زارداپ شەككەن زىرياندىقتارعا گۋمانيتارلىق كومەك جىبەرىلدى
شىعىس ءوڭىرىنىڭ زىريان اۋدانىنداعى بىرقاتار ەلدى مەكەندەردى قارعىن سۋ باسىپ, جاعداي كۇردەلەنە ءتۇستى. اۋدان اۋماعىمەن وتەتىن بۇقتىرما وزەنى بۋىرقانا تاسىپ, سۋ دەڭگەيى 26 ساۋىردە 530 سانتيمەترگە دەيىن جەتكەن-ءدى. ال 28 ساۋىردە سۋ دەڭگەيى 7 مەترگە دەيىن كوتەرىلدى. قازىرگى كەزدە قارعىن سۋدىڭ قارقىنى ءسال دە بولسا باسەڭدەگەنىمەن, سينوپتيكتەردىڭ جاقىن كۇندەرى جاۋىن-شاشىن ءتۇسۋ بولجامىنا بايلانىستى ءالى دە الاڭداۋشىلىق باسىم.
بۇقتىرما ارناسىنان اسا تاسىعاندىقتان اۋدانداعى 7 ەلدى مەكەن سۋ استىندا قالدى. اتاپ ايتقاندا, زۋبوۆسك, مالەەۆسك, پۋتينتسەۆو, پارىگينو, بايانوۆسك, بىكوۆو جانە سنەگيروۆو اۋىلدارى قىزىل سۋدان ايتارلىقتاي زارداپ شەكتى. وسىعان وراي ءوڭىر باسشىسى دانيال احمەتوۆتىڭ تاپسىرماسىمەن جاعدايدى باقىلاۋ جونىندەگى جۇمىس توبى قۇرىلدى. وبلىس اكىمىنىڭ ورىنباسارى دميتري گاريكوۆتىڭ جەتەكشىلىگىندەگى جۇمىس توبى اۋدانداعى توتەنشە جاعدايمەن تانىسىپ, ءتيىستى شارالار قابىلدانعانىن جەتكىزدى. د.گاريكوۆتىڭ ايتۋىنشا, جۇمىس توبى اۋدانداعى سۋ استىندا قالعان ەلدى مەكەندەردى تىكۇشاقپەن ارالاپ كورىپ, بارلىق ينجەنەرلىك قۇرىلعىلاردى تەكسەرىپ شىقتى.
– اۋدانداعى توعان ءوز مىندەتىن اتقارعانىمەن, ونداعى جينالعان سۋ دەڭگەيى قاۋىپتى مولشەردەن اسىپ كەتىپ, تومەن قاراي جوڭكىلە باستاعان. سونىڭ سالدارىنان ەلدى مەكەندەر مەن «وسكەمەن-راحمان قاينارى» رەسپۋبليكالىق تراسساسىنىڭ سنەگيروۆو اۋىلىنىڭ جانىمەن وتەتىن تۇسىن سۋ الىپ, كوپىردى بۇزىپ كەتتى. وبلىستىق توتەنشە جاعدايلار دەپارتامەنتى, ىشكى ىستەر دەپارتامەنتى, جەرگىلىكتى اتقارۋشى ورگاندار جانە مەديتسينالىق قىزمەتتىڭ جەدەل ءىس-قيمىلىنىڭ ناتيجەسىندە 974 ادام قاۋىپسىز جەرگە دەر كەزىندە كوشىرىلدى. ولاردىڭ ىشىندە 217 بالا بار. ادام شىعىنى جوق, – دەدى د.گاريكوۆ.
زىريان قالاسىنا جەتكىزىلگەن تۇرعىندارعا جاتىن ورىن بەرىلىپ, تاماقتاندىرىلدى. جەرگىلىكتى تۇرعىندار زارداپ شەككەندەرگە جىلى كيىمدەرمەن, ازىق-ت ۇلىكپەن كومەك كورسەتۋدە. الدىن الا مالىمەتتەر بويىنشا, اۋداندا 356 ءۇي سۋ استىندا قالىپ, باسىم بولىگىنە ايتارلىقتاي نۇقسان كەلگەن. ءتىپتى سنەگيروۆو اۋىلىنداعى كەيبىر ۇيلەردىڭ شاتىرىنا دەيىن سۋ الىپ كەتىپ, مونشا مەن قورا-قوپسىلارىن بۇزىپ كەتتى.
جۇمىس توبى سونىمەن بىرگە, كاتونقاراعاي اۋدانىنداعى جاعدايدى دا قاراپ, بۇقتىرما وزەنىنىڭ جوعارى جاعى مەن اعىسىن تەكسەردى. قازىر ونداعى احۋال تىنىش, مۇزدىقتار مەن قاردىڭ ەرۋى ءالى باستالماعان. ەرىگەن سۋ نەگىزىنەن تۇرعىسىن جانە حامير وزەندەرىنە قوسىلۋدا.
زىريان اۋدانىندا تۇرعىنداردى كوشىرۋ جانە سۋ باسۋدىڭ سالدارلارىن جويۋ ءۇشىن 230 ادام مەن 50 تەحنيكا جۇمىس ىستەۋدە. ولارعا جەرگىلىكتى تۇرعىندار دا كومەكتەسىپ جاتىر. تابيعاتتىڭ توسىن مىنەزىنەن تۋعان تاسقىنعا تۇرعىندار دا تۇسىنىستىكپەن قاراپ وتىر. ال زىريان اۋدانىن باسقا ەلدى مەكەندەرمەن جانە وبلىس ورتالىعىمەن جالعاۋ ءۇشىن كازناكوۆكا جاعالاۋى مەن كۇرشىمدى جاناي وتەتىن تەمىرجولى, سونداي-اق جاعدايدى ەسكەرە وتىرىپ ۆاسيلەۆ جاعالاۋىن مەرزىمىنەن ەرتە ىسكە قوسۋ قاراستىرىلدى. سونىمەن بىرگە, زىرياندا جەدەل كومەككە ارنالعان تىكۇشاق تۇراقتى كەزەكشىلىك ەتۋدە. اۆياتسيا كومەگىن وبلىس ورتالىعىنا جونەلتىلگەن ءبىر ناۋقاس پايدالانىپ تا ۇلگەردى.
دۋمان اناش,
«ەگەمەن قازاقستان».
شىعىس قازاقستان وبلىسى.