بۇگىن تۇركيا پرەزيدەنتى رەجەپ تايىپ ەردوعاننىڭ باستى ساياسي قارسىلاسى ىستانبۇل قالاسىنىڭ مەرى ەكرەم يماموگلۋ مەن ونىڭ ءباسپاسوز كەڭەسشىسى مۇرات ونگۋن ارنايى وپەراتسيا كەزىندە تۇتقىندالعان ەدى. ىسكە قاتىستى بارلىعى 100 ادام كۇدىكتى رەتىندە تەرگەلىپ جاتىر, دەپ حابارلايدى Egemen.kz.
تۇركيانىڭ رەسمي وكىلدىگىنىڭ حابارلاۋىنشا, ىستانبۇل باس پروكۋراتۋراسى جۇرگىزىپ وتىرعان تەرگەۋ اياسىندا بۇگىن تاڭەرتەڭ 106 كۇدىكتىگە, سونىڭ ىشىندە ىستانبۇل مۋنيتسيپاليتەتىنىڭ اكىمىنە قاماۋعا الۋ تۋرالى وردەر بەرىلدى. بۇعان بايلانىستى ىستانبۇل باس پروكۋراتۋراسى ەكى ءتۇرلى تەرگەۋ جۇرگىزىپ جاتىر.
ءبىرىنشىسى – تەرروريزم قىلمىستارىن تەرگەۋ بيۋروسى تاراپىنان جۇرگىزىلىپ جاتقانى حابارلاندى. بۇل تەرگەۋ اياسىندا مۋنيتسيپاليتەت باسشىسى دا بار 7 ادامدى قاماۋعا الۋ تۋرالى وردەر شىعارىلدى. تەرگەۋ بارىسىندا كۇدىكتىلەر تەرروريستىك ۇيىمعا كومەكتەستى دەگەن ايىپ تاعىلىپ وتىر.
ەكىنشىسى – ۇيىمداسقان قىلمىستى تەرگەۋ بيۋروسى تاراپىنان جۇرگىزىلىپ جاتىر. بۇل تەرگەۋ اياسىندا مۋنيتسيپاليتەت باسشىسىن قوسا العاندا 100 كۇدىكتىگە قاماۋعا الۋ تۋرالى وردەر بەرىلدى. ولارعا پارا الۋ, بوپسالاۋ, تەندەرگە قاتىستى ءسوز بايلاسۋ, الاياقتىق جانە قىلمىستىق ۇيىم ارقىلى پايدا تابۋ ماقساتىندا جەكە دەرەكتەردى زاڭسىز يەمدەنۋ سەكىلدى قىلمىستار جاسادى دەگەن ايىپ تاعىلىپ وتىر. ەكى تەرگەۋدىڭ ناتيجەسىندە بارلىعى 106 كۇدىكتىگە قاتىستى قاماۋعا الۋ وردەرى شىعارىلدى.
ىستانبۇل باس پروكۋراتۋراسىنىڭ مالىمدەمەسىنە سايكەس, تەرگەۋ ماتەريالدارىندا MASAK (قارجىلىق قاداعالاۋ اگەنتتىگى) ەسەپتەرى, سالىق ساراپتامالارى, دەپوزيتتەر تۋرالى ەسەپتەر, كۋاگەرلەردىڭ ايعاقتارى جانە وزگە دە دالەلدەر قامتىلعان. تەرگەۋ بارلىق قىرىنان مۇقيات ءارى ەگجەي-تەگجەيلى جۇرگىزىلۋدە ەكەنىن حابارلاعان.
«تۇركيا رەسپۋبليكاسى – قۇقىقتىق مەملەكەت. ءبىزدىڭ كونستيتۋتسيامىزدىڭ 9-بابى وتە انىق:
سوت بيلىگى تاۋەلسىز جانە بەيتاراپ سوتتار ارقىلى تۇرىك ۇلتىنىڭ اتىنان جۇزەگە اسىرىلادى. بارلىعى زاڭ الدىندا تەڭ, ەشكىمگە نەمەسە ەشبىر توپقا ارتىقشىلىق بەرىلمەيدى. كونستيتۋتسيانىڭ 138-بابىنا سايكەس, سوتتار تاۋەلسىز. ەشبىر ورگان, مەكەمە, تۇلعا نەمەسە ينستانتسيا سوت بيلىگىن جۇزەگە اسىراتىن سۋديالارعا بۇيرىق نەمەسە نۇسقاۋ بەرە المايدى, تسيركۋليار جىبەرە المايدى, كەڭەس نەمەسە ۇسىنىس جاساي المايدى. قىلمىستىق ءىس جۇرگىزۋ كودەكسىنىڭ 157-بابىنا سايكەس, تەرگەۋ پروتسەسى قۇپياعا جاتادى», دەيدى تۇركيا رەسپۋبليكاسىنىڭ ادىلەت ءمينيسترى يىلماز تۋنچ. ونىڭ ايتۋىنشا, بۇل قۇپيالىلىق – ءادىل سوت جۇرگىزۋ, ادام قۇقىقتارىنىڭ بۇزىلماۋى, كىناسىزدىك پرەزۋمپتسياسىن ساقتاۋ جانە ابىروي مەن قادىر-قاسيەتتى قورعاۋ ءۇشىن وتە ماڭىزدى. ايىپتاۋلار مەن دالەلدەردى بىلمەي جاتىپ, باستالعان تەرگەۋگە باعا بەرۋ دۇرىس ەمەس.
سوندىقتان تاۋەلسىز جانە بەيتاراپ سوت ورگاندارى جۇرگىزىپ وتىرعان تەرگەۋلەرگە ساياسي سيپات بەرىپ, ولاردى «مەملەكەتتىك توڭكەرىس» دەپ اتاۋ – وتە قاۋىپتى جانە ورىنسىز. سونىمەن قاتار, تەرگەۋلەرگە قاتىستى جالعان اقپارات تاراتۋ, حالىقتى اداستىراتىن كوشە اكتسيالارىن ۇيىمداستىرۋ دۇرىس ەمەستىگىن دە جەتكىزدى.
سونىمەن بىرگە تۇركيا رەسپۋبليكاسىنىڭ ادىلەت ءمينيسترى قۇقىقتىق ادىلدىككە قول جەتكىزۋ ءۇشىن ەموتسياعا بەرىلمەي, سابىرمەن ارەكەت ەتۋىمىز قاجەتتىگىن جەتكىزگەن. بۇل ورايدا تەرگەۋ بارىسىندا تاعىلعان ايىپتار, قورعاۋ دالەلدەرى جانە دالەلدەمەلەر مۇقيات قاراستىرىلماق. تەرگەۋ قۇپياسى الىنعان سوڭ, قوعام بار شىندىقتى ايقىن ءارى اشىق تۇردە كورەدى.