كاسىپوداقتار فەدەراتسياسى وكىلدەرى جىلىنا 200 مىڭ توننا رەلس پەن 230 مىڭ توننا فاسوندى پروكات شىعارىپ, ىشكى سۇرانىستى تولىق قامتاماسىز ەتىپ وتىرعان «اقتوبە رەلسارقالىق زاۋىتى» ەڭبەككەرلەرىمەن كەزدەستى. 860 ادام ەڭبەك ەتەتىن كاسىپورىننىڭ 120 مەترلىك ۇزىندىقتاعى تەرموبەرىك رەلستەرى «الماتى –شۋ» تەمىرجولى, «قۇرىق» تەڭىز پورتى قۇرىلىستارىنا پايدالانىلىپ كەلەدى. استاناداعى «نۇرلى جول» تەمىرجول ۆوكزالىنا دا وسى زاۋىتتىن ونىمدەرى توسەلگەن, دەپ جازادى Egemen.kz.
وندىرىستە جاڭادان ەنگىزىلگەن مەتالل شىڭداۋ تەحنولوگياسىن قولدانۋ ارقاسىندا رەلستەردىڭ توزىمدىلىگى مەن بەرىكتىگى ارتقان. كاسىپورىننىڭ تەحنولوگيالىق لابوراتورياسىن باسقاراتىن ء ادىل الىمباەۆ قاراعاندى يندۋستريالدى ۋنيۆەرسيتەتىنىڭ تۇلەگى. ون جىل بۇرىن وقۋ ورنىن بىتىرگەن بويى زاۋىتقا توكار بولىپ ورنالاسقان. قاتارداعى جۇمىسشىدان 1 ساناتتاعى ينجەنەر-تەحنولوگقا دەيىن كوتەرىلگەن.
ول كاسىپوداق فەدەراتسياسى توراعاسىنىڭ ورىنباسارى گۇلنارا جۇماگەلديناعا رەلس وندىرىسىندەگى جاڭا تەحنولوگيالاردى تانىستىرا وتىرىپ, ەلىمىزدىڭ مەتاللۋرگيا سالاسىن جاڭارتۋ جونىندە ۇسىنىسىن ءبىلدىردى.
«مەتاللۋرگيا كاسىپورىندارى ءونىم ساپاسىن ارتتىرۋ مەن ەكولوگيا, ەڭبەك قاۋىپسىزدىگىن قورعاۋدا جەتەكشى عالىمداردى تارتا وتىرىپ, عىلىمي زەرتتەۋ جۇمىستارىن جۇرگىزۋ كەرەك دەگەن پىكىردەمىن. ويتكەنى, قازىرگى ۋاقىتتا زاماناۋي ءوندىرىس مىندەتتى تۇردە عىلىمي شەشىمدەرمەن قاتار دامۋى كەرەك», دەيدى ءادىل الىمباەۆ.