الدىن الا مالىمەت بويىنشا, كونگو دەموكراتيالىق رەسپۋبليكاسىنىڭ استاناسى كينشاسادا بولعان سۋ تاسقىنى سالدارىنان 30-عا جۋىق ادام قازا تاپتى, دەپ حابارلايدى Egemen.kz Reuters اگەنتتىگىنە سىلتەمە جاساپ.
سۋ تاسقىنىنا سەبەپ بولعان ندجيلي وزەنى جۇماعا قاراعان ءتۇنى ارناسىنان اسىپ, ۇلتتىق ماڭىزى بار باستى جولدى سۋ باسىپ قالعان. بۇل جاعداي سەنبىنىڭ كەشىنەن باستاپ جۇرگىزۋشىلەرگە ۇلكەن قيىندىق تۋعىزعان.
سونىمەن قاتار قالانىڭ بىرنەشە اۋدانى جارىقسىز قالعان. ماكالا اۋدانىندا تۇراتىن كەرەن يالا ەسىمدى تۇرعىن, ەڭ ۇلكەن ماسەلە – اۋىز سۋدىڭ توقتاپ قالۋى ەكەنىن ايتقان.
كينشاسا گۋبەرناتورى دەنيەل بۋمبا لۋباكي سۋ قۇبىرلار جۇيەسىنىڭ زاقىمدانعانىن, بىراق الداعى ەكى-ءۇش كۇن ىشىندە سۋ بەرۋ قايتا قالپىنا كەلتىرىلەتىنىن مالىمدەدى. سونداي-اق ول كەيبىر ادام ولىمىنە زاڭسىز قۇرىلىستار سەبەپ بولعانىن اتاپ ءوتتى.
گيدرولوگ رافاەل تشيمانگا مۋامبا ءوز كەزەگىندە وزەندەردىڭ جاعدايىنا ادام ارەكەتى اسەر ەتىپ وتىرعانىن مالىمدەگەن.
بۇعان دەيىن اقش-تا بىرنەشە كۇن بويى تولاسسىز جاۋعان نوسەر جاۋىن سالدارىنان وزەندەردە سۋ دەڭگەيى كوتەرىلىپ, تاسقىن قاۋپى كۇشەيگەن ەدى. سوڭعى مالىمەت بويىنشا, 18 ادام قايتىس بولعان, ونىڭ ىشىندە 10-ى تەننەسسي تۇرعىنى.