«قازاقكونتسەرت» مەملەكەتتىك اكادەميالىق كونتسەرتتىك ۇيىمىندا I رەسپۋبليكالىق «سەرپەر» ۇلتتىق ونەر بايقاۋىنىڭ جەڭىمپازدارى انىقتالدى. ءىس-شارا قر مادەنيەت جانە اقپارات مينيسترلىگىنىڭ قولداۋىمەن ءوتتى, دەپ حابارلايدى Egemen.kz.
بايقاۋ ۇلتتىق ونەردى ۇلىقتاپ, جاس تالانتتاردى انىقتاپ, ءتول ونەردى دارىپتەۋگە باعىتتالعان. ونەر دوداسىنا 6 نوميناتسيا بويىنشا ەلىمىزدىڭ تۇكپىر-تۇكپىرىنەن 70-تەن استام ۇمىتكەردەن ءوتىنىم قابىلداندى.
بايقاۋدىڭ ءبىرىنشى كەزەڭى ونلاين فورماتتا ۇيىمداستىرىلىپ, قاتىسۋشىلاردىڭ بەينەماتەريالدارى ىرىكتەلىپ, 42 قاتىسۋشى ەكىنشى كەزەڭگە جولداما الدى. ۇمىتكەرلەر قازىلار القاسىنىڭ الدىندا ونەر كورسەتىپ, ءوز شەبەرلىكتەرىن پاش ەتتى. قازىلار شەشىمىمەن ءار اتالىمنان جۇزدەن جۇيرىك شىققان جاستار گالا-كونتسەرت اياسىندا ماراپاتتالدى.
قازىلار القاسىنىڭ شەشىمىنە سايكەس «دومبىرا» نوميناتسياسىنان ايشولپان قاسىموۆا, «قوبىز» نوميناتسياسىنان ايگەريم احمەتجانوۆا, «سىبىزعى» نوميناتسياسىنان اسلان گۋماروۆ, «شەرتەر» نوميناتسياسىنان ۋالي مۇراتقازين, «جەتىگەن» نوميناتسياسىنان ايگەرىم كارامەنوۆا, «پريما قوبىز» نوميناتسياسىنان اجار حۋان باس بايگە ەنشىلەدى. ال جارقىن شاكارىم اتىنداعى ارنايى ديپلوم ارون جۇبانعاليەۆكە بۇيىردى.