جۋىردا ەل كينوتەاترلارىندا وتباسىلىق كومەديا – «مالاي» ءفيلمى جاپپاي كورسەتىلىمگە شىقتى. بۇل – «حولوپ» تۋىندىسىنىڭ قازاق كورەرمەنىنە بەيىمدەلگەن نۇسقاسى. وسىعان دەيىن فيلم تۇركيا, موڭعوليا مەن فرانتسيادا شىققان. وتاندىق نۇسقادا جەرگىلىكتى مەنتاليتەت پەن ءازىل ەرەكشەلىكتەرى ەسكەرىلدى.
باستى كەيىپكەر – بايدىڭ مۇراگەرى چينا (جەڭىس وماروۆ). جاس جىگىت ءسان-سالتاناتقا ابدەن بوي ۇيرەتىپ, وزىنە ءبارى رۇقسات دەپ ويلايدى. الايدا ونىڭ اكەسى (جانداربەك سادىرباەۆ) ۇلىن ساباسىنا ءتۇسىرۋدى ويلاپ, ەرەكشە ايلا-امالعا بارادى. ەلدەن ەرەكشە پسيحولوگپەن (دۋلىعا اقمولدا) بىرىگىپ, XIX عاسىرداعى قازاق اۋىلىنىڭ ءومىرىن قايتا جاسايدى. چينانى سول ورتاعا جىبەرىپ, «باي بالاسى ادام بولا ما؟» دەگەن سۇراققا جاۋاپ ىزدەيدى.
«الەمدىك كينودا ءساتتى تۋىندىلاردى نەگىزگە الىپ, ولاردىڭ اداپتاتسياسىن ۇسىنۋ – كەڭ تارالعان ءارى تانىمال ءادىس. ءبىز دە وسى باعىتتى قولدانىپ, وزىمىزگە ۇلكەن تالاپ قويدىق. قازاقستان قوعامىندا ماجورلاردىڭ تاقىرىبى وتە وزەكتى, سول سەبەپتى «حولوپ» فرانشيزاسى بىزگە سايكەس كەلدى. بىزگە قازاق مەنتاليتەتىن, قۇندىلىقتارى مەن ءازىلىن ەسكەرە وتىرىپ, بەيىمدەۋ وتە ماڭىزدى بولدى. سونىمەن قاتار «مالاي» – تولىقتاي قازاق تىلىندە تۇسىرىلگەن فيلم», دەپ اتاپ ءوتتى «Unico» كومپانياسىنىڭ باس پروديۋسەرى انارا ءجۇنىسوۆا.
جەڭىس وماروۆ (Zheka Fatbelly) ءۇشىن دە اتالعان جوبا ۇلكەن سىناق بولدى. سەبەبى بۇل – ونىڭ باستى رولدەگى دەبيۋتى. رەجيسسەر مەن ءتۇسىرىلىم الاڭىنداعى ارىپتەستەرىنىڭ ايتۋىنشا, بلوگەر ءوز ءرولىن تاماشا ورىنداپ, كادردا شىنايى كورىندى.
«مەنىڭ كەيىپكەرىم نەشە ءتۇرلى قيىندىقتى باستان وتكەردى. فيزيكالىق جاعىنان وتە اۋىر بولدى, بىراق قىزىقتى ساتتەر دە از ەمەس ەدى. اسىرەسە اتپەن ءجۇرۋ جانە شابۋ قيىنعا سوقتى. قازىر سول ءتۇسىرىلىم كۇندەرىن ساعىنىشپەن ەسكە الامىن, دەمەك, ءبارى جاقسى ءوتتى», دەدى جەڭىس وماروۆ (چينا).
«ەلىمىزدە بالالار مەن ەرەسەكتەرگە بىردەي قىزىقتى بولاتىن فيلمدەر كوپ ەمەس. سوندىقتان «مالاي» جوباسىندا جۇمىس ىستەۋ ماعان قىزىق بولدى. چينانىڭ وقيعاسى مەن ونىڭ وتكەن عاسىر اۋىلىنداعى قىزىقتارى كىشكەنتاي كورەرمەندى كۇلدىرسە, ۇلكەندەر ءۇشىن ماجوردى تاربيەلەۋ تاقىرىبى وي سالۋى مۇمكىن», دەيدى فيلم رەجيسسەرى ەرنار نۇرعاليەۆ.
ايتا كەتەيىك, فيلمگە دۋلىعا اقمولدا, لاۋرا مىرزاحمەت, جانداربەك سادىرباەۆ, ەرمەك شىنبولاتوۆ, ايدا قۇرمانعاليەۆا (مونا), سابينا موۆلاەۆا, حاميت ەردەحان سىندى بەلگىلى اكتەرلەر قاتىسقان.