الماتى وبلىسىندا «تازا قازاقستان» جوباسى اياسىندا حالىقارالىق قۇستار كۇنىنە وراي ەكولوگيالىق اكتسيا ءوتتى. وعان ستۋدەنتتەر مەن مەكتەپ وقۋشىلارى بەلسەنە اتسالىسىپ, ءوڭىر ەكوجۇيەسىن قورعاۋعا ءوز ۇلەستەرىن قوستى. سونىڭ ءبىرى قوناەۆ قالاسىنىڭ كوپسالالى كوللەدجىنىڭ بازاسىندا ۇيىمداستىرىلدى.
تابيعي رەسۋرستار جانە تابيعاتتى پايدالانۋدى رەتتەۋ باسقارماسىنا قاراستى ورمان شارۋاشىلىقتارىنىڭ قولداۋىمەن كوللەدج ستۋدەنتتەرى ءوز قولدارىمەن 1 000 قۇسقا ۇيا جاساپ, ولاردى ءبىلىم بەرۋ مەكەمەلەرىنىڭ اۋماعىنا وقۋشىلارمەن بىرگە ورناتتى. وسىلايشا, قۇستارعا جاڭا ءارى قاۋىپسىز ۇيا سالاتىن ورىندار جاسالدى.
«Taza Like» اكتسياسى ءبىر اي بويى جالعاسىپ, الماتى وبلىسىنىڭ 9 اۋدانىن قامتيتىن بولادى. اكتسيانىڭ باستى ماقساتى – تابيعاتقا ۇقىپتى قاراۋدى ناسيحاتتاۋ, ەكولوگيالىق مادەنيەتتى دامىتۋ, قورشاعان ورتاعا جاۋاپكەرشىلىكپەن قاراۋعا تاربيەلەۋ.
«قورشاعان ورتانى قورعاۋ, قۇستارعا جاناشىرلىق جاساۋ سىندى ەكولوگيالىق سانا بالالىق شاقتان قالىپتاسادى, تابيعاتقا قامقورلىق – بولاشاققا جاسالعان ينۆەستيتسيا», دەيدى اكتسيانى ۇيىمداستىرۋشىلار.
الماتى وبلىسى