ۇلتتىق مۋزەيدە مۋزەي پەداگوگيكاسى جانە بالالار شىعارماشىلىعى ءبولىمىنىڭ ۇيىمداستىرۋىمەن «تاريحي تۇلعالار» جوباسى اياسىندا حالىق جازۋشىسى مۇحتار ماعاۋيننىڭ 85 جىلدىعىنا وراي «تاريحتان تاعىلىم تارتقان» اتتى مۋزەيلىك ءدارىس ءوتتى.
كەزەكتى مۋزەيلىك ءدارىس قازاقتىڭ وشكەنىن جاڭعىرتىپ, تاريحىن قالىپتاعان دارىن يەسى مۇحتار ماعاۋيننىڭ شىعارماشىلىعىنا ارنالدى. تاريحي رومان جانرىنىڭ دامۋىنا ىقپال ەتكەن تاۋ تۇلعانىڭ پروزالىق شىعارمالارىنا توقتالىپ, ونى جاستارعا ناسيحاتتاپ, ءبىلىم قورىن جەتىلدىرۋ ماقساتىندا وتكەن ءىس-شارا جازۋشىنىڭ رۋحى ەشقاشان ولمەيتىنىن ءبىلدىردى.
ادەبي باسقوسۋعا «Túrkistan» گازەتىنىڭ باس رەداكتورىنىڭ ورىنباسارى توقتارالى تاڭجارىق, «Alqa» ادەبي-مادەني كلۋبىنىڭ جەتەكشىسى, مادەنيەتتانۋشى جانار تاڭسىق, م.جۇماباەۆ اتىنداعى حالىقارالىق كوللەدج ستۋدەنتتەرى, ا.قۇنانباي ۇلى اتىنداعى №87 مەكتەپ-گيمنازياسىنىڭ وقۋشىلارى قاتىستى.
القالى جيىن كورنەكتى قالامگەردىڭ جازىپ كەتكەن تاريحي مۇرالارىن تالداپ, ءتۇسىنىپ, ۇرپاق جادىنا ءسىڭىرۋ, عيبراتتى عۇمىرىن كەيىنگە جەتكىزۋدى ماقسات ەتەدى. دارىسكەرلەر جازۋشىنىڭ تاريحي ەڭبەكتەرىنە توقتالىپ, روماندارىنا تالداۋ جاسادى. سونداي-اق ءىس-شارا بارىسىندا قالامگەردىڭ ءومىرى مەن قىزمەتى باياندالعان بەينەسيۋجەت ۇسىنىلىپ, تالانتتى جاستاردىڭ ورىنداۋىندا كۇي تارتىلدى. قاتىسۋشىلار تاراپىنان جازۋشىنىڭ شىعارمالارىنا قاتىستى سۇراقتار قويىلىپ, ءىس-شارا ماراپاتتاۋ راسىمىمەن اياقتالدى. العىسحاتتار تابىستالىپ, دارىسكەرلەر جاستارعا اقجارما تىلەگىن ءبىلدىردى.