ەندى قازاقستاندىقتار وزگەنىڭ ەلەكتروندىق تسيفرلىق قولتاڭباسىن (ەتسق) پايدالانعانى ءۇشىن جاۋاپكەرشىلىككە تارتىلادى. بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى حابارلادى, دەپ جازادى Egemen.kz.
جەكە جانە زاڭدى تۇلعالاردىڭ دەربەس دەرەكتەرىن قورعاۋ جانە ەلەكتروندىق تسيفرلىق قولتاڭبا سالالارىنداعى اكىمشىلىك قۇقىق بۇزۋشىلىقتار ءۇشىن اكىمشىلىك جاۋاپكەرشىلىككە تارتۋ مەرزىمى ەكى ايدان ءبىر جىلعا دەيىن ۇزارتىلدى. جاڭا نورمالار 2025 جىلعى 13 ناۋرىزدان باستاپ كۇشىنە ەندى.
دەربەس دەرەكتەردى زاڭسىز جيناۋ, وڭدەۋ جانە ولاردى قورعاۋ شارالارىن ساقتاماعانى ءۇشىن سالىناتىن ايىپپۇلداردىڭ مولشەرى ءۇش ەسە ۇلعايتىلادى. مينيسترلىك مالىمەتىنشە, بۇرىن ايىپپۇلدار قۇقىق بۇزۋشىلىقتىڭ قۇرامىنا جانە كاسىپكەرلىك سۋبەكتىسىنىڭ ساناتىنا بايلانىستى 10-نان 1000 اەك-كە دەيىن وزگەرىپ وتىرسا, بۇدان بىلاي 30-دان 2000 اەك-كە دەيىن ۇلعايتىلادى.
بۇدان بولەك, قازاقستان رەسپۋبليكاسىنىڭ ەلەكتروندىق قۇجات جانە ەلەكتروندىق تسيفرلىق قولتاڭبا تۋرالى زاڭناماسىن بۇزعانى ءۇشىن جاڭا اكىمشىلىك قۇقىق بۇزۋشىلىق ءتۇرى كۇشىنە ەنەدى. ياعني, باسقا ادامنىڭ ەتسق كىلتىن پايدالانعانى ءۇشىن اكىمشىلىك جاۋاپكەرشىلىك قاراستىرىلادى.
بۇعان دەيىن اكىمشىلىك جاۋاپكەرشىلىك تەك ەتسق كىلتىن ءۇشىنشى تۇلعالارعا زاڭسىز بەرۋ جانە ونى قورعاۋ بويىنشا تىركەۋ كۋالىگىنىڭ يەسى تاراپىنان قاجەتتى شارالاردى قابىلداماۋ جاعدايلارىنا عانا قولدانىلاتىن. ەندى وزگەرىستەر كۇشىنە ەنگەننەن كەيىن ەتسق-نى زاڭسىز بەرگەن دە, ونى پايدالانعان تۇلعالار دا جاۋاپكەرشىلىككە تارتىلادى.