قىزىلجاردىڭ ع.مۇسىرەپوۆ اتىنداعى وبلىستىق بالالار جانە جاسوسپىرىمدەر كىتاپحاناسىندا بەلگىلى بالالار جازۋشىسى, حالىقارالىق الاش ادەبي سىيلىعىنىڭ لاۋرەاتى تولىمبەك ءابدىرايىمنىڭ «قۇس ۇياسى» اتتى جيناعىنىڭ تۇساۋكەسەر ءراسىمى ءوتتى.
قازاق بالالار ادەبيەتىنىڭ تاريحى ۇلى ۇستاز ىبىراي التىنساريننەن باستالىپ, بۇگىنگە دەيىن اۋىسپالى تابىسپەن جالعاسىپ كەلەدى. ءبىر كەزدە ونى دۇنيەجۇزى بالالار ادەبيەتىنىڭ مايتالماندارى دا جوعارى باعالاپ, بەردىبەك سوقپاقباەۆتىڭ «مەنىڭ اتىم – قوجا» حيكاياتى تالاي ەلدىڭ تورىنەن ورىن الدى. بۇگىندە بۇل سالاعا تالاپ جوعارى, جاس سانالاردى ەلىكتىرەتىن زاماناۋي ءىت-ءدىڭ جاسايتىن باسەكەلەستىگى وراسان. سانالى اتا-انالار مەن ساليقالى ۇستازداردىڭ قولداۋىمەن بالالاردىڭ ادەبيەتكە دەگەن قۇشتارلىعى ولگەن جوق. بىراق باسەكەلەستىككە توتەپ بەرىپ, شىنايى, تارتىمدى, بالا پسيحولوگياسىنا شاقتالعان دۇنيە جازۋ وڭاي ەمەس. شۋ دەگەندە بالالار ادەبيەتىن وڭاي دەپ ويلاعاندار زامانا دوڭگەلەگى شاباقتارىنىڭ قاقپاقىلىنا ۇشىراپ, مۇرتتاي ۇشىپ جاتتى. ال تولىمبەك ءابدىرايىم سول قاقپاقىلعا توتەپ بەرىپ, 1996 جىلى شىققان العاشقى كىتابى «ەركەشورادان» بەرى تالماي 30 جىلدا ون بەس شاقتى جيناق شىعارىپ, ەڭبەگىمەن ەلگە تانىلعان جازۋشى. ونىڭ بالالارعا ارناعان «ماقتانشاق سارى ساعات», «ينە مەن ءجىپ», «اۋەلەپ ۇشقان تىرنالار», «ايۋ قۇلاق», «جالقاۋلىققا كىم ءۇيىر؟», «الابۇعا اۋلاعان كۇن», «اققوياننىڭ ۇيشىگى», «اق كەپتەر», «لەتيات جۋراۆلي», ت.ب. جيناقتارىن وقىرماندارى جىلى قابىلداعان. ءبىراز اڭگىمەلەرى وقۋلىقتارعا دا ەنگىزىلگەن.
استانالىق باسپالاردىڭ ءبىرى «اردادان» شىققان 367 بەتتىك «قۇس ۇياسىنىڭ» باسپاگەرلىك شەبەرلىگىندە ءمىن جوق. جيناققا توپتاستىرىلعان 54 اڭگىمە, 16 ەرتەگى جانە 3 حيكاياتتىڭ بارىنە وقۋشىعا ءتۇرلى وي سالىپ, ءماتىننىڭ مازمۇنىن اشا تۇسەتىن ءتۇرلى-ءتۇستى, ادەمى سۋرەتتەر سالىنعان. اڭگىمەلەرىنىڭ ءبارى دە كوركەمدىگى جوعارى, تاعلىمى زور, بالانىڭ قابىلداۋىنا ىقشام. بەلگىلى ادەبيەتشى-پروفەسسور سەرىك نەگيموۆ كىتاپقا جازعان العىسوزىندە: «اڭگىمەلەرى ويماقتاي, ويۋلى, سىرلى, ماعىنالى ءھام مازمۇندى. بالالاردىڭ جانىن كەرەمەت تۇسىنەدى. كادىمگى ىبىراي ءالتىنساريننىڭ الاقانداي اڭگىمەلەرى بار عوي, سول سياقتى», دەپتى.
تۇساۋكەسەر راسىمىنە قىزىلجارلىق ادەبيەتسۇيەر قاۋىم قاتىستى. عالىم زارقىن تايشىباي ت.ءابدىرايىم شىعارماشىلىعىن كوپتەن بەرى بىلەتىنىن, ونىڭ قالىپتاسۋى مەن ءوسۋ جولدارىنا كۋا ەكەنىن ايتتى. جازۋشى جاراسباي سۇلەيمەنوۆ, كاسىپكەر جومارت وماروۆ, ءانشى, اكتەر قۇماربەك قالقاتاي, اقىن امانجول زاعىپار, ت.ب. كىتاپ اۆتورى جانە جاڭا جيناق تۋرالى جىلى لەبىزدەرىن ءبىلدىردى. 3-سىنىپ وقۋشىسى, جاس اقىن سارىباي ابزال جازۋشىعا ارناۋىن ايتتى. «بالا جانىنىڭ باعبانى» اتالعان كەشتى وبلىستىق «سولتۇستىك قازاقستان» گازەتىنىڭ باس رەداكتورى نۇرگۇل وقاشەۆا اشىپ, جۇرگىزىپ وتىردى. قالامگەر مەن ونىڭ جۇبايى كاميلا مۇقاشەۆاعا كىتاپحانا ۇجىمى سىي-قۇرمەت كورسەتىپ, يىقتارىنا شاپان جاپتى. ءسويتىپ, بالالار ادەبيەتىنىڭ قورجىنىنا تاعى ءبىر سۇبەلى ەڭبەك جول تارتتى.
پەتروپاۆل