قىزىققا تولى قىزىلجار

بارلىق مەكەمە-ۇيىمدار مەن وقۋ ورىندارىندا ۇلتتىق كيىم كيگەن جاندار وزدەرىنىڭ ارىپتەستەرىنە بارىپ, ءبىر-بىرىمەن كورىسىپ, قىستان امان شىققان قۋانىشتارىن بىرلەسىپ اتاپ ءوتتى. ال قالانىڭ مادەنيەت ۇيىندە «تەرىسكەي» فولكلورلىق-ەتنوگرافيالىق ءان­­سامبلى ونەر كورسەتىپ, قالا جۇرت­شى­لىعىنا كونتسەرت قويدى.

شاڭىراق كۇنىن بىرنەشە ونەر ۇجىمى كوپتەگەن الاڭدا كونتسەرتتىك باعدارلامالارىمەن اتاپ ءوتتى. سونىڭ ىشىندە پارتيزان كوشەسىندەگى 12, ش.ءۋاليحانوۆ كوشەسىندەگى 32,34,36 كوپقاباتتى ۇيلەردىڭ الدىنداعى كونتسەرتتەر تۇرعىنداردى قۋانىشقا بولەدى. مۇندا قازاق اندەرىمەن قاتار باسقا ەتنوستاردىڭ دا ونەرلەرى حالىققا پاش ەتىلدى. ءار ەتنوس ونەرپازدارى ۇلتتىق كيىمدەرىن كيىپ, ءان شىرقاپ, بي بيلەدى. اسىرەسە قاپ تاۋىنىڭ وكىلدەرى ساتىر-سۇتىر ەتكەن بيلەرىمەن كورەرمەندەردىڭ دەلەبەسىن قوزدىردى. 

ۇلتتىق كيىم كۇنى وبلىستىق مۋزەيدە بەلگىلى ەتنوديزاينەر تىلەك سۇلتاننىڭ «كيەلى كيمەشەك» كورمەسى بولدى. كيمەشەك – قازاق جۇرتشىلىعى قۇرمەتتەيتىن ايەلدەردىڭ باسكيىمى. ول انانىڭ ارداقتى ەسىمىمەن بايلانىس­تى قاسيەتتى ۇعىم. ەلىمىزدىڭ ايماق­تا­رىندا كيمەشەكتىڭ ءار ءتۇرى بولا­دى, بىراق ونىڭ قاسيەتى مەن قادىرى بارلىق ولكەدە بىردەي. وسى كۇندى س.شايمەردەنوۆ اتىنداعى قازاق كلاسسيكالىق گيمنازياسىنىڭ وقۋ­شىلارى دا ايرىقشا اتاپ ءوتتى. بۇل ۇجىم وبلىستىق ءبىلىم باس­قار­ماسى باستاعان چەللەندجگە قاتى­سىپ, قازاقتىڭ رۋحى مەن ءدىلىن سيپاتتايتىن ۇلتتىق كيىمدەرىمىزدى جارنامالاۋعا بەلسەنە قاتىستى.

تيميريازەۆ اۋدانى ستەپنوي اۋى­لىنىڭ تۇرعىندارى جاڭارۋ كۇنىن اتاپ ءوتتى. وبلىس اكىمى ع.نۇرمۇحامبەتوۆ اۋىل تۇرعىندارىمەن بىرگە وسى كۇندى قارسى الىپ, مەكتەپ وقۋشىلارىنىڭ ونەرلەرىن تاماشالادى. سونىمەن قاتار ول تاسقىنعا دايىندىق پەن اۋداندىق اۋرۋحانانىڭ كۇردەلى جوندەۋ جۇمىستارىن تەكسەردى.

ۇلتتىق سپورت كۇنىنىڭ شەڭبەرىندە قىزىلجار اۋدا­نىنىڭ ورتالىعى بەسكول اۋىلىندا قازاقشا كۇرەستەن جارىس ءوتتى. قازاق كۇرەسىنەن جاتتىقتىرۋشى بولىپ جۇرگەن بەيبىت سادۋاقاسوۆتىڭ ايتۋىنا قاراعاندا, اۋداندا سپورتتىڭ وسى ءتۇرى قارىشتاپ دامىپ كەلەدى ەكەن. ء«بىزدىڭ شاكىرتىمىز ادىلەت مىرزاش ازيا كۋبوگىنىڭ قولا جۇلدەگەرى, ال مۇحامەت مۇستاحىم دەگەن شاكىرتىمىز ەل چەمپيوناتىنىڭ كۇمىس جۇلدەگەرى بولدى», دەدى ول. جارىسقا 12-13 جانە 15-16 جاستا­عى جاسوسپىرىمدەر قاتىسىپ, ۇل­كەن سپورت سارايىنىڭ ءىشىن قىزىق­تى دۋمانعا بولەدى.

ىنتىماق كۇنى ناۋرىز مەيرامىنىڭ رەسمي تۇردە اشىلۋ سالتاناتى بولدى. كۇن جارقىراپ, تۇرعىنداردىڭ ءبارىن قالانىڭ باس الاڭىنا شاقىرعانداي, جينالعان حالىقتان ينە شانشار بوس جەر جوق. ءبىر جاقتا بۋى بۇرقىراعان ناۋرىز كوجە, باسقا دا تاماقتار ءپىسىرىلىپ جاتىر. ۇلكەن ساحنانى اينالدىرا بيىلعى مەرەيتوي يەلەرى سماعۇل سادۋاقاس ۇلىنا, ءسابيت مۇقانوۆقا, ەبىنەي بوكەتوۆكە, ت.ب. جەكە-جەكە اتاۋلى كيىز ۇيلەر تىگىلىپتى. ولارعا كىرگەن ادامدار ارىستار تۋرالى اقپاراتتار الادى. مىسالى, وبلىستىق س.مۇقانوۆ اتىنداعى كىتاپحانا تىككەن سابەڭ­نىڭ كيىز ۇيىنە الماتىدان جازۋ­شىنىڭ نەمەرەسى دە كەلگەن ەكەن. ال ءۇيدىڭ ىشىندەگى بارلىق ەكسپونات پەن جازۋشىنىڭ ءومىرى مەن شىعارماشىلىعى تۋرالى اقپاراتتى كىتاپحاناشى قايىرجان قازيقىزى كىرگەندەرگە ايتىپ بەرىپ تۇردى.

كەلەسى كۇندەرى ناۋرىز مەيرامى جالعاسىن تابادى. ول بيىل قىزىلجارعا ايرىقشا جىلى كۇندەرمەن كەلدى.

پەتروپاۆل