اسسامبلەيا جانىنداعى جاستار قوزعالىسىنا بيىل – 10 جىل. وسى ونجىلدىق ىشىندە ءتۇرلى ەتنوس وكىلدەرى بىرىگىپ, ەل بىرلىگىنىڭ تىرەگىنە اينالعان جاستار ۇيىمى ەلىمىزدىڭ قوعامدىق-ساياسي ءومىرىنىڭ بەلسەندى قوزعاۋشى كۇشىنە اينالدى. بۇل تۋرالى اسسامبلەيا جاستارى قوزعالىسىنىڭ بەلسەندى مۇشەسى, قازاقستان حالقى اسسامبلەياسى جۋرناليستەر كلۋبى توراعاسىنىڭ ورىنباسارى, روو «اسسامبلەيا جاستارى» پرەزيديۋمىنىڭ مۇشەسى اللا گاۆرينا ايتتى, دەپ جازادى Egemen.kz.
اللا گاۆرينانىڭ ايتۋىنشا, بۇگىندە «اسسامبلەيا جاستارى» – قۇرامىندا ون مىڭنان استام پاتريوت جاستى بىرىكتىرگەن قۋاتتى ۇيىم.
«جىلدار بويى اسسامبلەيا ءبىز ءۇشىن الەۋمەتتىك ليفت, ەلدىڭ تىنىس-تىرشىلىگىنە ەتەنە ارالاسۋدىڭ بىرەگەي پلاتفورماسى بولدى. 2021 جىلى قر پرەزيدەنتى ق.توقاەۆ بارلىق جاستار قۇرىلىمدارىن ءبىر ارناعا توعىستىرىپ, «اسسامبلەيا جاستارى» ۇيىمىن قۇرۋعا باستاماشى بولدى. قازىر ەلىمىزدىڭ بارلىق وڭىرىندە فيليالدار, 60-تان استام جەتەكشى وقۋ ورنىندا ستۋدەنتتىك اسسامبلەيالار جۇمىس جۇرگىزىپ وتىر», دەدى ول.
سونىمەن قاتار اللا گاۆرينا جاستاردىڭ قازىرگى تاڭدا ءماسليحاتتاردا, قوعامدىق كەڭەستەردە, كەڭەسشى قۇرىلىمداردا بەلسەندىلىك تانىتىپ جانە مەملەكەتتىك باسقارۋ ىسىنە تىكەلەي ارالاسىپ وتىرعانىن ايتتى. ولاردىڭ نازارىنداعى باستى جوبالار – «تازا قازاقستان», الەۋمەتتىك كەسەلدەرمەن كۇرەس, ۇلتتىق قۇندىلىقتاردى دارىپتەۋ مەن مەملەكەتتىك ءتىلدى مەڭگەرۋ.
اسسامبلەيا قۇرامىنداعى جاستار قازاق ءتىلىن ەركىن مەڭگەرىپ, وزگە ەتنوس وكىلدەرىنە دە ۇيرەتىپ ءجۇر. قازاق ءتىلىن ناسيحاتتاۋدا ەرەكشە اۆتورلىق ادىستەرىمەن تانىلعان ۆلاديسلاۆ تەن, ولگا سپيرينا, الينا كان, الەكساندرا مىسكينا سياقتى جاستار – بۇگىنگى تاڭدا قازاقتىلدى فرونتمەندەرگە اينالدى.
بىرلىك پەن شىعارماشىلىقتىڭ تاعى ءبىر كورىنىسى – «اسسامبلەيا قۇراماسى» كومانداسىنىڭ جەتىستىگى. ولار قازاقستان حالقى اسسامبلەياسىنىڭ 30 جىلدىق مەرەيتويى قارساڭىندا «جايدارمان» ۇلتتىق ليگاسىنىڭ جەڭىمپازى اتانىپ, جاستاردىڭ كرەاتيۆى مەن بىرلىگىن پاش ەتتى.
«بۇگىنگى تاڭدا ءتىلىمىز قازاقستاندىق ەتنوستار اراسىندا بەرىك ورنادى دەۋگە تولىق نەگىز بار. قازاق ءتىلىنىڭ ەتنوسارالىق تىلگە اينالۋىنىڭ اۋىلى الىس ەمەس.10 جىل بۇرىن ەتنوستار اراسىندا قازاق ءتىلدى سپيكەرلەر تاڭسىق بولسا, بۇگىندە ول – قالىپتى جاعداي. وسىلايشا, قازاق ءتىلىن ناسيحاتتاۋ مەنىڭ دە ومىرلىك ميسسياما اينالدى.قازىر ءبىزدىڭ الدىمىزدا قازاق ءتىلىن ۇيرەنۋ ماسەلەسى تۇرعان جوق. مەڭگەردىك, ويىمىزدى ەركىن جەتكىزە الامىز. جوعارىدا اتى اتالعان ارىپتەستەرىمنىڭ ماقساتى – وزگەلەرگە ءتىل ۇيرەنۋگە ىقپال ەتۋ», دەدى اللا گاۆرينا.
ونىڭ ايتۋىنشا, بۇگىنگى جاستار – ورتاق قۇندىلىقتاردى ۇستاناتىن, تاريحتى قۇرمەتتەيتىن, ءبىلىم مەن ەڭبەككە قۇشتار, ادىلەتتىلىك پەن مەيىرىمدىلىكتى تەمىرقازىق ەتكەن ۇرپاق. وسىلايشا, «ادال ازامات» يدەالى شىن مانىندە جۇزەگە اسا باستادى.
سونىمەن قاتار اللا گاۆرينا اسسامبلەيانىڭ 30 جىلدىعى اياسىندا ۇلتتىق بىرلىكتى نىعايتۋ جانە جاس بۋىننىڭ ازاماتتىق ساناسىن ارتتىرۋ ماقساتىندا «مەن قازاقستاندىقپىن» جانە «مەنىڭ كوگىلدىر تولقۇجاتىم» اتتى ءىرى جوبالار جۇزەگە اسىرىلىپ جاتقانىن اتاپ ءوتتى. سونداي-اق ول قازىرگى كۇردەلى گەوساياسي احۋالدا ەل ىشىندەگى تۇراقتىلىق پەن تىنىشتىقتى ساقتاۋ اسا ماڭىزدى ەكەنىن باسا ايتتى.
«جىلدار بويى اسسامبلەيانىڭ الدىڭعى اعا بۋىن وكىلدەرى ەلدىڭ ەگەمەندىگىن, تۇتاستىعى مەن بىرلىگىن ساقتاۋدا جانىن ايامادى. كەزەك بىزدە. ءبىز, اسسامبلەيادا ورنىققان تاجىريبەنىڭ ارقاسىندا وسى ميسسيانى جالعاستىرامىز», دەدى ول.
اللا گاۆرينا ءسوزىن قورىتىندىلاي كەلە, اسسامبلەيانىڭ نەگىزگى قىزمەتى – تاۋەلسىزدىكتى تۇعىرلى ەتۋ, ەلدىڭ تۇتاستىعى مەن ىشكى تۇراقتىلىعىن ساقتاۋ جانە بىرلىك پەن كەلىسىمدى نىعايتۋ بولىپ قالا بەرەتىنىن اتاپ ءوتتى.