مال ۇرلىعىنا قارسى رەسپۋبليكالىق شارالار جۇرگىزۋ بارىسىندا سولتۇستىكقازاقستاندىق پينكەرتوندار قىزىق «ولجاعا» تاپ بولدى. اققايىڭ اۋدانىنداعى مال ۇرلىعىنا قاتىسى بولۋى مۇمكىن دەگەن كۇدىكپەن اۋىل تۇرعىندارىنىڭ ءبىرىنىڭ قوراسىن تەكسەرگەندە, ۇيىلگەن ءشوپ ماياسىنان ەكى بىردەي بەردەڭكە تابىلعان. تۇرعىن ونىڭ باباسىنان قالعان راريتەتتىك مۇرا ەكەنىن ايتقان.
باياعىدا, م.اۋەزوۆتىڭ «قاراش-قاراش وقيعاسى» حيكاياتىندا باس كەيىپكەر باقتىعۇل ۇستاعان بەردەڭكە وسىنداي. امەريكا وفيتسەرى حايرەم بەردان 1870 جىلى ويلاپ تاپقان بۇل قارۋدىڭ پاتەنتىن ورىس يمپەرياسى ساتىپ الىپ, تۋلا قارۋ جاساۋ زاۋىتىندا شىعارىپ, پاتشالىق اۋماعىنا تاراتقان. ول كەزدەگى ورىستىڭ قارۋى بۇدان الدەقايدا ساپاسىز بولعان. جالپى سانى 360 مىڭداي شىعارىلعان ەكەن. سول كەزدە ءبىراز داناسى قازاق دالاسىنا دا جەتكەن بولۋى كەرەك. باقتىعۇل قاس جاۋى جاراسبايدى جارتاستان كوزدەپ اتاتىن بەردەڭكەنىڭ بۇل ءتۇرى ۇڭعىسى ۇزىن بولعاندىقتان, الىستان تيەدى.
سوڭعى رەت رەسەي يمپەرياسى ونى ءبىرىنشى دۇنيەجۇزىلىك سوعىستا قولدانعان. 1916 جىلى مايدانداعى ارميادان الىنىپ, تىلداعى بولىمدەرگە تاراتىلعان كورىنەدى.
قازىر مۇنداي بەردەڭكەنى كەڭەستىك كينوفيلمدەردە ورمانشىلار مەن پارتيزانداردىڭ قولىنان ءجيى كورۋگە بولادى. كەيىن ولاردىڭ قالعان دانالارى اڭشىلىق قارۋ رەتىندە ساتىلعان. بۇل ءۇشىن مىلتىقتاردى بىتىرامەن اتۋعا بولاتىنداي ەتىپ زاۋىتتىق تاسىلمەن وزگەرتكەن.
ساراپشىلاردىڭ باعالاۋىنشا, اققايىڭدىق تۇرعىننىڭ مىلتىعى 30-جىلدارعا دەيىن وزگەرتىلگەن.
ال اققايىڭ تۇرعىنىنا وتباسىلىق مۇرامەن قوش ايتىسۋىنا تۋرا كەلدى. ويتكەنى مىلتىقتى تىركەلمەگەن قارۋ رەتىندە پوليتسيا تاركىلەپ, ءارى يەسىن اكىمشىلىك جاۋاپكەرشىلىككە تارتتى.
سولتۇستىك قازاقستان وبلىسى