تجم ءورت قاۋپى جوعارى كەزەڭنىڭ باستالۋىنا بايلانىستى ازاماتتاردى قاۋىپسىزدىك شارالارىن ساقتاۋعا شاقىرادى. ۇكىمەت وتىرىسىنىڭ قورىتىندىسى بويىنشا ءباسپاسوز ءماسليحاتىندا توتەنشە جاعدايلار ۆيتسە-ءمينيسترى كەگەن تۇرسىنباەۆ ەل ازاماتتارىنا وسىنداي ۇندەۋ جاسادى, دەپ حابارلايدى Egemen.kz.
ك. تۇرسىنباەۆ قازىرگى كەزدەگى قۇرعاق اۋا رايىن مەن تەمپەراتۋرانىڭ جوعارى بولۋى ورمانداردا, دالادا, ساياجايلاردا جانە ەلدى مەكەندەر ماڭىندا ءورت قاۋپىن ايتارلىقتاي ارتتىراتىنىن اتاپ ءوتتى.
«قايعىلى وقيعالاردىڭ الدىن الۋ ءۇشىن قاراپايىم ەرەجەلەردى ساقتاۋ قاجەت. ەڭ الدىمەن, ءاربىر ازاماتىمىز تابيعات اياسىندا جانە تۇرعىن ۇيلەردىڭ جانىنا جاقىن جەردە وت جاقپاسىن, قۇرعاق شوپتەردى, قوقىستى جانە تۇرمىستىق قالدىقتاردى ورتەمەسىن. شالا سوندىرىلگەن تەمەكىنى نەمەسە سىرىڭكەنى تاستاماڭىز. ءتۇتىندى نەمەسە وتتى بايقاعان جاعدايدا بىردەن «101» نەمەسە «102» نومىرىنە حابارلاسىڭىز. وسىنداي بىرلەسكەن جۇمىستاردىڭ ناتيجەسىندە ءبىز ۇلكەن قيىندىقتاردان, قايعىلى وقيعالاردان ءوز ازاماتتارىمىزدىڭ ءومىرىن ساقتاپ, جەرىمىزدى امان الىپ قالامىز. سوندىقتان ءاربىر قازاقستاندىق ءوز وتباسىن, ءۇيىن جانە اينالاسىنداعى قورشاعان ورتانىڭ قاۋىپسىزدىگى ءۇشىن قىراعى بولعانى قاجەت. ءبىز سىزدەرگە وسىنداي ءوتىنىش ايتامىز», دەدى كەگەن تۇرسىنباەۆ.