قر عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى مەن ش.شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىعى مەملەكەتتىك ورگاندار مەن ۇلتتىق كومپانيالاردىڭ رەسمي ينتەرنەت-رەسۋرستارىندا قازاق ءتىلىنىڭ قولدانىسىنا مونيتورينگ جۇرگىزۋ بويىنشا رەسپۋبليكالىق ونلاين/وفلاين سەمينارىن وتكىزدى, دەپ جازادى Egemen.kz.
سەميناردا مەملەكەتتىك ءتىلدىڭ قولدانىس اياسىن كەڭەيتۋ, رەسمي ينتەرنەت-رەسۋرستارداعى جىل سايىنعى مونيتورينگ جۇرگىزۋ ماسەلەلەرى قارالدى. سەمينار بارىسىندا ءباسپاسوز قىزمەتتەرىنىڭ وكىلدەرى, اقپاراتتىق رەسۋرستاردىڭ مازمۇنىنا جاۋاپتى تۇلعالار, اۋدارماشىلار بۇل ءىس-شارانىڭ رەسمي رەسۋرستاردىڭ ساپالى تولتىرىلۋىنا, ازاماتتاردىڭ مەملەكەتتىك تىلدەگى اقپاراتقا قول جەتىمدىلىگىن قامتاماسىز ەتۋگە ىقپال ەتەتىندىگىنە سەنىم ءبىلدىردى.
جيىندا كىرىسپە ءسوز سويلەگەن قر عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ باسقارما باسشىسى قايىرجان راحىمجانوۆ بۇل جوبانىڭ قازاقستان رەسپۋبليكاسىنداعى ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداماسىن ىسكە اسىرۋ شەڭبەرىندە وتەتىنىن جەتكىزدى. ساراپتاما-مونيتورينگ ولشەمشارتتارى "قازاقستان رەسپۋبليكاسىنداعى ءتىل تۋرالى", "اقپاراتقا قول جەتكىزۋ تۋرالى" قازاقستان رەسپۋبليكاسى زاڭدارىنىڭ تالاپتارىنا ساي نەگىزدەلگەنىن ايتتى.
مونيتورينگ بارىسىندا رەسمي سايتتىڭ مەملەكەتتىك تىلدە اشىلۋى, ونىڭ تولىققاندى, ساپالى ءارى ساۋاتتى ماتىندەرمەن تولتىرىلۋى باستى نازارعا الىنىپ, ۇيىم تۋرالى اقپاراتتىڭ, بايلانىس دەرەكتەرىنىڭ, رەسمي قۇجاتتاردىڭ, قاۋلىلاردىڭ, بۇيرىقتاردىڭ, جاڭالىقتاردىڭ, ءباسپاسوز رەليزدەرىنىڭ, ينفوگرافيكالاردىڭ, جارنامالىق بانەرلەردىڭ, باسقا دا مالىمەتتەردىڭ بەكىتىلگەن ولشەمشارتتارعا ساي جاريالانۋى زەردەلەنەدى.