سولتۇستىك قازاقستان وبلىسىندا دا «تازا قازاقستان» جالپىۇلتتىق ەكولوگيالىق اكتسياسى جاقسى ناتيجە بەرىپ كەلەدى. جۇيەلى جوبانىڭ ماۋسىمدىق ءىس-شارالارمەن, سەنبىلىكتەرمەن شەكتەلىپ قالماي, الەۋمەتتىك نورماعا اينالىپ, حالىق ساناسىندا ورنىعىپ, جالعاسىن تاۋىپ كەلە جاتقانىنا قالىڭ بۇقارا كۋا بولىپ وتىر.
بيىلعى جىلدىڭ ءبىرىنشى توقسانىندا وبلىستا اكتسيا اياسىندا شامامەن 90-عا جۋىق ءىس-شارا وتكىزىلدى. سونىڭ ءبارى دەرلىك, جاستاردىڭ باستاماسىمەن, ءتۇرلى فورماتتا ۇيىمداستىرىلدى. اتاپ ايتقاندا, 38 تازالىق مارافونى, 5 ەكوفەستيۆال, 8 كونكۋرس, 8 چەللەندج, 5 جابىق ورىنداردا كوگالداندىرۋ اكتسياسى, 15 ترەنينگ, 9 ءۆانداليزمنىڭ الدىن الۋ ءىس-شاراسى بولدى.
پەتروپاۆل قالاسىنىڭ مەكتەپتەرىندە بەلسەندىلەر مەن ۆولونتەرلەر وقۋشىلار اراسىندا قورشاعان ورتانى تازا ۇستاۋ جونىندە قىزىقتى اكتسيالار وتكىزدى. «قورشاعان ورتا – ول دا سەنىڭ ءۇيىڭ سياقتى, ءۇيىڭنىڭ ءىشىن قالاي تازا ۇستاساڭ, ەسىك الدىن, اۋلانى, كوشەنى دە سولاي تازا ۇستاۋ كەرەك. ويتكەنى بۇل سەنىڭ ءومىر ءسۇرۋ, ءوسۋ اۋماعىڭ, قۋانىشپەن كۇلەتىن, جادىراپ-جايناپ جۇرەتىن ورتاڭ» دەگەن ۇعىمداردى بالالاردىڭ قالاي تۇسىنگەنى تۋرالى كونكۋرستار ۇيىمداستىرىلدى, وقۋشىلاردىڭ ەكولوگيانى تازا ساقتاۋ, قورشاعان ورتانى قورعاۋ باعىتىنداعى شىعارماشىلىقتارى سارالاندى. وعان تالاپكەرلەر سالعان سۋرەتتەرىمەن, جازعان ولەڭدەرىمەن, كوركەم شىعارمالارىمەن قاتىستى. ۇزدىك شىققان وقۋشىلارعا سىيلىقتار مەن العىسحاتتار تابىس ەتىلدى.
«وسى ءىس-شارانىڭ ءبارى جاس جەتكىنشەكتەردىڭ بويىندا ەكولوگيالىق تازالىقتى ساقتاۋ ۇعىمىن قالىپتاستىرۋ, دامىتۋ ماقساتىندا وتكىزىلدى. سايىپ كەلگەندە, بۇل جۇمىستار جاستاردىڭ پاتريوتتىق سەزىمىن وياتىپ, ءوز ەلىنە, ءوز جەرىنە دەگەن ماحابباتىنىڭ جاندانۋىنا اسەر ەتەدى. وقۋشىلاردىڭ ىسكە دەگەن ىنتالىلىعى ءبىزدىڭ دە قۇلشىنىسىمىزدى ارتتىردى», دەيدى پەتروپاۆل قالالىق جاستار رەسۋرستىق ورتالىعىنىڭ جەتەكشىسى دامير ءابدين.
«ناۋرىزناما – 2025» ونكۇندىگى اياسىندا اۋلالاردى تازارتۋ, جالعىزىلىكتى قارت ادامدارعا كومەكتەسۋ جونىندە قىرىققا جۋىق ءىس-شارا ۇيىمداستىرىلدى. بىلتىر جىل بويى وسىنداي قامقورلىق ءىس-شاراسى, ەكولوگيالىق اكتسيالارعا جاستار اراسىنان 5 مىڭداي ۆولونتەر قاتىستى. تازالىق ساقتاۋ اكتسيالارىنا 10 مىڭنان ارتىق ادام تارتىلدى. بيىل دا 300-دەن استام ەكولوگيالىق اكتسيا مەن ءىس-شارا جوسپارلانىپ وتىر. سونىڭ ىشىندە تۇراقتى جۇرگىزىلەتىندەر قاتارىندا «تازا اۋلا – تازا وتان», «تابيعاتتى ايالا!», تاعى باسقا دا باتالى باستامالار بار. جاستار رەسۋرستىق ورتالىعى جالعىزىلىكتى قارتتاردىڭ اۋلالارىن تازارتۋ, وتىنىن دايىنداپ بەرۋ, كۇل-قوقىسىن سىرتقا شىعارۋ جونىندەگى «قامقور», «كومەك كەلىپ قالدى», «قايىرىمدىلىق» اكتسيالارىن تۇراقتى جۇرگىزەدى.
اكتسيالار مەن ءىس-شارالاردى ىلگەرىلەتۋ ماقساتىندا الەۋمەتتىك جەلىلەردە ەكوترەندتەر جاسالىپ, وعان ايماقتىق بلوگەرلەر, قوعامدىق پىكىردىڭ كوشباسشىلارى, دەپۋتاتتار, ارداگەرلەر, ۆولونتەرلەر, تانىمال سپورتشىلار تارتىلادى.
سولتۇستىك قازاقستان وبلىسى