كولىكتى ساقتاندىرۋ قىمباتقا تۇسەدى

وتكەن جىلى «جول قوزعالىسى تۋرالى» زاڭعا وزگەرتۋلەر ەنگىزىلگەن ەدى. وسىعان سايكەس 6 ساۋىردەن باستاپ تىركەلمەگەن موپەدتەر ايىپ تۇراعىنا قويىلادى, ال يەلەرى اكىمشىلىك جاۋاپكەرشىلىككە تارتىلادى. بۇل تۋرالى ءىىم اكىمشىلىك پوليتسيا كوميتەتىنىڭ توراعاسى قايسار سۇلتانباەۆ مالىمدەدى.

– موپەدتەر قازىر ادام ومىرىنە قاۋىپ ءتوندىرىپ وتىر. سوندىقتان وسى زاڭدى قابىلداپ وتىرمىز. بىلتىر موپەدتەردىڭ كەسىرىنەن ەلدە 1 819 جول-كولىك وقيعاسى تىركەلدى. ناتيجەسىندە, 1 945 ادام جاراقات الىپ, 76 ادام قايتىس بولدى. ال جىل باسىنان بەرى 103 وقيعا ورىن الدى. ەكى كامە­لەتكە تولماعان بالا قايتىس بولدى. موپەدتى باسقاراتىندار ەرەجەنى بۇزسا, ايىپپۇل عانا تولەپ, قۇتىلاتىن. سول ءۇشىن دە جاۋاپكەرشىلىك سەزىنبەيدى. ەندى زاڭداستىرىلعان قۇرالداردى عانا باسقارۋعا رۇقسات بەرىلەدى, – دەدى سپيكەر.

ال قارجى نارىعىن رەتتەۋ جانە دامىتۋ اگەنتتىگى مىندەتتى اۆتوساقتاندىرۋ تالاپتارىنا تۇزەتۋلەر ەنگىزىپ وتىر. بۇل الداعى دۇيسەنبى كۇنى كۇشىنە ەنەدى. اگەنتتىكتىڭ مالىمەتىنشە, مىندەتتى ساقتاندىرۋ ءپوليسىنىڭ قۇنى ءاربىر جۇرگىزۋشىگە جەكە ەسەپتەلەدى. سونداي-اق جاڭا زاڭعا سايكەس جۇرگىزۋشىنىڭ تاجىريبەسى مەن جاسى, اۆتوكولىكتى تىركەۋ ايماعى, اۆتوكولىك ءتۇرى مەن قىزمەت ەتۋ مەرزىمىنە قاراي باعا وزگەرەدى. بۇعان قوسا جول-كولىك وقيعاسىمەن قاتار, جۇرگىزۋشىنىڭ بۇعان دەيىن ەرەجە بۇزعان دەرەكتەرى دە ەسەپتەلەدى. ماسەلەن, جۇرگىزۋشى جىلدامدىقتى اسىرسا, قارسى بەتكە شىعىپ, قاۋىپ توندىرسە, ساقتاندىرۋ قۇنى ايتارلىقتاي قىمباتتايدى.

– ساقتاندىرۋ ءپوليسىن العاش رەت العان جۇر­گى­زۋشىلەرگە 1,8 كوەففيتسيەنت بەلگىلەنگەن. جاڭا ا كلاسىن ەنگىزۋ ولاردىڭ جول-كولىك وقيعالارىنا ءجيى ۇشىرايتىنىمەن تۇسىندىرىلەدى. بۇل ساقتاندىرۋ تولەمدەرىن ارتتىرادى. ستاتيس­تيكاعا سايكەس, مۇنداي جۇرگىزۋشىلەر – جول-كولىك ەرەجەسىن ەكى ەسە كوپ بۇزاتىندار, – دەدى قارجى نارىعىن رەتتەۋ جانە دامىتۋ اگەنتتىگى دەپارتامەنت ديرەكتورىنىڭ ورىنباسارى سەرىكبوسىن تولەبەكوۆ.

