتىق جارىس قانا ەمەس, سونىمەن قاتار جاڭا دوستىق بايلانىس ورناتۋ, ورتاق قۇندىلىقتى ءبولىسۋ مەن ۇلتتىق بىرەگەيلىكتى ساقتاۋ جولىنداعى ۇلكەن قادام بولدى. Qazaq Unity Cup-تىڭ الداعى جىلدارى ءداستۇرلى تۇردە وتەتىنى جوسپارلانىپ وتىر.
ەلدەگى ءىستىڭ شەتەلدەگى جالعاسى
شالعايداعى وتانداستاردىڭ باسىن قوسىپ, سپورتقا باۋلىپ جۇرگەن Unity Leagues كومپانياسىنىڭ نەگىزىن قالاۋشى تالعات توقبەرگەن دەگەن ازامات. ول وڭتۇستىك كاليفورنيادا اۋەسقوي سپورتشىلارعا ارنالعان ليگا مەن تۋرنيرلەر ۇيىمداستىرۋمەن اينالىسادى.
بۇل ىستە تالعاتتىڭ تاجىريبەسى مول. 2014 جىلى الماتى قالاسىندا Unity League اتتى العاشقى اۋەسقوي فۋتبول ليگاسىن قۇردى. بۇل جوبا ءساتتى ىسكە اسىپ, ءالى كۇنگە دەيىن جۇمىس ىستەپ كەلەدى. كەيىنىرەك استانادا «بىرلىك ليگاسىن» اشۋعا كومەكتەسىپ, ونىڭ دامۋىنا زور ۇلەس قوستى. ال 2016 جىلى استانا, قاراعاندى, شىمكەنت, قىزىلوردا مەن الماتى قالالارىنان جينالعان كوماندالار اراسىندا جالپىقازاقستاندىق فۋتبول ليگاسىن ۇيىمداستىردى. ءاربىر ىزگى ءىسى تالعاتتىڭ سان قىرلى قابىلەتىن شىڭداپ, بولاشاق جوبالارىنا بەرىك ىرگەتاس قالادى.
جىلدىڭ جاقسى جوسپارى
بيىل Unity Leagues جاڭا جوبالار ارقىلى ءوز كەڭىستىگىن كەڭەيتۋدى كوزدەپ وتىر. كومپانيا الداعى مامىر ايىندا اۋەسقوي ويىنشىلار اراسىندا ۆولەيبولدان تۋرنير وتكىزەدى. جازدا اپتالىق فورماتتاعى تۇراقتى ميني-فۋتبول ليگاسىن اشادى. سونداي-اق جىلدىڭ ەكىنشى جارتىسىندا اقش-تىڭ باسقا شتاتتارىندا Unity Leagues فيليالدارىن قۇرۋدى جوسپارلاپ وتىر. بۇل ارقىلى كومپانيا وزگە ايماقتارداعى اۋەسقوي سپورت سۇيەر قاۋىمدى بىرىكتىرۋدى كوزدەيدى.
بىرلىككە ۇندەيتىن ۇلگىلى ءىس
نەگىزى تالعات توقبەرگەننىڭ باستامالارى تەك سپورتپەن شەكتەلمەيدى. ول اقش-تاعى قازاق جاستارىن, وتباسىلارىن جانە جالپى قاۋىمدى بىرىكتىرۋگە باعىتتالعان اۋقىمدى يدەيالاردى جۇزەگە اسىرىپ ءجۇر. سپورت – ادامداردى جاقىنداستىراتىن, دوستىقتى نىعايتاتىن, ءارى ۇلتتىق رۋحتى ساقتاپ قالۋعا سەپ بولاتىن كۇشتى قۇرال. Qazaq Unity Cup پەن الداعى Unity Leagues جوبالارى وسىنىڭ جارقىن دالەلى.
25 ءساۋىر – قازاقستان فۋتبولى كۇنى
2002 جىلى ءدال وسى كۇنى ەلىمىز ۋەفا-عا تولىققاندى مۇشە بولىپ قابىلداندى. بۇل وتاندىق فۋتبول ءۇشىن جاڭا كەزەڭنىڭ باستاماسى بولدى. سودان بەرى ەل فۋتبولى ەۋروپالىق دەڭگەيدە دامۋعا ۇمتىلىپ كەلەدى.