بۇل تۋرالى ۇكىمەت باسشىسى ولجاس بەكتەنوۆتىڭ «ىلگەرىلەۋگە باستاعان التى جىل: قازاقستان ورنىقتى دامۋ جولىندا» اتتى ماقالاسىندا ايتىلعان, دەپ حابارلايدى Egemen.kz.
«2019 جىلدان باستاپ ءومىر ءسۇرۋ ۇزاقتىعى 73 جاستان 75 جاسقا دەيىن ۇلعايدى. جالپى ءولىم-ءجىتىم 7,8%-عا, انا ءولىمى – 26,3%-عا, نارەستەلەردىڭ شەتىنەپ كەتۋ كورسەتكىشى – 15,8%-عا تومەندەدى. بۇعان پروفيلاكتيكانىڭ تيىمدىلىگىن ارتتىرۋ جانە سكرينينگپەن قامتۋ دەڭگەيىن كەڭەيتۋ ىقپال ەتتى», دەيدى و.بەكتەنوۆ.
سونداي-اق ۇكىمەت باسشىسى پرەزيدەنتتىڭ «اڭساعان ءسابي» ارنايى باعدارلاماسىنىڭ ارقاسىندا, بالا سۇيە الماعان وتباسىلاردا 2021 جىلدان بەرى 9 مىڭنان استام ءسابي دۇنيەگە كەلگەنىن جەتكىزدى. بۇعان قوسا مەديتسينا سالاسى ماماندارىنا جۇزەگە اسىرىلعان ءتيىمدى جوبالاردى اتاپ ءوتتى.
«دەنساۋلىق ساقتاۋ جۇيەسىنىڭ كادرلىق الەۋەتىن ارتتىرۋعا, اسىرەسە اۋىلدىق جەرلەردى قاجەتتى ماماندارمەن قامتۋعا ەرەكشە نازار اۋدارىلىپ كەلەدى. ماسەلەن, اۋىلدىق ەلدى مەكەندەرگە كەمىندە 5 جىل مەرزىمگە جۇمىسقا كەلگەن مەديتسينا قىزمەتكەرلەرىنە 8,5 ميلليون تەڭگە مولشەرىندە بىرجولعى اقشالاي تولەم ەنگىزىلدى. تۇرعىن ءۇي ماسەلەلەرىن شەشۋدىڭ قولجەتىمدى قۇرالدارى بار», دەدى و.بەكتەنوۆ.