پاۆلودارعا كەيىنگى ەكى جىلدا جاڭا اۆتوبۋستار ءۇستى-ۇستىنە اكەلىنىپ جاتىر. قوعامدىق كولىكتى جاڭارتۋ, تاسىمال سالاسىنا سۋبسيديالاۋدى ەنگىزۋ ءوز ناتيجەسىن بەرىپ, بۇگىندە قالا ىشىندەگى جولاۋشىلار تاسىمالىنىڭ ساپاسى ارتا باستاعانى بايقالادى.
جۋىردا وبلىس ورتالىعىنداعى «پاۆلودار اۆتوكومبيناتى» جشس «Yutong» ماركالى جاڭا 20 اۆتوبۋسپەن تولىقتى. ءار اۆتوبۋستاعى وتىراتىن ورىندار سانى – 35, جالپى سىيىمدىلىعى – 93 ادام. جولاۋشىلارعا ىڭعايلى بولۋ ءۇشىن كولىكتەر پاندۋستارمەن, اۋا باپتاعىشتارمەن, رادياتورلارمەن جابدىقتالعان. وسىلايشا, سەرىكتەستىك جولاۋشىلاردىڭ العىسىنا بولەنىپ جاتىر.
– جاڭا اۆتوبۋستار №1, №1ە باعىتتارىنا شىعادى. 2024 جىلى اكەلىنگەن 20 اۆتوبۋس №2, №9 باعىتتارىنا قايتا بولىنەدى. بۇگىنگى تاڭدا اۆتوكومبينات جەلىسىندە 55 اۆتوبۋس جۇمىس ىستەيدى, ونىڭ 40-ى جاڭا. ءوڭىر بيلىگى قوعامدىق كولىكتىڭ جۇمىسىن جاقسارتۋمەن ءۇشىنشى جىل قاتارىنان جۇيەلى اينالىسىپ كەلەدى. سۋبسيديالاۋدى ەنگىزۋ, ەلەكتروندى بيلەت جۇيەسىن ەنگىزۋ, جولاۋشىلار اعىنىنىڭ اشىقتىعىن قامتاماسىز ەتۋدىڭ ارقاسىندا ايتارلىقتاي ناتيجەلەرگە قول جەتكىزىلدى, – دەپ حابارلادى وبلىس اكىمىنىڭ ءباسپاسوز قىزمەتىنەن.
كاسىپورىن ديرەكتورى الەكساندر پانچەنكونىڭ ايتۋىنشا, كۇزگە سالىم تاعى 15 اۆتوبۋس ساتىپ الىپ, ولاردى №18, №27 باعىتتارعا جىبەرەتىن ويلارى بار. وسىلايشا, بيىل تاسىمالداۋشىنىڭ بارلىق التى باعىتىنداعى كولىكتەر جاڭارتىلادى.
تاعى ءبىر ءىرى تاسىمالداۋشى – «№1 اۆتوبۋس پاركى» جشس قالا ىشىنەن ونەركاسىپتىك اۋدانعا كوشىپ, ورنالاسقان جەرىن وزگەرتكەن ەدى. ءوڭىر باسشىسى اسايىن بايحانوۆ اتالعان كاسىپورىنعا بارىپ, پاركتىڭ جاي-كۇيىن زەردەلەدى. 1957 جىلى نەگىزى قالانعان كومپانيانىڭ مەنشىك يەسى الدىڭعى جىلى اۋىسىپ, ينۆەستور ەكى جىلدىڭ ىشىندە تاسىمالداۋ ساپاسىن جاقسارتۋ ماقساتىندا اۆتوپارك پەن ونىڭ ينفراقۇرىلىمىن جاڭارتۋعا شامامەن 10 ملرد تەڭگە قاراجات قۇيدى.
كومپانيا وكىلدەرى ايماق باسشىسىنا جاڭارتىلعان اۆتوبۋس پاركىن كورسەتىپ, جۇرگىزۋشىنىڭ Face ID ارقىلى كاسىپورىنعا كىرۋىنەن باستاپ مارشرۋتقا شىعۋىنا دەيىنگى تولىق جۇمىس تسيكلى تۋرالى باياندادى. ديسپەتچەرلىك, مەديتسينالىق كابينەتتىڭ جۇمىسىمەن تانىستىردى. سونداي-اق اكىم كۇن سايىن 4-5-ساناتتاعى مەحانيكتەر مەن سلەسارلار بريگاداسى جۇمىس ىستەيتىن جوندەۋ ايماعىندا بولدى. كاسىپورىندا زاماناۋي اۆتوماتتاندىرىلعان جۋ, ماي اۋىستىرۋ, كەڭ بوكستار, مەنشىكتى جانارماي قۇيۋ بەكەتى جابدىقتالعان. جۇرگىزۋشىلەرگە دەمالاتىن ورىن, تاماق ىشەتىن, كيىم اۋىستىراتىن, جۋىناتىن, كىر جۋاتىن بولمەلەر قاراستىرىلعان. بۇگىندە كاسىپورىننىڭ 20 اۆتوبۋس باعىتىندا 260 جۇرگىزۋشى جۇمىس ىستەيدى. اۆتوپاركتە 2023–2024 جىلدارى شىعارىلعان 130 اۆتوبۋس, 2019 جىلعى 30 اۆتوبۋس بار.
«الەۋمەتتىك ماڭىزى بار جولاۋشىلار تاسىمالىنا باعىتتالعان سۋبسيديالاردىڭ بيزنەستەن كەتپەي, كاسىپورىندى دامىتۋ ءۇشىن قايتا ينۆەستيتسيالانعانىنا قۋانىشتىمىن», دەپ اتاپ ءوتتى وبلىس اكىمى.
قۇرىلتايشىنىڭ ايتۋىنشا, اۆتوپارك قالا سىرتىنا كوشۋدەن ۇتىلماعان. بۇرىنعى اۆتوپارك تۇرعىن ۇيلەردىڭ ءدال ورتاسىندا ورنالاسقان ەدى. قالا تۇرعىندارى اۆتوبۋستاردىڭ جينالۋىنا, تاڭەرتەڭ, كەشكى ۋاقىتتاردا كولىكتەردەن شىعاتىن گازدار مەن شۋعا ءجيى شاعىمداناتىن. قازىر ول قۇبىلىس ساپ تىيىلعان.
«جاڭا بازا بۇرىنعىدان ەكى ەسە ۇلكەن. ءبىز مامانداندىرىلعان اۆتوپاركتى جوسپارلاپ, ىسكە اسىردىق. 2025 جىلدىڭ جوسپارىندا قوسىمشا 20 اۆتوبۋس ساتىپ الۋ, شاتىردى, كىرمە توراپتى اۋىستىرۋ, عيماراتتىڭ ەكىنشى, ءۇشىنشى قاباتتارىن جوندەۋ, اۋماقتى اسفالتتاۋ كوزدەلىپ وتىر. قىسقاسى, الداعى ۋاقىتتا قىزمەتكەرلەرىمىزگە بارىنشا قولايلى جاعداي تۋدىرۋدى جالعاستىرا بەرەمىز. بۇل ءوز كەزەگىندە جولاۋشىلار تاسىمالىنىڭ ساپاسىن ودان ءارى جاقسارتۋعا سەپتىگىن تيگىزەدى», دەدى №1 اۆتوپاركتىڭ قۇرىلتايشىسى ريزۆان تسيناەۆ.
پاۆلودار وبلىسى