ورال قالاسىنا رەسەي فەدەراتسياسىنىڭ ساراتوۆ وبلىسى ۇكىمەتى توراعاسىنىڭ ورىنباسارى الەكسەي نيكيتين باستاعان دەلەگاتسيا كەلدى. مەيمانداردى باتىس قازاقستان وبلىسىنىڭ اكىمى ناريمان تورەعاليەۆ قارسى الىپ, ەكىجاقتى ىنتىماقتاستىقتىڭ كەلەشەگىن تالقىلادى.
ساراتوۆ وبلىسى باتىس قازاقستان وبلىسىنىڭ جانىبەك, قازتالوۆ, تاسقالا اۋداندارىمەن شەكتەسەدى. ەجەلدەن اۋىلى ارالاس, قويى قورالاس جاتقان كورشىلەردىڭ اراسىنداعى ەكونوميكالىق قارىم-قاتىناستىڭ تامىرى تەرەڭدە جاتىر. 2024 جىلدىڭ قورىتىندىسى بويىنشا باتىس قازاقستان وبلىسىنىڭ رەسەي فەدەراتسياسىمەن تاۋار اينالىمى 700 ملن دوللاردان اسقان ەكەن. سونىڭ 37,1 ملن دوللارى ءدال وسى ساراتوۆ وبلىسىنا تيەسىلى. سونداي-اق وڭىردە رەسەيلىك بيزنەسپەن ارىپتەستىك قارقىندى دامىپ كەلەدى. كەيىنگى ءۇش جىلدا ساۋدا, ماركەتينگتىك زەرتتەۋلەر, IT, باسقا دا سالالاردا 740-تان استام بىرلەسكەن كاسىپورىن تىركەلىپتى.
ورالعا كەلگەن رەسەيلىك دەلەگاتسيا قۇرامىندا مەملەكەتتىك مەكەمە باسشىلارى, ساۋدا-ونەركاسىپ پالاتاسىنىڭ مۇشەلەرى, ءبىلىم بەرۋ سالاسىنىڭ قىزمەتكەرلەرى مەن كاسىپكەرلەر بولدى. كەزدەسۋ بارىسىندا وبلىس اكىمى ناريمان تورەعاليەۆ مەملەكەت باسشىسى قاسىم-جومارت توقاەۆتىڭ ەكى ەلدىڭ وڭىرلەرى اراسىنداعى ءوزارا ءتيىمدى ساۋدا-ەكونوميكالىق بايلانىستىڭ ماڭىزدىلىعىنا بىرنەشە رەت نازار اۋدارعانىن اتاپ ءوتتى.
ءوڭىر باسشىسى ءوز سوزىندە اگروونەركاسىپ كەشەنىنىڭ جەدەل دامىپ كەلە جاتقانىن, بيىلدىڭ وزىندە اۋىل شارۋاشىلىعىن دامىتۋعا 114 ملن اقش دوللارى بولىنگەنىن ايتتى. 2025 جىلدىڭ العاشقى ەكى ايىنىڭ ىشىندە عانا ءوڭىردىڭ اگروسالاسىنا 400 مىڭ دوللار كولەمىندە ينۆەستيتسيا تارتىلعان.
«باتىس قازاقستان وبلىسى اۋىل شارۋاشىلىعى مەن عىلىم سالاسىندا رەسەيلىك ارىپتەستەرىمەن تىعىز قارىم-قاتىناس ورناتقان. ماسەلەن, ورال اۋىل شارۋاشىلىق تاجىريبە ستانساسىنىڭ عالىمدارى ن.م.تۋلايكوۆ اتىنداعى سامارا اۋىلشارۋاشىلىق عىلىمي-زەرتتەۋ ينستيتۋتىمەن, پ.ن.كونستانتينوۆ اتىنداعى «ەدىلبويى» سەلەكتسيالىق-تۇقىمدىق عىلىمي-زەرتتەۋ ينستيتۋتىمەن ارىپتەستىك بايلانىستا. سامارالىقتارمەن بىرلەسە جاسالعان جازعى بيدايدىڭ «ەدىلجايىق» تۇقىمى قازىر بقو اۋماعىندا جاقسى تانىمال. «ەدىلبويى» عزي عالىمدارىمەن بىرگە قازىر ءداندى داقىلداردىڭ, مايلى داقىلداردىڭ, مال ازىعى داقىلدارىنىڭ بۋداندارىن شىعارۋ جونىندە تاجىريبە جۇرگىزىلىپ جاتىر. عىلىم مەن ءبىلىم – ءبىزدىڭ رەسەيلىك ارىپتەستەرىمىزبەن ارامىزدى جالعاپ جاتقان ماڭىزدى جولدىڭ ءبىرى وسى» دەدى ناريمان تورەعالي ۇلى ءوز سوزىندە.
وبلىس اكىمى جوعارى بىلىكتى مامانداردى دايارلاۋدا ساراتوۆ وبلىسىنىڭ جەتەكشى ۋنيۆەرسيتەتتەرىمەن ارىپتەستىك ورناتۋعا قىزىعۋشىلىق تانىتتى. ول حالىقارالىق ىنتىماقتاستىق اياسىندا باتىسقازاقستاندىق عالىمدار ساراتوۆ وبلىسىنىڭ جوعارى وقۋ ورىندارىمەن بىرلەسىپ, اۋىل شارۋاشىلىعى, حالىقارالىق قۇقىق, مەديتسينا سالاسىندا ءتۇرلى جوبانى جۇزەگە اسىرىپ, ماگيسترانتتار مەن اسپيرانتتاردى تاعىلىمدامادان وتكىزىپ, وقىتاتىنىن اتاپ ءوتتى.