اگەنتتىك وكىلىنىڭ ايتۋىنشا, جىلدامدىقتى 40 كم/ساع نەمەسە ودان جوعارى اسىرعان, قارسى جولاققا شىعىپ بۇرىلسا نەمەسە كەرى بۇرىلسا, باعدارشامنىڭ قىزىل تۇسىنە وتكەن نەمەسە رەتتەۋشىنىڭ بەلگىسىنە باعىنباعان, جاياۋ جۇرگىنشىلەرگە جول بەرمەگەن, باسقا جۇرگىزۋشىلەردى جىلدامدىقتى نەمەسە قوزعالىس باعىتىن كۇرت وزگەرتۋگە ءماجبۇر ەتەتىن اپاتتى جاعداي تۋعىزعان, تەحنيكالىق رەگلامەنتكە, ۇلتتىق ستاندارتقا ساي كەلمەيتىن اقاۋى بار كولىك جۇرگىزگەن, جول-كولىك ەرەجەلەرىن ءۇش جانە ودان كوپ مارتە بۇزعان جۇرگىزۋشىنىڭ ساقتاندىرۋ كلاسى بىردەن ەكى دەڭگەيگە تومەندەپ, پوليس قۇنى ارتادى.

سونىمەن قاتار اگەنتتىكتىڭ مالىمەتىنشە, الماتى, تۇركىستان, جامبىل, باتىس قازاقستان, قىزىلوردا وبلىستارى مەن شىمكەنت پەن استانا قالاسى جۇرگىزۋشىلەرىنىڭ ساقتاندىرۋ ءپوليسىنىڭ باعاسى وسەدى. دەسە دە ەڭ قىمبات پوليس قىزىلوردا وبلىسىنىڭ كولىك يەلەرىنە تيەسىلى.

ال جول اپاتىنا تۇسپەگەن جۇرگىزۋشىنىڭ كلاسى جىل سايىن جوعارىلايدى. 7 ساۋىردەن باس­تاپ 5 جىلدان اسا ۋاقىت ۇزدىكسىز 13-كلاستا اپاتسىز جۇرگەن جۇرگىزۋشىگە سىياقى بەرىلەدى. ونى ىنتالاندىرۋ ماقساتىندا تومەن ساقتاندىرۋ كوەففيتسيەنتى بەرىلەدى. سونىمەن قاتار جاڭا ەرەجە بويىنشا ءۇش تومەنگى كلاسس (A, M1, M2) ەنگىزىلەدى, ولاردىڭ كوەففيتسيەنتتەرى 3,5 ەسەگە دەيىن ارتۋى مۇمكىن. ەڭ جوعارى جانە ەڭ ارزان ساقتاندىرۋ كلاسى 13-كلاسس بولىپ قالادى. ەڭ تومەنگىسى – م2. وسى كلاستاعى جۇرگىزۋشىلەرگە پوليس قۇنى 13-كلاسقا قاراعاندا جەتى ەسە قىمبات بولادى. ماسەلەن, ماس كۇيىندە كولىك جۇرگىزگەن, كولىكتى ماس جۇرگىزۋشىگە تاپسىرعان, ماس كۇيىندە جاساعان جول اپاتىنان ادامدار زارداپ شەكسە نە قايتىس بولسا, ساقتاندىرۋ كلاسى م2-گە دەيىن تومەندەيدى.

ىشكى ىستەر مينيسترلىگىنىڭ مالىمەتىنە سۇيەن­سەك, 2025 جىلدىڭ باسىنان باستاپ رەسپۋبليكا بو­يىنشا ءتارتىپ ساقشىلارى 3,7 ملن-نان اسا اكىم­­شى­لىك قۇقىق بۇزۋشىلىقتى انىقتاعان. ونىڭ 3,2 ملن-ى – جول قاعيدالارىن بۇزۋ فاكتىلەرى. پوليتسيا قىزمەتكەرلەرى جول ەرەجەسىن بۇزعان ­ 5 417 ماس جۇرگىزۋشىنى ۇستاعان.

مامانداردىڭ ايتۋىنشا, كولىكتى ساقتاندىرۋ ءپوليسىنىڭ باعاسىن ارتتىرۋ – وسىنداي زاڭ بۇزۋ­شى­لىقتاردىڭ الدىن الۋعا جاسالعان قادام.