گارۆارد دۇيسەنبى كۇنى اقش-تىڭ فەدەرالدى سوتىنا دونالد ترامپ اكىمشىلىگىنە قارسى شاعىم ءتۇسىردى. اكىمشىلىك ۋنيۆەرسيتەتكە بولىنەتىن 2 ميلليارد دوللاردان استام قارجىنى توقتاتىپ قويعان, دەپ حابارلايدى Egemen.kz BBC-گە سىلتەمە جاساپ.
وتكەن اپتادا گارۆارد ۋنيۆەرسيتەتى دونالد ترامپ اكىمشىلىگىنىڭ بارلىق DEI (ارتۇرلىلىك, تەڭدىك جانە ينكليۋزيۆتىك) ساياساتىنا قاتىستى باعدارلامالاردى توقتاتۋ جانە كامپۋس اۋماعىندا ماسكا تاعۋعا تىيىم سالۋ تۋرالى تالاپتارىن قابىلداماي تاستاعان بولاتىن.
سونىڭ سالدارىنان بيلىك وكىلدەرى گارۆاردقا بۇرىن بولىنگەن 9 ميلليارد دوللاردىڭ ىشىنەن 2,2 ميللياردىن قىسقارتىپ تاستاپ, ۋنيۆەرسيتەتتى سالىق جەڭىلدىكتەرىنەن جانە شەتەلدىك ستۋدەنتتەردى قابىلداۋ مۇمكىندىگىنەن ايىرۋمەن قورقىتتى.
دونالد ترامپ پرەزيدەنتتىك قىزمەتىن باستاعالى بەرى ءبىلىم بەرۋ سالاسىنداعى سولشىل يدەولوگيا مەن انتيسەميتيزمگە قارسى كۇرەسىپ كەلەدى. ول گازاداعى قاقتىعىس باستالعاننان كەيىن كۇشەيگەن ستۋدەنتتىك كامپۋستارداعى جاپپاي انتي-يزرايلدىك نارازىلىقتاردى وسىنداي تەندەنتسيالاردىڭ كورىنىسى دەپ سانايدى.
ۇقساس تالاپتار مەن قارجىلىق توقتاتۋلار پرينستون مەن كولۋمبيا ۋنيۆەرسيتەتتەرى سەكىلدى باسقا دا جوعارى وقۋ ورىندارىنا باعىتتالعان. الايدا گارۆارد – بۇل ارەكەتتەرگە العاشقىلاردىڭ ءبىرى بولىپ سوت ارقىلى جاۋاپ قاتقان وقۋ ورنى.
ايتا كەتەيىك, گارۆارد – فەدەرالدى ۇكىمەتكە باعىنباي قويعان العاشقى ۋنيۆەرسيتەت. قازىر ول 2,2 ميلليارد دوللار كولەمىندەگى گرانت قارجىسىنىڭ توقتاتىلۋ قاۋپىمەن بەتپە-بەت كەلىپ وتىر.