ولجاس بەكتەنوۆ «سامۇرىق-قازىنا» ۇلتتىق ءال-اۋقات قورى» اق ديرەكتورلار كەڭەسىنىڭ وتىرىسىن وتكىزدى. قوردىڭ باسقارما توراعاسى نۇرلان جاقىپوۆتىڭ وندىرىستىك جانە قارجىلىق كورسەتكىشتەر تۋرالى ەسەبى تىڭدالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنىڭ باسىم ينفراقۇرىلىمدىق جوبالاردى جۇزەگە اسىرۋ جونىندەگى تاپسىرمالارىنىڭ ورىندالۋ بارىسى قارالدى. قور باسشىلىعى ەكونوميكانىڭ باسىم سالالارىنداعى جالپى سوماسى شامامەن 36,4 ترلن تەڭگەنى قۇرايتىن ينۆەستيتسيالىق 46 ءىرى جوبا تۋرالى باياندادى. بۇگىنگى تاڭدا «پوليەتيلەن ءوندىرىسى», كۇكىرت قىشقىلى زاۋىتى جانە «مويىنتى – قىزىلجار» تەمىرجول جەلىسى, جاڭاوزەن قالاسىنداعى گاز وڭدەۋ زاۋىتى, سونداي-اق «شۋ», «جامبىل», «شىمكەنت» قوسالقى ستانسالارىندا قازاقستان بەج وڭتۇستىك ايماعىنىڭ ەلەكتر جەلىسىن نىعايتۋ شەڭبەرىندە قۇرىلىس-مونتاجداۋ جۇمىستارى باستالدى.
نۇرلان جاقىپوۆتىڭ ايتۋىنشا, 2025 جىلدىڭ سوڭىنا دەيىن «دوستىق – مويىنتى» تەمىرجول جەلىسى, الماتى قالاسىن اينالىپ وتەتىن اينالما تەمىرجول جەلىسى, اقتاۋ پورتى بازاسىنداعى كونتەينەرلىك حاب, «تالدىقورعان – ءۇشارال» ماگيسترالدى گاز قۇبىرى, كەندىرلىدەگى سۋ تۇششىتۋ زاۋىتى سياقتى ينفراقۇرىلىمدىق نىسانداردى, سونداي-اق Caspi Bitum زاۋىتىن كەڭەيتۋ جانە پاۆلودار مۇناي-حيميا زاۋىتىندا ديزەل وتىنىن گيدروتازارتۋ قوندىرعىسىن رەكونسترۋكتسيالاۋ جوبالارىن اياقتاۋ جوسپارلانعان.
«سونىمەن قاتار وتاندىق تاۋار وندىرۋشىلەردى قولداۋ باعىتىندا اتقارىلىپ جاتقان جۇمىستارعا نازار اۋدارىلعان. قوردىڭ ساتىپ الۋ تارتىبىندە: تاۋارلاردى ءوتو-دەن ساتىپ الۋ باسىمدىعى, جۇمىستار مەن قىزمەتتەردى ورىنداۋ كەزىندە ءوتو-دەن تاۋارلاردى ساتىپ الۋ بويىنشا مەردىگەرلەر مەن قوسالقى مەردىگەرلىك ۇيىمداردىڭ مىندەتتەمەلەرى, سونداي-اق 16-دان استام قوسىمشا قولداۋ شارالارى كوزدەلگەن. اتالعان قولداۋ شارالارى شەڭبەرىندە قازاقستاندىق تاۋار وندىرۋشىلەرمەن جاسالعان كەلىسىمشارتتار سانىن 2024 جىلعى 1,1 ترلن تەڭگەدەن 2025 جىلى 1,4 ترلن تەڭگەگە دەيىن ارتتىرۋ جوسپارلانىپ وتىر. سونداي-اق «يمپورتتى الماستىرۋ» باعدارلاماسى بويىنشا «سامۇرىق-قازىنا» قورى وتكەن جىلى قازاقستاندىق كاسىپكەرلەرمەن 191 ملرد تەڭگەگە وفتەيك-كەلىسىمشارتتار جاسادى – بۇل 10 ەسە ءوسىم. كاسىپكەرلىكتى قولداۋ شارالارىنىڭ ءبىرى – skstore.kz ەلەكتروندىق دۇكەنى. پلاتفورمادا 13 مىڭنان استام شوب وكىلى جانە 500 وتاندىق تاۋار ءوندىرۋشى تىركەلگەن. 2024 جىلدىڭ قورىتىندىسى بويىنشا 14,6 ملرد تەڭگەگە 25 مىڭ تاپسىرىستى قۇراعان, بۇل وتكەن جىلمەن سالىستىرعاندا 7 ەسەگە كوپ», دەلىنگەن حابارلامادا.
پرەمەر-مينيستر «سامۇرىق-قازىنا» قورى باسشىلىعىنا جانە جاۋاپتى مينيسترلىكتەرگە جوبالاردىڭ قازاقستان ينفراقۇرىلىمىنا, ەنەرگەتيكاسىنا, كولىك لوگيستيكاسىنا, ونەركاسىپتىك جانە ەكونوميكالىق دامۋىنا مۋلتيپليكاتيۆتى اسەرىن ەسكەرە وتىرىپ, ولاردىڭ ۋاقتىلى جۇزەگە اسىرىلۋىن قامتاماسىز ەتۋدى تاپسىردى.