مەملەكەت باسشىسىنىڭ تاپسىرماسى اياسىندا ەلىمىزدە زاڭسىز يەمدەلگەن اكتيۆتەر ەسەبىنەن الەۋمەتتىك ماڭىزى بار نىسانداردى سالۋ جوبالارى ىسكە اسىرىلىپ جاتىر. وسى باعىتتا اقتوبە وبلىسىندا مەديتسينالىق مەكەمەلەردىڭ قۇرىلىسىنا ارناۋلى مەملەكەتتىك قوردان شامامەن 1,4 ملرد تەڭگە ءبولىندى.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ شەڭبەرىندە بىرقاتار باستاما كوتەرىلدى. قايتارىلعان قاراجات 11 مەديتسينالىق, فەلدشەرلىك-اكۋشەرلىك پۋنكت, سونداي-اق دارىگەرلىك امبۋلاتوريانىڭ قۇرىلىسىن قارجىلاندىرادى. جوسپارعا سايكەس, بيىل اقتوبە وبلىسىنىڭ بىرنەشە اۋدانىندا جاڭا مەديتسينالىق نىساندار سالىنادى. اتاپ ايتقاندا, ىرعىز اۋدانىنىڭ نۇرا اۋىلىندا, بايعانين اۋدانىنىڭ نوعايتى اۋىلىندا فەلدشەرلىك-اكۋشەرلىك پۋنكتتەر بوي كوتەرەدى. سونىمەن قاتار شالقار اۋدانىنىڭ شوقىسۋ, سارىساي, توعىز اۋىلدارىندا, مۇعالجار اۋدانىنىڭ جارىق اۋىلىندا, قوبدا اۋدانىنىڭ بەگالى اۋىلىندا, ىرعىز اۋدانىنىڭ جارما اۋىلىندا مەديتسينالىق پۋنكتتەر اشىلادى.
– قازىر جارىق اۋىلىندا جاس مامان رەتىندە جۇمىس ىستەپ جاتىرمىن, مۋزىكا پانىنەن ساباق بەرەمىن. اۋىلدا كوپتەگەن وزگەرىس بولىپ جاتىر: بالالارعا ارنالعان ويىن الاڭى سالىنۋدا, سونىمەن قاتار كوپتەن كۇتكەن جاڭالىق, اۋىلىمىزعا گاز كەلدى, تۇرعىنداردىڭ قۋانىشىندا شەك جوق. بۇدان باسقا, مەديتسينالىق پۋنكت سالۋ جوسپارلانىپ جاتىر. ول مۇمكىندىگىنشە تەزىرەك پايدالانۋعا بەرىلەدى دەپ ۇمىتتەنەمىز, – دەدى مۇعالجار اۋدانى جارىق اۋىلىنىڭ تۇرعىنى قۋانىش ءنۇرسات.
دارىگەرلىك امبۋلاتوريالار مۇعالجار اۋدانىنىڭ قايىڭدى, مۇعالجار اۋىلدارىندا, العا اۋدانىنىڭ مارجانبۇلاق اۋىلىندا سالىنباق. بۇل مەكەمەلەردىڭ بارلىعى تاۋلىگىنە 25-45 كەلۋشىگە قىزمەت كورسەتۋگە ەسەپتەلگەن. بۇل ءوز كەزەگىندە جەرگىلىكتى تۇرعىندارعا ساپالى مەديتسينالىق قىزمەتتىڭ جوعارى قولجەتىمدىلىگىن قامتاماسىز ەتەدى.
– بىلتىر ءبىزدىڭ اۋىلدا اسفالت توسەلىپ, جولدار سالىندى. اۋىلدا مەديتسينالىق پۋنكتتىڭ قۇرىلىسى دا جۇرگىزىلىپ جاتىر. جالپى, مۇنداي الەۋمەتتىك نىساندار بارلىق ەلدى مەكەنگە قاجەت. بۇرىن مەديتسينالىق قىزمەت الۋ ءۇشىن كورشىلەس بەرشۇگىر اۋىلىنا بارۋعا تۋرا كەلەتىن, ەندى مۇنداي مەديتسينالىق پۋنكت ءبىزدىڭ اۋىلدا دا اشىلادى. ول بيىل ىسكە قوسىلادى. اۋىلىمىزدىڭ اتىنان وسى جۇمىستى ۇيىمداستىراتىن جانە وعان قاتىساتىن ازاماتتارعا زور العىسىمىزدى بىلدىرەمىز, – دەدى شالقار اۋدانى سارىساي اۋىلىنىڭ تۇرعىنى نۇرلان ورازوۆ.
اقتوبە وبلىسىنداعى مەديتسينالىق مەكەمەلەردىڭ قۇرىلىسىن جۇزەگە اسىرۋ – الەۋمەتتىك جاعدايدى جاقسارتۋعا, سونداي-اق تۇرعىندار ءۇشىن دەنساۋلىق ساقتاۋ سالاسىنىڭ قولجەتىمدىلىگىن ارتتىرۋعا باعىتتالعان ماڭىزدى قادام.