جەلىدە تاعى ءبىر ءجاسوسپىرىمنىڭ قارت ادامدى سوققىعا جىققانى تۋرالى بەينەجازبا تارادى, دەپ حابارلايدى Egemen.kz.
وقيعا 6 ءساۋىر كۇنى جەتىسۋ وبلىسىنا قاراستى وتەناي اۋىلىندا بولعان. الدىن الا مالىمەتتەر بويىنشا, ءزابىر كورسەتكەن ءجاسوسپىرىم بوكسپەن اينالىسادى.
وبلىستىق پوليتسيا دەپارتامەنتىنىڭ مالىمەتىنشە, 86 جاستاعى زەينەتكەرگە دەنە جاراقاتىن كەلتىرۋ دەرەگى بويىنشا قىلمىستىق ءىس قوزعالعان.
«قازىرگى ۋاقىتتا تەرگەۋ امالدارى جۇرگىزىلىپ جاتىر. كۇدىكتى ءجاسوسپىرىم زاڭدى وكىلىنىڭ قامقورلىعىنا تاپسىرىلدى. سونىمەن قاتار, اتا-اناسىنا نەمەسە زاڭدى وكىلىنە بالانى تاربيەلەۋدەگى جاۋاپسىزدىعى ءۇشىن اكىمشىلىك جازا قولدانىلدى. ءجاسوسپىرىم پروفيلاكتيكالىق ەسەپكە قويىلدى», دەلىنگەن حابارلامادا.
رەسمي اقپاراتقا سايكەس, تالدىقورعان قالاسى اكىمدىگى جانىنداعى كامەلەتكە تولماعاندار ءىسى جانە ولاردىڭ قۇقىقتارىن قورعاۋ جونىندەگى كوميسسياعا ءتيىستى ۇسىنىس جولدانعان.