كۇزگى بەرەكەنىڭ كەپىلى

جيىندا ءسوز العان اۋىل شا­رۋاشىلىعى ءمينيسترى ايدار­بەك ساپاروۆ وتكەن جىلى جينالعان رەكوردتىق ءونىم ەل ەكونومي­كاسىنىڭ باسقا سالالارى اراسىندا اۋىل شارۋاشىلىعىنىڭ ءباسىن بيىكتەتەتىنىن ايتتى.

«اۋىل شارۋاشىلىعىنىڭ ناقتى كولەم يندەكسى 113,7%-دى قۇرادى. مۇندا 6,5 ملن توننا بيداي جيناعان سولتۇستىك قازاقستان وبلىسى شارۋالارىنىڭ ۇلەسىن ايرىقشا اتاپ ءوتۋ كەرەك. اۋىل شارۋاشىلىعى وندىرۋ­شى­لەرىنە مەملەكەتتىك قولداۋ كورسەتۋ – فەر­مەرلەردىڭ تابىستى جۇمىسىنىڭ ماڭىزدى فاك­تورى. سوندىقتان الداعى ۋاقىتتا دا اۋىل شارۋا­شىلىعى ءوندىرىسىن جەڭىلدەتىلگەن نەسيەلەۋمەن قامتاماسىز ەتۋ جالعاسا بەرەدى», دەدى مينيستر.

نەسيە الۋعا بەرىلگەن وتىنىمدەردى قابىل­داۋ 2024 جىلدىڭ قاراشاسىندا باستال­عان.

«جالپى,   2025  جىلعى  كوكتەمگى  ەگىس  جانە  وراق ناۋقانىن مەملەكەت تاراپى­نان قولداۋ سوماسى 900 ملرد تەڭگەگە جەتتى. ونىڭ ىشىندە 200 ملرد تەڭگەسى اۋىل شارۋا­شىلىعى تەحنيكاسىنا جەڭىلدەتىلگەن ليزينگ بەرۋ باعدارلاماسىنا جۇمسالادى. مينەرالدى تىڭايتقىشتاردى سۋبسيديالاۋعا ۇكىمەت رەزەرۆىنەن 48,4 ملرد تەڭگە قاراستىرىلعان. 2024 جىلى قايتا وڭدەۋگە 35 ملرد تەڭگە كولەمىندە اينالىم قاراجاتىن جەڭىلدىكپەن قارجىلاندىرۋ ىسكە قوسىلدى. بيىل وسى ماقساتتارعا 48 ملرد تەڭگە باعىتتاۋ جوسپارلانعان», دەدى مينيستر.

سونداي-اق مينيسترلىك تاراپىنان بورداقىلاۋ الاڭدارى مەن قۇس فابريكالارى ءۇشىن قىسقامەرزىمدى كرەديتتىك رەسۋرس­تار تارتىلماق. مۇنى ىسكە اسىرۋ سولتۇستىك قازاقستان وبلىسىنىڭ تاجىريبەسى شەڭبەرىندە بەلسەندى جۇرگىزىلىپ كەلەدى. سولتۇستىك قازاقستان وبلىستىق اۋىل شارۋا­شىلىعى جانە جەر قاتىناستارى باسقارماسىنىڭ باسشىسى داۋرەن توقۋجينوۆ بيىل وڭىردەگى اگروونەركاسىپ كەشەنىنە قۇيىلاتىن ينۆەستيتسيا تۋرالى بايان­دادى.

«بىلتىر سالاعا 163,6 ملرد تەڭگە تار­تىل­عان ەدى, بيىل 147,8 ملرد تەڭگە تارتۋ جوس­پارلانىپ وتىر. قاڭتار مەن اقپان اي­لا­رىنىڭ قورىتىندىسىندا سونىڭ 12,5%-ى, ياعني 18,5 ملرد تەڭگەسى سالاعا قۇيىلدى. بۇل وتكەن جىلدىڭ سايكەس مەرزىمىمەن سالىستىرعاندا 93,3%-دى قۇرايدى», دەدى.

