استاناداعى قولجازبالار جانە سيرەك كىتاپتار ۇلتتىق ورتالىعىندا جەڭىستىڭ 80 جىلدىعىنا جانە كەڭەس وداعىنىڭ باتىرى, داڭقتى قولباسشى, جازۋشى باۋىرجان مومىش ۇلىنىڭ 115 جىلدىق مەرەيتويىنا وراي «باۋىرجان مومىش ۇلى – اتى اڭىزعا اينالعان قولباسشى» اتتى كورمە ءوتتى, دەپ حابارلايدى Egemen.kz.
مادەنيەت جانە اقپارات مينيسترلىگىنىڭ مالىمەتىنشە, كورمەدە باۋىرجان مومىش ۇلىنىڭ جەكە كۇندەلىگى, 1955-1956 جىلدارى كالينين قالاسىندا پايدالانعان قويىن داپتەرى, سوعىس كەزىندەگى قولدانعان جەكە كارتاسى, پورترەتى, فوتو-سۋرەتتەرى, قاھارماندىق ەرلىگى تۋرالى جازىلعان كوركەم تۋىندىلار مەن ۇلى وتان سوعىسى جايلى تاريحي كىتاپتار قويىلعان.
ءىس-شاراعا قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعىنىڭ وكىلدەرى, ۇلتتىق ۇلان ارداگەرلەر كەڭەسىنىڭ مۇشەلەرى, كەڭەس وداعىنىڭ باتىرى, حالىق قاھارمانى, ارميا گەنەرالى س.ق. نۇرماعامبەتوۆ اتىنداعى اسكەري كوللەدجىنىڭ جاس ۇلاندارى, ستۋدەنتتەر مەن ارحيۆ قىزمەتكەرلەرى, تاريحشى, عالىمدار قاتىستى.