بۇل كۇندەرى وبلىس ورتالىعىنداعى «گوفروتارا» جشس كاسىپورنى قۋاتتىلىعىن ارتتىردى. زاۋىت باسشىلىعى 200 ميلليون تەڭگەدەن استام ينۆەستيتسيا تارتىپ, گوفرو ونىمدەرىنىڭ اۋقىمىن 2 ميلليون 1 مىڭ شارشى مەترگە جەتكىزدى. جالپى, بۇل جوبا ەلىمىزدە قابىلدانعان يندۋستريالىق-يننوۆاتسيالىق دامۋ باعدارلاماسى بارىسىندا جۇزەگە اسىرىلۋدا. كاسىپورىن جاڭا تەحنولوگيامەن جۇمىس جاسايدى. ناتيجەسىندە ءۇش قاباتتى جانە شاعىن گوفرر قاتتى كارتون قاعازدار شىعارۋ مۇمكىندىگىنە يە بولدى. كاسىپورىن باسشىلىعى الداعى ۋاقىتتا رەسەي, ورتالىق ازيا نارىعىنا شىعۋدى جوسپارلاپ وتىر. وندىرىستە 100 ادام جۇمىس جاسايدى.
– باسەكەگە قابىلەتتى ونىمگە ارقاشان سۇرانىس بار. ەلباسى ەلىمىزدەگى كاسىپكەرلىك ۇلتتىق ەكونوميكانىڭ ىلگەرىلەتۋشى كۇشىنە اينالۋعا ءتيىس دەپ شاعىن جانە ورتا بيزنەستىڭ ۇلەسىن كەمىندە ەكى ەسەگە ارتتىرۋ قاجەتتىگىن مىندەتتەپ وتىر. ال, 2015 جىلدىڭ 1 قاڭتارىنان باستاپ ەۋرازيالىق ەكونوميكالىق وداق ءوز جۇمىسىن باستادى. ەلىمىزدىڭ ءوسىپ-وركەندەۋىنە جول اشاتىن ينتەگراتسيالىق ۇيىمعا بىرىگۋدى, ارينە, ءبىزدىڭ كاسىپورىن وكىلدەرى دە قولدايدى. وداققا مۇشە ەلدەردىڭ اراسىندا باسەكەلەستىك كۇشەيىپ, ساپالى ونىمدەردىڭ كولەمى ارتا تۇسەدى. دۇنيەجۇزىلىك ساۋدا ۇيىمىنا مۇشەلىككە جول دەگەن ءسوز. شاعىن جانە ورتا بيزنەستىڭ دامۋىنا ىقپال ەتەدى. تاۋار ءوندىرۋ ءبىر باسقا, ونى ساتۋ ءبىر باسقا. ءونىمىمىزدى وتكىزە الاتىن ۇلكەن نارىق كەرەك. جالپى, رەسەي جانە بەلورۋسسيا ەلدەرىمەن قوسىلىپ, ساۋدا-ساتتىق جولىندا شەكارامىزدى اشقانىمىز وتاندىق كاسىپكەرلەر ءۇشىن ءتيىمدى. كەدەن وداعى قۇرىلماي تۇرعان كەزدە تاۋارلارىمىزدى شەتەلگە وتكىزۋگە ەركىندىك از ەدى, دەيدى كاسىپورىن باسشىسى گۇلنار قايداروۆا.
