ناۋرىز مەرەكەسى قارساڭىندا اق تۇيەنىڭ قارنى جارىلعان ادەمى وقيعا ورىن الدى. قوسشى قالاسىندا ەلىمىزدەگى ەڭ العاشقى كوپسالالى كوميۋنيتي-ورتالىق – حالىقارالىق ستاندارتتارعا ساي سالىنعان اۋقىمدى مادەني-سپورتتىق كەشەنى اشىلدى.
جاڭا جوبا بولات وتەمۇراتوۆ قورىنىڭ باستاماسىمەن جۇزەگە اسىرىلىپ, قالا ينفراقۇرىلىمىنىڭ دامۋىنا قوسىلعان ەلەۋلى ۇلەس بولدى. جالپى اۋماعى 8,5 مىڭ شارشى مەتردى قۇرايتىن ورتالىق ءبىر مەزگىلدە مىڭعا جۋىق ادامدى قابىلداي الادى. قۇنى 20 ميلليون دوللار بولاتىن عيمارات قالا مەنشىگىنە تەگىن بەرىلدى.
«قالا مارتەبەسى بەرىلگەنىنە نەبارى ءتورت جىل وتسە دە, قوسشىدا الەۋمەتتىك نىسانداردى سالۋ مەن جاڭعىرتۋ قارقىندى ءجۇرىپ جاتىر. بۇگىن ءبىز ەلىمىزدە العاش رەت حالىقارالىق ستاندارتتارعا ساي كوپفۋنكتسيونالدى كەشەننىڭ اشىلۋىنا كۋا بولدىق. بۇل جوبا مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسى اياسىندا بولات وتەمۇراتوۆ قورىنىڭ قولداۋىمەن جۇزەگە اسىرىلدى. مۇندا بالالار مەن ەرەسەكتەر ءۇشىن بارلىق زاماناۋي جاعداي جاسالعان», دەدى وبلىس اكىمى مارات احمەتجانوۆ عيماراتتىڭ اشىلۋ سالتاناتى كەزىندە.
ورتالىق سپورتتىق, ءبىلىم بەرۋ جانە مادەني-دەمالىس ايماقتارىن بىرىكتىرەدى. مۇندا 233 ورىندىق كينوتەاتر, 300 ادامعا ارنالعان لەكتسيا, كورمە جانە كونفەرەنتسيا زالدارى, ستۋديالار, كوۆوركينگ پەن وقۋ زالى بار كىتاپحانا ورنالاسقان. اۋماعىندا سپورت الاڭدارى, ۆوركاۋت ايماقتارى مەن سەرۋەنگە ارنالعان اللەيا بار. روبوتوتەحنيكا, شاحمات, حورەوگرافيا جانە قولدانبالى ونەر ۇيىرمەلەرى جۇمىس ىستەيتىن بولادى. ەرەسەكتەرگە ارنالعان ىڭعايلى جۇمىس, دەمالىس جانە قارىم-قاتىناس كەڭىستىگى قاراستىرىلعان. سەكتسيالار مەن ۇيىرمەلەردىڭ اقىسى قولجەتىمدى بولادى.
ء«بىز جىلدار بويى مەملەكەتكە قولداۋ كورسەتىپ, ءار وتانداسىمىز ءۇشىن قولجەتىمدى, زاماناۋي ءارى جايلى ينفراقۇرىلىم قالىپتاستىرۋعا ۇلەس قوسىپ كەلەمىز. بۇل جوبادا الەمدىك تاجىريبەنىڭ وزىق ۇلگىلەرىن نەگىزگە الدىق. باستى ماقساتىمىز – ورتالىققا كەلگەن ءار ادامنىڭ ءوز الەۋەتىن ىسكە اسىرىپ, قوسشىداعى ءومىر ساپاسىن ارتتىرۋىنا مۇمكىندىك جاساۋ», دەدى قامقورشىلىق كەڭەسىنىڭ توراعاسى الماز شارمان.
ورتالىقتىڭ اشىلۋىنا پرەمەر-ءمينيستردىڭ ورىنباسارى ەرمەك كوشەرباەۆ, قر مادەنيەت جانە اقپارات ۆيتسە-ءمينيسترى ەۆگەني كوچەتوۆ قاتىستى.
كوميۋنيتي-ورتالىق – بۇل ءبىلىم الۋ, شىعارماشىلىق جانە بەلسەندى دەمالىس ءۇشىن اشىق ءارى قولجەتىمدى كەڭىستىك ۇسىناتىن زاماناۋي حالىقارالىق فورمات. مۇنداي ورتالىقتار جەرگىلىكتى قاۋىمداستىقتىڭ دامۋىنا جانە الەۋمەتتىك بايلانىستاردىڭ نىعايۋىنا ىقپال ەتەدى.
بۇل بولات وتەمۇراتوۆ قورىنىڭ قوسشى قالاسىنا تارتۋ ەتكەن ەكىنشى الەۋمەتتىك نىسانى. بۇعان دەيىن 2023 جىلدىڭ قىركۇيەگىندە قور قالاعا 1500 ورىندىق زاماناۋي مەكتەپتى سىيعا تارتقان بولاتىن. سونىمەن قاتار قوسشىدا دەمەۋشىلىك قاراجات ەسەبىنەن زاماناۋي كوپسالالى اۋرۋحانا قۇرىلىسى جۇرگىزىلىپ جاتىر.
اقمولا وبلىسى