كۇن وتكەن سايىن الماتىنىڭ تورىندەگى كوكتوبە كوركەيىپ, بيىگىنە كوتەرىلگەندەردى عاجايىپ سەزىمگە بولەيتىن تانىمال نىسانعا اينالىپ كەلەدى. جاقىندا عانا پايدالانۋعا بەرىلگەن, توبەگە اپاراتىن سونى سوقپاقتار جۇرتتان وڭ باعاسىن الىپ, بۇل مەكەندە سەرۋەندەۋ بۇرىنعىدان دا جايلى ءارى مازمۇندى بولا ءتۇستى.
بىتكەن ىسكە مۇرىندىق بولعان دا الماتىلىقتاردىڭ ءوزى. قالا بيلىگى تۇرعىنداردىڭ كوكتوبەگە قاتىستى وتىنىشتەرىن ەسكەرە وتىرىپ, 2023 جىلدىڭ قازان ايىندا جەكە ينۆەستيتسيا ەسەبىنەن ۇزىندىعى 1,2 شاقىرىم بولاتىن, جاياۋ جۇرگىنشىلەرگە ارنالعان «دەنساۋلىق جولىنىڭ» قۇرىلىسىن باستاعان ەدى. سەبەبى بۇرىن ساياباققا جاياۋ بارۋ اجەپتاۋىر قيىندىق تۋعىزاتىن. «دەنساۋلىق جولىنىڭ» ىسكە قوسىلۋى تۋريستەردىڭ دە كوڭىلىنەن شىعىپ وتىر. كۇن سايىن بۇل سوقپاقپەن 10 مىڭداي ادام كوكتوبەگە كوتەرىلەدى.
الماتى تۇرعىندارى مەن قوناقتارى ەندى كوكتوبەگە جاياۋ كوتەرىلىپ, تاۋلار مەن اينالاداعى تابيعاتتىڭ تاڭعاجايىپ كورىنىستەرىن تاماشالاي الادى. بۇرىن جاياۋ جۇرگىنشىلەر جولى اۆتوكولىكتەر توقتامايتىن جولدى قيىپ وتەتىن بولعاندىقتان, قولايسىز ءارى قاۋىپتى ەدى. جاڭا سوقپاق – وتە ىڭعايلى, دەنساۋلىققا دا پايدالى. قالا تۇرعىندارى مۇندا ءجيى كەلەدى, جاڭا سوقپاقتار سكانديناۆيالىق سەرۋەندەۋگە دە بارىنشا قولايلى. جولدىڭ ونە بويىنا جارىق ورناتىلعان, بەينەباقىلاۋ, ورىندىقتار, قوقىس جاشىكتەرىمەن جابدىقتالعان. سونىمەن بىرگە دەمالۋشىلارعا اسقار الاتاۋدىڭ, كوكتوبەنىڭ كوركەم بەتكەيلەرىنە, الماتىنىڭ كەلبەتىنە كەڭىنەن قارايتىن, كوز سۋاراتىن بىرنەشە باقىلاۋ الاڭى قاراستىرىلعان. الاڭداردى اباتتاندىرۋ بيىل 1 مامىرعا دەيىن اياقتالادى.
«بۇگىندە نەگىزگى قۇرىلىس جۇمىستارى تياناقتالدى. جاقىن ارادا ىرگەلەس اۋماقتاردى اباتتاندىرۋ باستالادى. الماتى قالاسىنىڭ اكىمى ەربولات دوساەۆتىڭ تاپسىرماسىمەن, تۇرعىنداردىڭ وتىنىشتەرى قاناعاتتاندىرىلىپ, كەلۋشىلەرگە قولايلى جاعداي جاسالدى. مۇندا دەمالۋشىلار ەندى ەركىن سەيىل-سەرۋەن قۇرا الادى», دەيدى «كوكتوبە» ساياباعىنىڭ وكىلى فارحاد ءۋالي.
كوكتوبە ساياباعىنا جىل سايىن 600 مىڭداي ادامنىڭ تابانى تيەدى. ونىڭ باستاپقى نۇكتەسى – ورتالىق ازياداعى ەڭ العاشقى, 1967 جىلى پايدالانۋعا بەرىلگەن, جالپى ۇزىندىعى 1620 مەتر, 17 گوندولالىق كابيناسى بار قايتالانباس اسپالى جول ەكەن بەلگىلى. التى مينۋتتا جوعارىعا الىپ باراتىن كابينالاردان دا كەرەمەت كورىنىستەردى تاماشالاۋعا بولادى.
الماتى