2006 جىلى گەرمانيانىڭ ميۋنستەر قالاسىنداعى اازەە اتتى سۋ قويماسىندا تاڭقالارلىق وقيعا بولدى. «مۋزەي فاكتوۆ» سايتىنىڭ مالىمەتىنشە, مۇندا مەكەندەيتىن پەترا ەسىمدى قارا اققۋ ءوز تۇرىندەگى اتالىققا ەمەس, اققۋ پىشىنىندە جاسالعان اق كاتامارانعا عاشىق بولىپتى.
كاتاماران تۋريستەردى سەرۋەندەتۋگە ارنالعان قاراپايىم سۋ كولىگى بولاتىن. الايدا ول سىرت كوزگە اققۋعا ۇقساس ەتىپ جاسالعاندىقتان, پەترا ونى ءتىرى دەپ قابىلداعان. ءبىر قىزىعى, قارا اققۋ كاتاماراننىڭ قاسىنان ءبىر ەلى الىستاماعان. مەيلى ءجۇزىپ جۇرگەندە دە, مەيلى جاعادا تۇرعان ساتتە دە. ءتىپتى كاتامارانعا جاقىنداماق بولعان ادامدارعا ىزالانىپ, ولاردى قۋىپ تاستاۋعا تىرىسقان ەكەن.
قىس تۇسكەن كەزدە سۋ قويماسى قاتىپ قالعاندىقتان, جەرگىلىكتى بيلىك پەترا مەن كاتاماراندى ميۋنستەر زووباعىنا اۋىستىرىپتى. ونداعى ماماندار پەترانى باسقا اققۋلارمەن تانىستىرىپ, جۇپتاستىرۋعا تىرىسقانىمەن قارا اققۋ ولاردىڭ ەشبىرىنە نازار اۋدارماعان.
كەلەر جىلى قوس «عاشىق» قايتادان وزەنگە ورالادى. بىراق كەيىننەن ول كوزدەن تاسا بولىپ كەتەدى. ورنيتولوگتار ونى ۇزاق ىزدەپ, ابدەن ابىگەرگە تۇسەدى. تەك 2013 جىلى پەترا وتە السىرەگەن كۇيدە تابىلىپ, زووباقتا ەم الىپ, كۇتىمگە الىندى. بۇل جولى ساتتىلىك سەرىك بولىپ, وعان ءتىرى اققۋلار اراسىنان جۇپ تابىلادى. ەندى ونىڭ ماحاببات جولىنداعى اۋىر دا قىزىققا تولى حيكاياسى جۇرتقا ەرتەگىدەي ەستىلەتىن بولدى.
ادەتتە قوس عاشىققا اققۋدىڭ ماحابباتىن تىلەپ جاتامىز. مىنەكەي, ولاردىڭ اراسىندا وسىنداي دا ماحاببات بولادى ەكەن...