ءابىلحان قاستەەۆ اتىنداعى مەملەكەتتىك ونەر مۋزەيىندە بەلگىلى قولونەر شەبەرى, سۋرەتشى تۇرباي مۇراتبەكتىڭ «ساعىنىشتىڭ ءتۇسى» اتتى جەكە كورمەسى اشىلدى. ەكسپوزيتسيادا 40-تان استام ينەمەن كەستەلەنگەن جۇمىس ۇسىنىلدى.
سۋرەتشى تۋىندىنىڭ قۇرىلىمى مەن تۇستىك ءتۇزىلىمىن ءتۇرلى ءتۇستى جىپتەر ارقىلى ويناتىپ, كەسكىندەمەلىك جولاقتار مەن كەسكىندەردى اسا دالدىكپەن كەستە ارقىلى كورسەتەدى. جالپى, سۋرەتشىنىڭ كورمەگە قويىلعان جۇمىستارىنان – ءتۇستىڭ قانىقتىعى, قۇرىلىمنىڭ ناقتىلىعى بايقالادى. اۆتور تۋىندىلارىنىڭ تاعى ءبىر ەرەكشەلىگى – ءداستۇرلى ويۋ-ورنەكتەردى شەبەر قولدانۋى.
كوركەمونەردىڭ ىشىندە بالالىق شاققا ارنالعان تاقىرىپتار دا بار. ول ءوز ەڭبەكتەرىندە اۋىلدىڭ بەيقام ءومىرىن, بالا كوڭىلدىڭ تازالىعىن, جان دۇنيەنىڭ تىنىشتىعى مەن ساعىنىش لەبىن كوركەم شەبەرلىكپەن جەتكىزگەن.
كورمە 4 مامىرعا دەيىن جالعاسادى.