قازاقتىڭ قۇراق كورپەسى اقش-قا قالاي جەتتى؟ افريكا, ءۇندىستان مەن تۇركيا تورىنەن ويۋلى جاستىقتار قالاي ورىن الدى؟ بۇل سۇراقتىڭ جاۋابىن تۇركىستان وبلىسىنىڭ كاسىپكەرى ۇلبولسىن وسكەنبايقىزىنان سۇرادىق.
ول بالا كۇنىنەن قۇراق قۇراۋدى اجەسىنەن ۇيرەنىپ, ۇلتتىق ونەردى كاسىپكە اينالدىردى. بۇگىندە ونىڭ قولىنان شىققان بۇيىمدار ەلىمىزدەن تىس, شەتەلگە دە كەڭىنەن تارالعان.
– قۇراق كورپە – جاي عانا توسەنىش ەمەس, بۇل – ءومىر فيلوسوفياسى. اجەم ماعان ءار ءتۇستىڭ, ءار ورنەكتىڭ وزىندىك ءمان-ماعىناسى بار ەكەنىن ۇيرەتتى. ال مەن سول ونەردى زامانعا ساي جاڭارتىپ, بيزنەسكە اينالدىردىم, – دەيدى ۇلبولسىن.
2019 جىلى مەملەكەتتىك گرانت ۇتىپ, كاسىبىن باستاعان. باسىندا تەك تۋعان-تۋىسقا تىگىپ جۇرسە, ۋاقىت وتە كەلە ۇلتتىق بۇيىمدارعا سۇرانىستىڭ جوعارى ەكەنىن بايقاپ, بۇل ءىستى كەڭەيتۋدى قولعا العان. قازىر ونىڭ ۇلتتىق ناقىشتاعى كورپەلەرى, جاستىقتارى مەن توسەنىشتەرى ەلىمىزدىڭ تۇكپىر-تۇكپىرىنە عانا ەمەس, شەتەلدەرگە دە جونەلتىلىپ جاتىر. امەريكاعا جىبەرىلگەن العاشقى تاپسىرىسى قازاق دياسپوراسىنىڭ سۇرانىسىنان باستالىپتى. كەيىن ۇلتتىق ناقىشتاعى كورپەلەردى شەتەلدىك ديزاينەرلەر دە باعالاپ, ەتنوستىق ستيلدەگى ينتەرەر ءۇشىن ساتىپ الا باستاعان. تۇركيادا – قوناقۇيلەر, ءۇندىستاندا – يوگا ورتالىقتارى, افريكادا – ۇلتتىق ستيلدەگى ۇيلەر قازاقتىڭ قۇراق كورپەلەرىمەن كومكەرىلگەن.
– قازىرگى ترەند – تابيعيلىق پەن بىرەگەيلىك. قولدان جاسالعان, ساپالى ءارى ەرەكشە بۇيىمدارعا سۇرانىس جوعارى. مەن ءوز جۇمىسىمدا تەك تابيعي ماتەريالداردى قولدانامىن. كورپەلەردىڭ ىشكى قاباتى تازا ماقتادان جاسالادى, ال سىرتىنا بارقىت, ۆەليۋر سياقتى ساپالى ماتالار تاڭدايمىن. بۇل ونىمدەردىڭ ۇزاق ۋاقىت قىزمەت ەتۋىنە جانە دەنساۋلىققا پايدالى بولۋىنا كەپىلدىك بەرەدى. ۇلتتىق ونەر – تەك مادەني مۇرا عانا ەمەس, ەكونوميكانىڭ دا ءبىر بولىگى. بۇرىن قۇراق قۇراۋ – اجەلەردىڭ ەرمەگى دەپ قارالسا, قازىر بۇل ۇلكەن نارىققا شىققان ونەر. ءبىز ءوز مۇرامىزدى دارىپتەپ قانا قويماي, ودان تابىس تا تابا الامىز. ەڭ باستىسى – ساپا مەن ەرەكشەلىك, – دەيدى كاسىپكەر.
بۇگىندە ول ۇلتتىق ونەردىڭ اماناتىن ارقالاعان كاسىپكەر. جەرگىلىكتى ايەلدەردى جۇمىسپەن قامتىپ, شەبەرلىك ساباقتارىن وتكىزىپ, قۇراق قۇراۋدىڭ قىر-سىرىن جاستارعا ۇيرەتىپ ءجۇر. ونىڭ ايتۋىنشا, ۇلتتىق ونەرگە سۇرانىس ەشقاشان ازايمايدى, ويتكەنى بۇل – حالىقتىڭ جانى, تاريحى مەن مادەنيەتى. قۇراق كورپە – تەك قازاقتىڭ عانا ەمەس, الەمدىك ءسان يندۋسترياسىنىڭ دا ءبىر بولىگىنە اينالىپ كەلەدى. قۇراق كورپەلەردىڭ باعاسى 22-30 مىڭ تەڭگە ارالىعىندا بولسا, كەستەلى, كۇردەلى جۇمىستارى 500 مىڭ تەڭگەدەن باستالادى. وندىرىستىك شىعىنداردى ەسەپتەگەندە, ءبىر كورپەنىڭ وزىندىك قۇنىنان ساتىلىم باعاسى ەكى-ءۇش ەسە جوعارى. ياعني مارجا وتە ءتيىمدى. ەكسپورتتىق نارىقتا ەتنوستىق ستيلدەگى بۇيىمدارعا سۇرانىس ارتىپ كەلە جاتقانىن ەسكەرسەك, بۇل كاسىپتىڭ الەۋەتى ودان دا جوعارى.