ۇلتتىق بانك ترامپ اكىمشىلىگىنىڭ تاريفتەردى قىمباتتاتۋىنا بايلانىستى التىن ساتۋدى توقتاتۋ تۋرالى شەشىم قابىلدادى, دەپ حابارلايدى Egemen.kz.
ۇلتتىق بانك توراعاسىنىڭ ورىنباسارى ءاليا مولدابەكوۆانىڭ ايتۋىنشا, نارىقتا التىن باعاسىنىڭ وسۋىنە بايلانىستى بولجامدار قىرىق قۇبىلىپ تۇر. ساۋدا قاقتىعىستارىنىڭ شيەلەنىسۋى جانە اقش قور نارىعىنداعى قۇبىلمالىلىقتىڭ ءوسۋى التىندى قوسا العاندا, قاۋىپسىز اكتيۆتەرگە دەگەن سۇرانىستى تاعى دا قىزدىرادى
مولدابەكوۆانىڭ حابارلاۋىنشا, وتكەن ايدا ۇلتتىق بانك قورداعى التىننىڭ ۇلەسىن شامامەن 54% -دان 50% -عا دەيىن قىسقارتۋدى جوسپارلاعان بولاتىن, بىراق باس تارتتى. وسىعان دەيىن قىمبات مەتالدىڭ باعاسى ۋنتسياسى ءۇشىن $3,1 مىڭعا جەتۋى مۇمكىن دەگەن بولجام ايتىلعان بولاتىن. بىراق ەندى اق ءۇي اكىمشىلىگىنىڭ باج سالىعىنا بايلانىستى جوسپارىنان كەيىن ۇلتتىق بانك نارىقتاعى ساۋدانى كەيىنگە قالدىرۋدى شەشتى. ءىرى ينۆەستيتسيالىق كومپانيالار اقش-قا قارسى جاۋاپقا قاتىستى بەلگىسىزدىكتەن التىننىڭ ودان ءارى وسەتىنىن ايتىپ وتىر.
مولدابەكوۆا ايتىپ وتكەندەي, ۇلتتىق بانك التىن نارىعىنداعى بەلگىسىزدىك تومەندەپ, باعا تۇراقتالعاننان كەيىن شەتەلگە التىن ساتۋدى قايتا باستاۋ مۇمكىندىگىن قاراستىرادى.
دۇنيەجۇزىلىك التىن كەڭەسىنىڭ دەرەكتەرىنە سايكەس, قازاقستان ۇلتتىق بانكى 2024 جىلدىڭ قورىتىندىسى بويىنشا ساتۋ كولەمى بويىنشا ورتالىق بانكتەر اراسىندا الەمدە ەكىنشى ورىندا تۇر. اقش پرەزيدەنتى دونالد ترامپتىڭ نارىقتاعى تاريفتەردى كۇرت كوتەرۋ تۋرالى شەشىمىنە جاۋاپ رەتىندە التىن رەكوردتىق دەڭگەيگە جەتتى, بىراق كەيىن تۇزەتىلدى.
بيىل التىن 2024 جىلعى وسىمنەن كەيىن 18% -عا قىمباتتادى, بۇل ورتالىق بانكتەردىڭ بەلسەندى ساتىپ الۋلارىنان جانە ازياداعى سۇرانىستىڭ جوعارى بولۋىنان تۋىندادى. ينۆەستورلار الەمدىك ەكونوميكانىڭ جاي-كۇيىنە بايلانىستى الاڭداۋشىلىق پەن ءوسىپ كەلە جاتقان ساۋدا قاقتىعىستارى كەزىندە التىن ساتىپ الىپ جاتىر.