تۇنگى كلۋب شىمكەنتتەگى «شاحان», «Sultan» سۋپەرماركەتىنىڭ بۇرىنعى عيماراتىنىڭ ورنىنان پايدا بولعان. قۇرىلىس نورماسى بويىنشا ول جەر قايتا دۇكەن بولۋى ءتيىس ەدى. الايدا قالاي بولعانى بەلگىسىز نىسان كوڭىل كوتەرەتىن ورىنعا اينالىپ كەتكەن, دەپ جازادى Egemen.kz.
تۇنگى كلۋب اشىلعالى سول ماڭنىڭ تۇرعىندارىنان مازا قاشقان. ۇلكەندەر جاستاردىڭ بەيمەزگىل جۇرىسىنە ءبىر الاڭداسا, داڭعىراعان مۋزىكادان دا ابدەن شارشاعان. سودان حالىقتىڭ شاعىمى كۇشەيىپ, قالالىق ورتا ساپاسى جانە باقىلاۋ باسقارماسى ارنايى تەكسەرۋ جۇرگىزگەن. ناتيجەسىندە دۋمانداتىپ كەش وتكىزەتىن جەردىڭ زاڭسىز جۇمىس ىستەپ كەلگەنى انىقتالدى. ءسويتىپ تۇرعىنداردىڭ شاعىمى بويىنشا ارنايى نۇسقاما بەرىلىپ, كوڭىل كوتەرەتىن جايدىڭ ەسىگىنە قارا ق ۇلىپ سالىندى. ايتا كەتۋ كەرەك, «ZIMA» تۇنگى كلۋبى قاراتاۋ اۋدانى, ءنۇرسات شاعىن اۋدانىنداعى بايدىبەك بي داڭعىلى №36ا مەكەنجايىندا ورنالاسقان.
جوعارىدا ايتقانىمىزداي, تەكسەرۋ بارىسىندا بۇل نىسان ەسكى سۋپەرماركەتتىڭ ورنىنان قايتا جابدىقتالىپ, تۇنگى كلۋبقا وزگەرگەنى بەلگىلى بولدى. الايدا اتالعان مەكەنجايداعى جەر ۋچاسكەلەرىنىڭ نىسانالى ماقساتى – الەۋمەتتىك-مادەني تۇرمىس وبەكتىلەرىن جوبالاۋ مەن سالۋ بولىپ بەلگىلەنگەن ەدى. سوعان قاراماستان جالپى اۋدانى 1359 شارشى مەتردى قۇرايتىن, ىرگەتاسى بەتون, قابىرعالارى كىرپىشتەن قالانعان, توبەسى مەتالمەن جابىلعان ءبىر قاباتتى عيمارات قايتا جاڭعىرتۋدان ءوتىپ, كوپفۋنكتسيونالدى دۇكەن رەتىندە ەمەس, تۇنگى كلۋب رەتىندە پايدالانىلعان. مۇنىمەن قوسا, ىشكى ءۇي-جايلار تولىق وزگەرتىلىپ, عيماراتتىڭ باستاپقى ماقساتىنا ساي كەلمەيتىن فۋنكتسيونالدىق وزگەرىستەرگە ۇشىراعان.
قىسقاسى رۇقسات بەرۋ راسىمدەرىن ساقتاماي, جوبالىق-سمەتالىق قۇجاتتاماسىز جانە ساراپتامادان وتپەستەن جۇرگىزىلگەن بۇل قۇرىلىس جۇمىستارى تەحنيكالىق تا اۆتورلىق تا قاداعالاۋسىز جۇزەگە اسقان. وسىعان بايلانىستى نىسان يەسىنە قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 316-بابى جانە 463-بابىنىڭ 1-بولىگى بويىنشا اكىمشىلىك ءىس قوزعالىپ, ماتەريالدار شىمكەنت قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنا جولداندى.
شىمكەنت