اباي وبلىسىنىڭ مامانداندىرىلعان اۋدانارالىق سوتى سەمەيدە قاتارلاستارىن ۇرىپ-سوعىپ, ەل اراسىندا ۇلكەن رەزونانس تۋعىزعان جاسوسپىرىمدەردىڭ اتا-انالارىنا قاتىستى شەشىم شىعاردى, دەپ حابارلايدى Egemen.kz.
سوت ولاردى اتا-انالىق مىندەتتەرىن تيىسىنشە ورىنداماعانى ءۇشىن كىنالى دەپ تاۋىپ, اكىمشىلىك جازالار قولدانعان.
سوت شەشىمىمەن اتا-انالاردىڭ ءبىرى بەس تاۋلىككە اكىمشىلىك قاماۋعا الىنعان. تاعى ءتورت اتا-انا 78 640 تەڭگە ايىپپۇل تولەۋگە مىندەتتەلگەن.
«اتا-انالار ءوز بالالارىنىڭ مىنەز-قۇلقىنا ءتيىستى باقىلاۋدى قامتاماسىز ەتپەگەن. سوت بارلىق ءمان-جايلاردى ەسكەرە وتىرىپ, ءتيىستى شەشىم شىعاردى», دەلىنگەن حابارلامادا.
ەستەرىڭىزگە سالا كەتەيىك, اقپان ايىندا الەۋمەتتىك جەلىلەردە ءبىر توپ وقۋشىنىڭ باسقا ءبىر بالانى اياۋسىز ۇرىپ-سوعىپ جاتقان ۆيدەوسى تاراعان ەدى. جاۋاپقا تارتىلعانداردىڭ اراسىندا ۇلدار مەن قىزدار دا بولعان.
بۇعان دەيىن سوت جاسوسپىرىمدەرگە قاتىستى تالاپ ارىزداردى قاراعان ەدى.
13 جانە 16 جاستاعى ەكى قىز ارنايى مەكتەپكە جىبەرىلگەن. ولار بۇرىن دا زاڭ بۇزعانى انىقتالعان, مىسالى, قوعامدىق ورىنداردا الكوگولدىك ىشىمدىكتەر ىشكەن. 13 جاستاعى ۇل بالا دا ارنايى مەكتەپكە جىبەرىلگەن, سەبەبى ول ەكى اي ىشىندە ەكى رەت قىلمىس جاساعان.
ال ءۇش بالانىڭ قالعانى جاسىنىڭ كىشىلىگىنە بايلانىستى اۋىر جازاعا تارتىلماي, ەكەۋىنىڭ جاسى 11-گە تولماعاندىقتان ولار يۋۆەنالدىق پوليتسياعا ەسەپكە الىنعان.
سونىمەن قاتار, ءۇش وقۋشىنىڭ اتا-انالارىنىڭ اتا-انالىق قۇقىقتارىنان ايىرۋ تۋرالى ۇسىنىس جاسالعان. سونداي-اق, جاسوسپىرىمدەر وقىعان ءبىلىم مەكەمەلەرىنىڭ باسشىلارىنا قاتىستى تارتىپتىك شارالار قابىلدانىپ, ءبىر مەكتەپ ديرەكتورى جۇمىستان بوساتىلدى.
قۇقىق قورعاۋ ورگاندارى وقيعا ءمان-جايلارىن تەرگەپ جاتىر. بيلىك وكىلدەرى جاسوسپىرىمدەردى تاربيەلەۋ مەن ولاردىڭ مىنەز-قۇلقىنا باقىلاۋدى كۇشەيتۋدىڭ قاجەتتىلىگى تۋرالى مالىمدەدى.
بۇعان دەيىن, قازاقستاندىقتار زارداپ شەككەن بالاعا پاتەر ساتىپ الۋ ءۇشىن ءۇش كۇن ىشىندە 35 ميلليون تەڭگە جيناعان ەدى.