وسىنىڭ ءوزى اتالعان ەكى ايداعى كورسەتكىش بويىنشا رەسپۋبليكاداعى الدىڭعى ورىن­داردىڭ ءبىرىن ەنشىلەۋگە مۇمكىندىك بەرەدى. ءتىپتى وسى ەكى ايدا سالاعا قۇيىلعان بارلىق ينۆەستيتسيانىڭ 35,6%-ى سولتۇستىك قازاقستاننىڭ ۇلەسىنە تيەسىلى بولىپتى.

بيىل وبلىستا اۋىل شارۋاشىلىعى سالاسى بويىنشا جالپى قۇنى 72,6 ملرد تەڭگەنى قۇرايتىن بارلىعى 35 ينۆەستيتسيالىق جوبا ىسكە اسىرىلماق. سونىڭ ىشىندە 38,7 ملرد تەڭگەنىڭ 11 جوباسى بويىنشا وبلىستا تاعى دا 11 تاۋارلى-ءسۇت فەرمالارى بوي كوتەرەدى. 5,9 ملرد تەڭگەنىڭ 7 جوباسى سۋلاندىرۋ جوبالارىن ىسكە اسىرۋدى جوسپارلاپ وتىر.

قۇس شارۋاشىلىعىن دامىتۋدى ماقسات ەتكەن 1 جوباعا 3,5 ملرد تەڭگە ينۆەستيتسيا قۇيىلماقشى. مال شارۋاشىلىعىن اسىلداندىرۋدى كوزدەگەن 3 جوباعا 2,4 ملرد تەڭگە بولىنەدى. سونىمەن قاتار, بيىل سىرتتان 3,5 ملرد تەڭگەگە 2 300 تۇياق اسىل تۇقىمدى مال جەتكىزۋ جوسپارلانعان. ال 19 ملرد تەڭگەنىڭ 7 جوباسى اۋىل شارۋاشىلىعى ونىمدەرىن وڭدەۋگە باعىتتالعان. باسقا جوبالاردىڭ ۇلەس سالماعى از بولعانىمەن ولاردىڭ دا وزىندىك ماڭىزى بار. اتاپ ايتقاندا, 800 ملن تەڭگەلىك ءبىر جوبا قويما سالۋدى ىسكە اسىرۋعا جۇمسالادى. 150 ملن تەڭگەلىك ءبىر جوبا بالىق ءوسىرۋدى قامتىعان. 600 ملن تەڭگەلىك ءبىر جوبا جىلقى شارۋاشىلىعىن دامىتۋدى قامتيدى. سونداي-اق بيىل وبلىس ديقاندارى 87,6 ملرد تەڭگەنىڭ 3 150 اۋىل شارۋاشىلىعى تەحنيكاسىن الادى.

بيىل وبلىس ديقاندارى 2,5 ملن گەكتار جەرگە تۇقىم ءسىڭىرۋدى جوسپارلاپ وتىر. تابىسى زور بولعاندىقتان مايلى داقىلدار ۇلەسىن ەسەلەپ ارتتىرىپ, بىلتىرعى 86 مىڭ گەكتاردىڭ ورنىنا 760 مىڭ گەكتارعا جەتكىزۋ جوسپارلانعان. جەردى تىڭايتۋ جۇمىستارىنا ديقاندار قۇلشىنا كىرىسكەن. بىلتىرعىعا قاراعاندا ونىڭ كولەمىن 30%-عا ارتتىرىپ, ەگىس دالاسىنا 333 مىڭ توننا مينەرالدى تىڭايتقىش جەتكىزۋدى جوسپارلاعان.

بىرەر اي شاماسىندا قىزىلجار ءوڭىرىنىڭ ەگىس القاپتارىنا 4 مىڭنان استام تراكتور مەن 1,5 مىڭ ەگىس كەشەنى لاپ قويادى. ولار 470 مىڭ توننا تۇقىمدى جەرگە سىڭىرۋگە ۇمتىلادى.

سولتۇستىك قازاقستان وبلىسى