گۇلناردىڭ ايتۋىنشا, «بيزنەستىڭ جول كارتاسى-2020» باعدارلاماسىنىڭ كاسىپكەرلەرگە كومەگى ءتيىپ, جەڭىلدەتىلگەن نەسيەگە قولدارى جەتىپتى. قازىر كاسىپورىن 2006 جىلى العاش اشىلعان جىلدارعا قاراعاندا ءوندىرىسىن بۇرىنعىدان 2-3 ەسە ۇلعايتىپتى. ويتكەنى, جاڭادان الىنعان قۇرال-جابدىقتار زاۋىتتان شىعاتىن قاعاز ونىمدەرىنىڭ ساپاسىن جاقسارتتى. قاتتى قاعازداردان, ياعني گوفروكارتوننان ءبىر-بىرىمەن جالعاسقان اۆتوماتتى قۇرىلعىلاردىڭ سوڭىنا دەيىن ارالاپ شىققاندا نە جاسالىپ جاتقانىن كوزىڭمەن كورەسىڭ. عاجايىپ شەتەلدىك اۆتوماتتى قۇرىلعىلار ءبىرى قاعازدى قيىپ, ەكىنشىسى ورنەكتەپ, ءۇشىنشىسى بۇكتەپ, كۇندەلىكتى كورىپ جۇرگەن جۇمىرتقا سالاتىن گوفروكارتون قوراپشالار جاساپ شىعادى. تسەح ءىشى تازا, جارىق. اۆتوماتتى جەلىمەن باسقارىلاتىن جاڭارعان, جاڭا زامان كاسىپورنى دەگەن وسى. ۇزىن جەلىنىڭ ءبىر باسىنا قويىلعان قاعاز وراماسى ارنايى قوندىرعىلار ارقىلى شيراتىلىپ, كەسىلەدى دە, ەكىنشى شەتىنە دايىن قوراپ تۇرىندە شىعادى. جەلى بويىندا قالعان قاعاز قالدىقتارى جينالىپ الىنادى. قايتا وڭدەۋدەن وتكىزىپ, وندىرىسكە جاراتادى. جاڭا تەحنولوگيا ارقاسىندا «گوفروتارا» سەرىكتەستىگى بۇگىندە ەلىمىزدىڭ قاعاز ونىمدەرى رىنوگىنىڭ 20 پايىزىن الىپ وتىر. بۇكىل وبلىستارمەن جۇمىس جاسايدى. كاسىپورىن ونىمدەرىنە قىزىعۋشىلىق تانىتقان رەسەي, تاجىكستان بيزنەس وكىلدەرى دە كەلىپ كەتىپتى. گوفروكارتوننان جاسالعان قوراپشالار ساپالى, باعالارى جوعارى. ويتكەن, قوراپشالار جاسالاتىن قاعاز قۇرامىندا تسەلليۋلوزا بار. ول رەسەيدەن جەتكىزىلەدى. گۇلنار الداعى ۋاقىتتا تەتراپاك قوراپتارىن شىعارۋدى قولعا الماقشى. قازىر گوفروكارتون ونىمدەرى, ەلىمىزدىڭ قۇس فابريكالارىنا قاجەتتى جۇمىرتقا سالاتىن شۇڭقىرلى قوراپشالار, ازىق-ت ۇلىك قوراپتارى جاسالادى. مىسالى, قاراعاندى, قوستانايدىڭ كامپيتتەرىن تسەحتاردان ورالىپ شىققاننان كەيىن پاۆلودارلىق «گوفروتارا» سەرىكتەستىگى شىعارعان دايىن قوراپتار كۇتىپ تۇرادى. شاعىن كاسىپورىن وتاندىق رىنوكتا جۇمىرتقا قوراپشالارىن شىعارۋ ارقىلى تانىلدى.
– العاشىندا نەبارى 100 مىڭ شارشى مەتر قاعاز ورامدارىن شىعاردىق. كوبى جارامسىز قالاتىن, وندىرىستىك جەلى ەسكى بولدى. ال, قازىر گوفرو-جۇمساق-بۇرتىك كارتون جاسايتىن زاماناۋي جوعارى تەحنولوگيالىق جەلى جۇيەسىندە جۇمىس جاسايدى. كاسىپورىن الدىندا جوسپار-جوبالار تۇر. سۇرانىس كوپ.تاپسىرىس كوبەيگەن سايىن كاسىپورىن تىرشىلىگى دە العا باسۋدا. سوندىقتار, بىزدەر سەكىلدى كاسىپورىندار, شاعىن جانە ورتا بيزنەس ەۋرازيالىق ەكونوميكالىق وداق اياسىندا جاڭا قارقىنعا يە بولادى دەپ ويلايمىن. ەكونوميكالىق ىقپالداستىقتىڭ بىزگە, كاسىپكەرلەرگە باستى ناتيجەسى سول – وندا كەڭ اۋقىمدى نارىق اشىلادى. باسەكەلەستىك پايدا بولادى, ءبىر سوزبەن ايتقاندا, بيزنەس داميدى, – دەيدى كاسىپكەر گۇلنار قايداروۆا.
فاريدا بىقاي,
«ەگەمەن قازاقستان».
پاۆلودار.