پەتروپاۆل. 5 مامىر. بىلتىر كۇزدىڭ جاۋىن-شاشىندى بولۋى سالدارىنان قىزىلجار وڭىرىندە دە ماڭداي تەرمەن وسىرگەن استىعىن جيناي الماي, قار استىندا قالدىرعان شارۋاشىلىقتار از ەمەس. كۇننىڭ جىلىنىپ, جەر دەگدىسىمەن ولار «قىر كەمەلەرىن» ەگىن تاناپتارىنا شىعارىپ, قىزۋ ەڭبەك كورىگىن قىزدىرىپ سالا بەردى. بۇل تۋرالى كتك تەلەارناسى حابارلادى.
«كوكتەمدە استىق ورۋ وڭىمىز تۇگىل تۇسىمىزگە ەنبەگەن جايت. تابيعات وكتەمدىگىنە قارسى تۇرار كۇش جوق. مامانداردىڭ ايتۋىنشا, وتكەن جىلى استىق جيناۋعا 12 كۇن عانا قولايلى بولىپتى. تىم بولماسا, شىعىندى اقتاماسا دا, جەمازىققا جاراپ قالار دەگەن ءۇمىتىمىز بار. جوقتان جاقسى عوي», دەيدى تاجىريبەلى كومباينشى ۆلاديمير دولگانوۆ.
اگروقۇرىلىم باسشىلارى كوكتەمدە استىق ورۋ وقيعاسىنىڭ وسىدان جارتى عاسىر بۇرىن ورىن العانىن ەسكە الادى. كەيبىر شارۋا قوجالىقتارى ەگىندى دەستەگە تۇسىرگەنىمەن, باستىرۋعا ۇلگىرمەپتى. مۇندايدا ونىمدىلىك تۋرالى ءسوز قوزعاۋدىڭ ءوزى ارتىق. مەحانيزاتور ۆلاديمير ءوستاپيننىڭ مالىمدەۋىنشە, استىق ىسىرابى كوپ. مالدىڭ تۇياعىنا تاپتالعان. دالا كەمىرگىشتەرى زيان كەلتىرگەن. گەكتار شىعىمدىلىعى ەكى تسەنتنەرگە عانا جەتەعابىل.
جينالعان استىق بارىنشا تازارتىلىپ,قۇس فابريكالارى مەن مال شارۋاشىلىعىمەن اينالىساتىن سەرىكتەستىكتەرگە جونەلتىلۋدە. ال, ءالى ءپىسىپ-جەتىلمەگەن مايلى داقىلداردى جيناۋ تەحنولوگياسى ءتىپتى كۇردەلى. سوعان قاراماستان استىق ءۇشىن جانتالاسقان ديقاندار ەل ريزىعىن جيناپ الۋدىڭ بارلىق جولدارىن قاراستىرۋدا.
شەنەۋنىكتەر القاپتاردىڭ نەبارى ءۇش پايىزى عانا ورىلماي قالدى دەپ ەسەپ بەرگەن بولاتىن. قىر ۇستىندەگى قاربالاس قيمىلعا قاراساق, ءسوز بەن ءىس ۇيلەسپەيتىن سىقىلدى.
ءومىر ەسقالي.
دەرەك: كتك تەلەارناسى.
سۋرەت: egemen.kz