كورشىلەس وبلىستاردىڭ اراسىندا مادەني بايلانىستار دا جاقسى قالىپتاسقان. بقو ونەرپازدارى رەسەيدە دە تانىمال. وتكەن جىلى ورالدىق ا.ن.وستروۆسكي اتىنداعى دراما تەاتر ۇجىمى گاسترولدىك ساپارمەن پەنزا وبلىسىنا بارىپ قايتتى. بايتەرەك اۋدانى ورىنبور قالاسىندا «تۋعان جەرىم تاماشا» اتتى ادەمى كونتسەرت قويدى. مۇنداي مادەني بايلانىستار ەكى ەلاراسىنداعى دوستىقتى بەكىتە تۇسەرى انىق.
ورال قالاسىنداعى «اتامەكەن» ونەر ورداسىندا وتكەن ەكى وبلىس دەلەگاتسياسىنىڭ كەزدەسۋىندە ساراتوۆ وبلىسى ۇكىمەتى توراعاسىنىڭ ورىنباسارى الەكسەي نيكيتين باستاعان دەلەگاتسيا مۇشەلەرى كەزەگىمەن ءسوز الىپ, ەكىجاقتى ىسكەرلىك قارىم-قاتىناستىڭ پايداسى تۋرالى ويلارىن ورتاعا سالدى.
تاريحقا كوز سالساق, قازان توڭكەرىسىنە دەيىن ساراتوۆ ۋنيۆەرسيتەتىندە 6 قازاق وقىعان ەكەن. ءبىر قىزىعى, عۇمار ەسەنعۇلوۆ, ميراحمەد نيازوۆ, باتىرعالي جۇسىپقاليەۆ, باقتىعالي بيسەنوۆ, ىقىلاس شۇعىلوۆ, ەسەنعالي قاسابولاتوۆتىڭ ءبارى دە جوعارى دارىگەرلىك ءبىلىم العان. ارادا عاسىردان اسا ۋاقىت وتكەندە وسىناۋ ءبىلىم ساپارى تاعى جالعاساتىن ءتۇرى بار. ورالداعى كەزدەسۋ كەزىندە باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ابدراحمانوۆا مەن ۆ.ي.رازۋموۆسكي اتىنداعى ساراتوۆ مەملەكەتتىك مەديتسينا ۋنيۆەرسيتەتىنىڭ رەكتورى اندرەي ەرەمين ءوزارا ارىپتەستىك جونىندەگى مەموراندۋمعا قول قويدى.
باتىس قازاقستان وبلىسىندا جوعارى ءبىلىمدى دارىگەر ماماندار تاپشىلىعى كوپ جىلدان بەرى كۇن تارتىبىنەن تۇسپەي كەلە جاتىر. قازىردىڭ وزىندە وڭىردە 300-دەن استام دارىگەر – اكۋشەر-گينەكولوگ, انەستەزيولوگ, رەانيماتولوگ, كارديولوگ, نەۆرولوگ پەن تەراپەۆت, جالپى پراكتيكا دارىگەرلەرى مەن حيرۋرگتەر جەتىسپەيدى. ورال قالاسىنداعى جوعارى مەديتسينالىق كوللەدج بەن «ماقسات» مەديتسينالىق كوللەدجى جانىنان وسىدان ءتورت جىل بۇرىن جەرگىلىكتى ستۋدەنتتەردى ساراتوۆ ۋنيۆەرسيتەتىندە دايىنداۋ ماقساتىندا رەسۋرستىق ورتالىق اشىلعان بولاتىن. رەسەيلىك قوناقتار وسى ورىنداردى ارالاپ كورىپ, جۇمىسىمەن تانىستى.
ا.ەرەميننىڭ ايتۋىنشا, ساراتوۆ ۋنيۆەرسيتەتىندە قازىر 10 مىڭنان اسا ستۋدەنت ءبىلىم الادى. «سونىڭ 1400-دەن استامى الەمنىڭ 54 مەملەكەتىنەن كەلىپ وقيتىن شەتەلدىك جاستار. ءبىز رەسەي فەدەراتسياسىنىڭ ەڭ ۇزدىك جوعارى وقۋ ورىندارى قاتارىنا كىرەمىز. ورال قالاسىندا بولاشاق ستۋدەنتتەرىمىزدى دايارلايتىن رەسۋرستىق ورتالىققا تولىق اقپاراتتىق, ادىستەمەلىك كومەك كورسەتۋگە ءازىرمىز», دەدى رەكتور.
«باتىس قازاقستان ءۇشىن ساراتوۆ وبلىسى – نەگىزگى سەرىكتەستىڭ ءبىرى. بۇگىن ءبىز ىنتىماقتاستىقتى ودان ءارى نىعايتۋ كەلەشەگىن جان-جاقتى تالقىلاپ, ونى تەرەڭدەتۋ جونىندە پىكىر الماستىق. وسى مۇمكىندىكتى پايدالانا وتىرىپ, ساراتوۆتىق ارىپتەستەرىمىزدى بيىل كۇزدە باتىس قازاقستان وبلىسىندا وتەتىن قازاقستان-رەسەي فورۋمىنا شاقىرامىن», دەدى ناريمان تورەعاليەۆ قوس دەلەگاتسيانىڭ كەزدەسۋىن قورىتا كەلىپ.
رەسەيلىك تاراپ تا ەكىجاقتى بايلانىستاردى بەلسەندى دامىتۋعا, نىعايتۋعا دايىن ەكەنىن ءبىلدىردى.
باتىس قازاقستان وبلىسى