ەل تاۋەلسىزدىگىن العالى جاستاردى جۇمىسپەن قامتۋدى ۇيلەستىرۋ ۇزدىكسىز جۇرگىزىلىپ كەلەدى. وسى ماقساتتا ىسكە قوسىلعان «Joltap» جوباسى استانالىقتاردىڭ جاڭا سالالاردى مەڭگەرۋىنە جانە تابىسىن ارتتىرۋعا كومەكتەسىپ ءجۇر. بۇگىندە ىلكىمدى باستامانىڭ يگىلىگىن كورگەندەر 9 مىڭنان استى.
جوبا اياسىندا ەڭبەككە ارالاسقانداردىڭ قاتارىندا گۇلشارا تۇرقايداروۆا دا بار. ول قىسقا ۋاقىت ىشىندە تىگىنشىلىك پەن ديزاينەرلىك كۋرسىن ءساتتى اياقتاپ, سەرتيفيكات الدى. ىزىنشە ەلورداداعى فابريكالاردىڭ بىرىنە جۇمىسقا ورنالاستى.
– بالا كەزدەن تىگىن تىگۋدى جاقسى كورەمىن. «Joltap» جوباسىن ەستىگەن كەزدە, بىردەن باعىمدى سىناپ كورگىم كەلدى. استاناداعى مودۋلدىك پۋنكتكە بارىپ, كۋرسقا جازىلدىم. كوپ ۇزاماي وقۋىم دا باستالدى. بارلىعى جوعارى دەڭگەيدە ۇيىمداستىرىلعان. ۇستازدارىمىز – فاريدا ارىستانقىزى مەن انار تولەگەنقىزىنا ەرەكشە العىس ايتقىم كەلەدى. ولار بۇگە-شۇگەسىنە دەيىن ءتۇسىندىرىپ, دەمەپ, قولداۋ كورسەتتى, – دەيدى گ.تۇرقايداروۆا.
باعدارلامانىڭ تاعى ءبىر تۇلەگى – ايناش تىلەۋحانوۆا. ول بىرنەشە كۋرستى اياقتاپ, بۇگىندە يگەرگەن داعدىلارىن قوناقتارعا ارنالعان جيھازدى جالعا بەرۋ بيزنەسىن دامىتۋ ءۇشىن قولدانىپ جاتىر.
– ۇيدە, مەيرامحانالاردا بولاتىن وتباسىلىق توي جانە باسقا دا مەرەكەلىك ءىس-شارالارعا جيھاز, ىدىس-اياقتاردى جالعا بەرەمىن. Joltap جوباسى كومەگىمەن موبيلوگرافيا, SMM, ۆيدەومونتاج, گرافيكالىق ديزاين جانە Kaspi ارقىلى ساۋدا جاساۋدىڭ نەگىزدەرىن تەگىن وقىدىم. قازىر كاسىبىمنىڭ پاراقشاسىن ءوزىم جۇرگىزەمىن, نەشە ءتۇرلى كونتەنت جاسايمىن. ناتيجەسىندە تابىسىمدى ەسەلەدىم, – دەيدى جوبا قاتىسۋشىسى.
جالپى الەۋمەتتىك جوبا مەملەكەت باسشىسىنىڭ تاپسىرمالارىن ورىنداۋ ماقساتىندا استانا قالاسى اكىمدىگىنىڭ باستاماسى ىسكە اسىرىلىپ جاتىر. بۇعان جۇمىسسىز ازاماتتار, تاجىريبەسى مەن ءبىلىم-بىلىگى جوق NEET ساناتىنداعى جاستار, اۋىل-ايماقتان جاڭادان كوشىپ كەلگەن ازاماتتار جانە تابىسىن ارتتىرۋعا مۇددەلى جاندار قاتىسا الادى. ولارعا مۇندا مەملەكەتتىك قولداۋ شارالارى جونىنەن كەڭەس بەرىلەدى جانە 17 جۇمىسشى جانە تسيفرلىق ماماندىق بويىنشا قىسقا مەرزىمدى وقۋدان وتۋگە مۇمكىندىك بار.