مەگاپوليستە ەرەكشە قاجەتتىلىكتەرى بار تۇرعىندارعا ارنالعان «ينكليۋزيۆتى الماتى 2025–2030» تۇجىرىمداماسى بەلسەندى تۇردە ازىرلەنىپ جاتىر. قۇجات ساتىمەن قابىلدانىپ, ىسكە اسقان جاعدايدا 2030 جىلعا دەيىن قالادا 3,1 مىڭ الەۋمەتتىك نىسان مۇگەدەكتىگى بار جانداردىڭ ءجۇرىپ-تۇرۋىنا ىڭعايلانۋعا ءتيىس.
باعدارلامادا قالانى دامىتۋدىڭ ۇزاقمەرزىمدى ستراتەگيالىق باسىمدىقتارى ەسكەرىلەدى. وعان قوسا تەڭ مۇمكىندىكتەردى قامتاماسىز ەتىپ, وسى ساناتتاعى ازاماتتاردى قالا ءومىرىنىڭ بارلىق سالاسىنا تولىققاندى ارالاستىرۋدى كوزدەيدى.
سونداي-اق بيىل 32,5 مىڭ قالالىق ينفراقۇرىلىم نىساندارىن پاسپورتتاۋ جوسپارلانعان. وسى ۇدەرىستى اۆتوماتتاندىرۋ ماقساتىندا ناقتى ۋاقىت رەجىمىندە وبەكتىلەردى پاسپورتتاۋ مەن بەيىمدەۋ بارىسىن جەدەل باقىلاۋعا مۇمكىندىك بەرەتىن ءموبيلدى پلاتفورما قۇرىلدى.
جالپى, الماتى ينكليۋزيۆتى ورتا قۇرۋدا كوشباسشىلىق تانىتىپ تۇر. مۇندا ەرەكشە قاجەتتىلىكتەرى بار ادامداردى قوسا العاندا, حالىقتىڭ موبيلدىلىگى تومەن توپتارىنا قاتىستى كەدەرگىلەردى جويىپ, قۇقىقتاردىڭ تەڭدىگىن قامتاماسىز ەتۋگە باستى نازار اۋدارىلادى.
وڭىرلىك كوممۋنيكاتسيالار قىزمەتىندە وتكەن بريفينگتە «ITeachMe» قوعامدىق قورىنىڭ ديرەكتورى زاحيرا بەگاليەۆا مۇگەدەكتىگى بار ادامدار ءۇشىن قولجەتىمدى قالالىق ورتانى قۇرۋدىڭ نەگىزگى كورسەتكىشتەرى مەن جوسپارلارى تۋرالى مالىمدەي كەلە, بىلتىر بۇل باعىتتا ناقتى جوبالار جۇزەگە اسىرىلعانىن, 2025 جىل تەڭ مۇمكىندىكتەر قوعامىن قۇرۋ جولىندا ماڭىزدى كەزەڭ بولاتىنىن اتاپ ءوتتى.
نەگىزگى جەتىستىكتەر اراسىندا قالا ءومىرىنىڭ 15 باعىتى مەن 90 جوبانى قامتيتىن ۇزدىك الەمدىك تاجىريبەلەرگە نەگىزدەلگەن «ينكليۋزيۆتى الماتى» باعدارلاماسىنىڭ ءجونى بولەك. ول ءبىلىم بەرۋ, دەنساۋلىق ساقتاۋ, مادەنيەت, سپورت سالاسىندا تەڭ مۇمكىندىكتەر قالىپتاستىرۋعا باعىتتالعان.
حالىقارالىق ساياسات اياسىندا ەلىمىز «مۇگەدەكتەردىڭ قۇقىقتارى تۋرالى» كونۆەنتسيانى راتيفيكاتسيالاپ, 2023 جىلى فاكۋلتاتيۆتىك حاتتاماعا قول قويعانى بەلگىلى. سونىمەن قاتار قالالىق باعدارلامالاردى ازىرلەۋدە قولدانىلاتىن بەرلين تاجىريبەسىنە ەرەكشە نازار اۋدارىلىپ وتىر. بۇل قۇجاتتار, تالاپتار دا مەملەكەت دەڭگەيىندە الەۋمەتتىك قورعاۋدى كۇشەيتۋگە ىقپال ەتەدى. سونداي-اق مەگاپوليستە قالالىق ساياساتقا ينكليۋزيۆتى تاسىلدەردى بەلسەندى ەنگىزەتىن ينكليۋزيا ماسەلەلەرى جونىندەگى شتاتتان تىس كەڭەسشىنىڭ ءرولى كۇشەيتىلدى.
سونىمەن بيىل 2025–2030 جىلدارعا ارنالعان ينكليۋزيۆتى ساياسات تۇجىرىمداماسىنىڭ جاڭا كەزەڭىن ىسكە اسىرۋ باستالدى. تۇپكى ماقسات – مۇگەدەكتىكتىڭ مەديتسينالىق جانە قايىرىمدىلىق مودەلىنەن الەۋمەتتىك جانە ادام قۇقىقتارىن قورعاۋعا كوشۋ. بۇل باستاما اركىمنىڭ تولىققاندى ءومىر سۇرۋىنە جاعداي جاساي وتىرىپ, فيزيكالىق, قۇقىقتىق, اقپاراتتىق كەدەرگىلەردى جويۋعا مۇمكىندىك بەرەدى.
الماتى