باتىس قازاقستان وبلىسىنىڭ سىرىم اۋدانىندا قار قارقىندى ەرىپ, شىدەرتى وزەنىنىڭ دەڭگەيى كۇرت كوتەرىلگەن. بۇل تۋرالى توتەنشە جاعدايدار مينيسترلىگى حابارلادى, دەپ جازادى Egemen.kz.
شامادان تىس كوپ سۋ اقساي-جىمپيتى اۆتوجولىنىڭ 27-ءشى شاقىرىمىندا, ارالتوبە اۋىلىنىڭ جانىندا نەگىزگى وتكەلدى جوندەۋ كەزىندە سالىنعان ۋاقىتشا كوپىردىڭ اينالاسىنداعى توپىراقتى شايىپ كەتتى.
قازىر تجم 20982 اسكەري ءبولىمىنىڭ قىزمەتشىلەرى ۋاقىتشا كوپىردى نىعايتۋ ءۇشىن ينەرتتى ماتەريالدارى بار قاپتاردى تولتىرىپ جاتىر. كوپىردى قالپىنا كەلتىرۋ جۇمىسى سۋ دەڭگەيى تومەندەگەندە باستالادى.
مينيسترلىك جەرگىلىكتى اتقارۋشى ورگاندار مەن پوليتسيا دەپارتامەنتى قىزمەتكەرلەرىنىڭ دە كەزەكشىلىگى ۇيىمداستىرىلعانىن مالىمدەدى.
«جاعداي جەرگىلىكتى تۇرعىندارعا جەدەل حابارلاندى, ەلدى مەكەندەرگە قاۋىپ جوق. قازىرگى ۋاقىتتا ءبورلى اۋدانى اقساي قالاسى جاعىنان بالامالى جول بار», دەلىنگەن ۆەدومستۆو حابارلاماسىندا.