سەناتور بيبىگۇل جەكسەنباي دەپۋتاتتىق ساۋالىندا ءداستۇرلى ەمەس مەديتسينا سالاسىنا بايلانىستى وزەكتى ماسەلە كوتەردى, دەپ جازادى Egemen.kz.
دەپۋتاتتىڭ ايتۋىنشا ءداستۇرلى ەمەس مەديتسينا سالاسىن ناقتى زاڭنامالىق رەتتەۋدىڭ بولماۋى – جاقسى ەمەس, بۇل – ارناۋلى مەديتسينالىق ءبىلىمى جوق ادامداردىڭ ەمدەۋ ىسىنە ارالاسۋىنا جول اشىپ, كورسەتىلەتىن قىزمەت ساپاسىن تومەندەتەدى, ءتىپتى, پاتسيەنتتەردىڭ دەنساۋلىعىنا قاۋىپ توندىرەدى.
«دالەلدەنبەگەن, ياكي دەنساۋلىققا قاۋىپتى ەمدەۋ ادىستەرى تالاي كەسەلدى اسقىندىرىپ, قايعىلى جاعدايلارعا دۋشار ەتۋى مۇمكىن. باقىلاۋ مەن جاۋاپكەرشىلىك تەتىكتەرىنىڭ جوقتىعى: پاتسيەنتكە زيان كەلتىرگەن جاعدايدا, جاۋاپكەرشىلىككە تارتۋ جانە زارداپ شەككەندەردىڭ قۇقىقتارىن قورعاۋ ءۇشىن ناقتى مەحانيزمدەر جوق», دەدى سەناتور.
سەناتور ءوز سوزىندە قازاقستاندا ءداستۇرلى ەمەس مەديتسينالىق قىزمەتتى رەتتەيتىن نورمالار 2006 جىلى جويىلعاننان كەيىن بۇل سالا قۇقىقتىق كەڭىستىكتەن مۇلدە تىس قالعانىن اتاپ ءوتتى.
«قر-ندا پاتسيەنتتەردىڭ قاۋىپسىزدىگىن قامتاماسىز ەتۋ جانە ءداستۇرلى ەمەس مەديتسينا سالاسىنداعى قىزمەتتەردىڭ ساپاسىن ارتتىرۋ ءۇشىن وسى سالانى زاڭنامالىق رەتتەۋ شارالارىن قابىلداۋدى قاراستىرۋ; ليتسەنزيالاۋ جانە سەرتيفيكاتتاۋ جۇيەسىن ەنگىزۋ, دالەلدەرگە نەگىزدەلگەن رۇقسات ەتىلگەن ادىستەر مەن پراكتيكالاردىڭ ءتىزىلىمىن جاساۋ كەرەك. بۇل ازاماتتاردىڭ دەنساۋلىعىن قورعاۋعا, كورسەتىلەتىن قىزمەتتەردىڭ ساپاسىن ارتتىرۋعا جانە ءتيىمدى ءارى قاۋىپسىز ءداستۇرلى ەمەس مەديتسينا ادىستەرىن كولەڭكەلى ايماقتان شىعارۋعا مۇمكىندىك بەرەدى», دەپ تۇيىندەدى سەنات دەپۋتاتى بيبىگۇل جەكسەنباي.