قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە, بۇگىندە KMF پەن «BNK Finance Kazakhstan» كومپانيالارىنا ەكىنشى دەڭگەيلى بانك رەتىندە قايتا قۇرىلۋعا رەسمي رۇقسات بەرىلدى. بۇل تۋرالى اگەنتتىك جاڭا بانك زاڭناماسىن تانىستىرۋ بارىسىندا حابارلادى.
اگەنتتىك ۇسىنعان زاڭ جوباسىنداعى باستى وزگەرىستەردىڭ ءبىرى – بانكتەردىڭ جارعىلىق كاپيتالىنا قويىلاتىن تالاپتى 20 ملرد تەڭگەدەن 10 ملرد تەڭگەگە دەيىن تومەندەتۋ. باستاما بانك سەكتورىنىڭ اشىقتىعىن ارتتىرىپ, جاڭا ويىنشىلاردىڭ, اسىرەسە ميكروقارجى ۇيىمدارىنىڭ نارىققا كىرۋىنە مۇمكىندىك بەرەدى.
قازىر ەلىمىزدە كاپيتالى 10 ملرد تەڭگەدەن اساتىن 12 ميكروقارجى ۇيىمى بار. ولاردىڭ ىشىندە KMF – نارىق كوشباسشىسى. ونىڭ كاپيتالى 336 ملرد تەڭگەگە جەتسە, «BNK Finance Kazakhstan» 24 ملرد تەڭگەدەن جوعارى كورسەتكىشكە يە. سونىمەن قاتار «Toyota Financial Services Kazakhstan» (257 ملرد), «MyCar Finance» (173 ملرد) جانە «OnlineKazFinance» (130 ملرد) سەكىلدى ءىرى ويىنشىلار دا بار. ال كاپيتالى 10 ملرد تەڭگەدەن تومەن ۇيىمداردىڭ سانى – 62.