قارادالا حالقىنىڭ نەگىزگى كاسىبى – ورىك ءوسىرۋ. جەر-اناعا جىلۋ بويلاعان ءساۋىر ايىنىڭ ورتا شەنىنە تامان ءبۇر جارىپ, اينالاعا ايىرىقشا كورىك بەرەتىن ورىك اعاشتارىنان مول ءونىم الۋدىڭ قام-قارەكەتىنە شارۋالار بىلەك تۇرە كىرىسىپ كەتكەن. تالايلاردى تامسانتقان سارى ورىكتى بۇل ءوڭىردىڭ برەندى دەۋگە بولادى. جىل سايىن 500-دەن اسا شارۋا قوجالىعى وسىرگەن مىڭداعان توننا ءونىم ىشكى نارىقتى قامتاماسىز ەتىپ, الىس-جاقىن شەتەلگە دە جونەلتىلەدى.
«قازىر اۋداندا 4 300 گەكتار باق بار. 3 500 گەكتارى – شابدالى باعى, ونىڭ ىشىندە 2 350 گەكتارى جەمىس بەرەدى. وسى القاپتان جىلىنا 19-22 مىڭ تونناعا دەيىن ءونىم الامىز. دەنى ىشكى نارىققا جىبەرىلسە, 4 مىڭ تونناعا جۋىعى رەسەيگە ەكسپورتتالادى. جىلدان جىلعا شابدالى وسىرۋگە نيەتتەنۋشىلەر كوبەيىپ كەلەدى. سەبەبى سارى ورىككە سۇرانىس ەسەلەپ ارتىپ جاتىر», دەدى اۋىل شارۋاشىلىعى ءبولىمىنىڭ باس مامانى فارحات اقموللاەۆ.
وسى كۇنى ورىك القابىندا جەر جىرتىپ, توپىراق قوپسىتىپ, كوشەت وتىرعىزۋ جۇمىستارى قىزا تۇسكەن. باقتى بالاشا باپتاسا عانا مول ءونىم بەرەتىندىگىن العا تارتقان ديقاندار, ەرتە كوكتەمنەن باستاپ زيانكەستەرگە قارسى زالالسىزداندىرۋ مەن مينەرالدى تىڭايتقىشتار سەبۋ شارالارىن ۋاقتىلى اتقارۋعا جۇدىرىقتاي جۇمىلعان.
«شىرىنگۇل» شارۋا قوجالىعىنىڭ مەڭگەرۋشىسى سايدۋللا مۇقپۇلوۆتىڭ ايتۋىنشا, شارۋاشىلىقتا تۇقىمدىق تالىمباق بار. وندا وسىرىلگەن جوعارى ساپالى ءارى تاسىمالعا ءتوزىمدى «كراسنوششەكي» سورتىنىڭ كوشەتتەرى ءوز باقتارىندا وتىرعىزىلىپ, ارتىلعانى وزگە شارۋاشىلىقتارعا ساتىلادى ەكەن. تابىس كوزىنە اينالعان سارى ورىكتى جيناپ, تاسىمالداۋدا جاشىك تاپشىلىعىن جويۋدى ماقسات ەتكەن شارۋا قوجالىعىنىڭ يەسى 50 ملن تەڭگە ينۆەستيتسيا قۇيىپ, بيىلدان باستاپ پلاستيك جاشىك شىعارۋدى باستاپ كەتىپتى.
اۆات اۋىلىنا قاراستى «باحيت» شارۋا قوجالىعى بيىل دا مول ءونىم الۋدان ءۇمىتتى.
«بىلتىر شابدالى جاقسى ءونىم بەردى. تەك اۆات اۋىلىنىڭ وزىنەن 37 فۋرا جونەلتىلدى. باعاسى كيلوسىنا 250–300 تەڭگە شاماسىندا بولدى. بيىل ورىك اعاشتارى جاقسى گۇلدەدى. ەندى ۇسىك ۇرىپ كەتپەۋىن تىلەيمىز. ءبىر گەكتار باقتان ورتا ەسەپپەن 10–15 تونناعا دەيىن ءونىم الۋعا بولادى», دەيدى شارۋا قوجالىعىنىڭ جەتەكشىسى سايداحمەت مۇستافاەۆ.
الماتى وبلىسى