اباي ۋنيۆەرسيتەتىنىڭ وكىلدەرى قىتاي حالىقارالىق ءبىلىم كورمەسىنە قاتىسىپ جاتىر

اتالعان شاراعا رHIHUA حالىقارالىق ءبىلىم بەرۋ تەحنولوگيالىق ورتالىعىنىڭ ارنايى شاقىرۋىمەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنەن رەكتوردىڭ كەڭەسشىسى, ءباسپاسوز قىزمەتىنىڭ جەتەكشىسى نۇربەك بايبوسىنوۆ پەن فيلولوگيا فاكۋلتەتى قىتاي ءتىلى جانە قىتايتانۋ كافەدراسىنىڭ مەڭگەرۋشىسى گۋليا اليحانقىزى قاتىسىپ جاتىر.

حالىقارالىق ءبىلىم بەرۋ كورمەسى الدىندا (CIEET 2025) «ساپا, سەنىم جانە قاۋىپسىزدىك: شەتەلدەگى ءبىلىم بەرۋدىڭ تۇراقتى ءارى ورنىقتى دامۋى» اتتى حالىقارالىق فورۋم ءوتتى. وعان الەمنىڭ 200-دەن استام جوعارى وقۋ ورنىنان كەلگەن مىڭنان استام دەلەگات قاتىستى.

فورۋم نەگىزىنەن ستۋدەنتتەرگە حالىقارالىق ءبىلىم بەرۋ سالاسىنداعى ءۇش نەگىزگى ەلەمەنت – ساپا, باسقارۋ جانە قاۋىپسىزدىككە نازار اۋدارىپ, ءبىلىم بەرۋ جۇيەسىن جاقسارتۋدى, ستۋدەنتتەردى باعالاۋ جۇيەسىن, ستۋدەنتتەردىڭ قاۋىپسىزدىگىن, وقۋ مەن جۇمىستى بايلانىستىرۋدى تالقىلايدى. سونىمەن قاتار ءبىلىم الماسۋداعى قيىندىقتاردى شەشۋدى, جاھاندىق ءبىلىم بەرۋ باسقارۋىنا قاتىسۋدى نىعايتۋدى كوزدەيدى.

قىتاي حالىق رەسپۋبليكاسىنىڭ ءبىلىم مينيسترلىگىنىڭ قولداۋىمەن CIEET شەتەلدە ءبىلىم بەرۋ باستامالارىنىڭ ساپالى دامۋىنا ىقپال ەتۋگە, سونداي-اق قىتايدىڭ ءبىلىم بەرۋ سالاسىنداعى اشىقتىعىن جەدەلدەتۋگە جانە كەڭەيتۋگە باعىتتالعان ماڭىزدى شارا سانالادى. ال حالىقارالىق ءبىلىم بەرۋ كورمەسىن (CIEET 2025) ءداستۇرلى تۇردە قىتايدىڭ عىلىمي الماسۋعا قىزمەت كورسەتۋ ورتالىعى (CSCSE) ۇيىمداستىرىپ كەلەدى. بۇل كورمە قىتايداعى ەڭ ىقپالدى جانە اۋقىمدى حالىقارالىق ءبىلىم بەرۋ كورمەلەرىنىڭ ءبىرى بولىپ ەسەپتەلەدى.

CIEET-2025 كورمەسى قازاقستان مەن قىتاي اراسىنداعى ءبىلىم بەرۋ سالاسىنداعى ىنتىماقتاستىقتى ودان ءارى كەڭەيتۋگە, ەكى ەلدىڭ ءبىلىم مەن عىلىمنىڭ دامۋىنا ىقپال ەتۋگە جانە اباي ۋنيۆەرسيتەتىنىڭ ءبىلىم سالاسىنداعى مىقتى جاقتارىن كورسەتۋگە جانە شەتەلدىك تالاپكەرلەردى تارتۋعا مۇمكىندىك بەرەدى.

عىلىمي الماسۋعا قىزمەت كورسەتۋ ورتالىعىنىڭ وكىلدەرى مەن كورمەنى ۇيىمداستىرۋشىلار اباي ۋنيۆەرسيتەتىنە وسى ءىس-شاراعا قاتىسقانى ءۇشىن ارنايى العىسىن ءبىلدىردى. 

ايتا كەتەيىك, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ فيلولوگيا فاكۋلتەتىندەگى قىتاي ءتىلى جانە قىتايتانۋ كافەدراسىنىڭ «شىعىس جانە اعىلشىن مۇعالىمى» ماماندىعى بويىنشا قازىرگى ۋاقىتتا 118 ستۋدەنت, ال «شەتەل ءتىلى: ەكى شەتەل ءتىلى» ماماندىعى بويىنشا 173 ءبىلىم الۋشى وقىپ جاتىر.